Romanos 3

1¿Ti ventaja ijtʉp tu'c judíu? Mit ¿pa ti oy te nimarca̱jtʉp as̈am judíujat iguiwatca? 2Judíujat itcʉjʉp may ventaja ni'c Dios iguitumuyajcau ipalabra. 3¿Nat is̈jawiga? Te una̱c judíujat igacumplia̱tcap lo que inʉmway Dios, ¿is̈jawiga Dios igacumplia̱táj lo que inʉmpay? 4Caje' we'n. Dios siempre icumplia̱tp lo que inʉmpay, mit je' inʉmp iyacs̈ta'cway maja iwe̱tcawa'naj jayajwat. As̈am itsʉ̱na ja'yic Dios ilibruni'c, inʉmgajau Dios:

Lo que inyʉmpay pichináj iyacs̈ta'cway,

mit mipichináj oy cuandu jayajwat iwangáj is̈juzga̱tcáj.

5Cuandu jayajwat iguiwatca mal, más najawigap ni'c Dios iwatp oy. Jinap ¿ti nanʉmgáj? ¿Is̈jawiga Dios igawatp oy ni'c icastiga̱tcʉs̈p maljayajwat? We'n iguipensa̱tca una̱c jayajwat. 6Caje' we'n lo que ipensa̱tcapay. Dios itp ti iguijuzga̱tcʉs̈wa'n jayajwat. Po ma wátate mal, ca-oyájate iguijuzga̱tcʉs̈ jayajwat ayʉ̱́j mundujway.

7Cuandu ʉjtsat nawe̱tcawa'n, más najawigáj ni'c Dios inʉmp solo lo que iyacs̈ta'cway, mit we'n je' tsʉ̱náj más mʉjninʉmic. Jemni'c una̱c jayajwat inʉmgap ni'c Dios magacastiga̱tcʉs̈ we̱tpajyat. 8Te wename ijat, ¿tini'c más nas̈cawátca mal pa ma mi'n lo que oyway? Cʉjtu'c we'n tʉs̈tucotscap, inʉmgap ni'c we'n tʉs̈ajque's̈ca. Más oy Dios ma condena̱tcʉs̈ jayajwat ipensa̱tcapay we'n.

Ca-itp jayau yacs̈icway

9¿Ti nanʉmgáj? ¿Is̈jawiga judíujat más iwatcap oy que jeme caje'jatway judíujat? Caje' we'n. Ni'c tʉnactujawigʉs̈way judíujat mit we'ney jeme caje'jatway judíujat ni'c to'ctʉgʉyijcat itsʉ̱nga mit ma̱jlat. 10As̈am itsʉ̱na ja'yic Dios ilibruni'c:

Ca-itp netu'c jayau yacs̈icway.

11Ca-itp pʉn i-is̈capay,

ne ca-itp pʉn iche'mpay Dios iyacs̈ta'cway

12Nu'pʉjʉn icuyaguigau oyway to̱u,

nu'pʉjʉn pichingau mal.

Ca-itp pʉn iwatpay oy. Ca-itp netu'c.

13Iyo'jcʉtʉm imu-e'pcap tu'c á̱nimacʉt awa'tsicway,

ni'c ma̱lo'c nu'pʉjʉn inʉmgapay,

mit yújijcat pa iwe̱tcawa'n.

Ayé lo que inʉmgapay imu-e'p as̈am tsanay-venenu.

14Jayautucotscap mit jayau-ángap.

15Siempre pensa̱tí̱jcap pa igui-ago'jcawa'n tu'c jayau.

16Ayé maljayajwat i-actogoyda̱jcap nu'pʉjʉn mam inʉs̈ca, mit i-actunas̈cap jayajwat.

17Mit ca-oyap iguipa̱tca ayé to̱u mam i-it paz.

Siempre iwangap tsuguin.

18Igapʉ̱tcap Dios cuandu iguiwatca mal.

19Najawigap ni'c nu'pʉjʉn inʉmpay ayé ampay ley, inʉmp pa jeme tsʉ̱ngapay domina̱tic mit ayé ley, mit nu'pʉjʉn jayajwat ayʉ̱́j mundujway ma atujca i-ajwat, ni'c culpa̱tic itsʉ̱nga mam ijuzga̱t Dios. 20Ni'c Dios igapʉctsowáj nejʉmay jayau jeme pensa̱tpay pa puru ley iguicumplia̱twa'n. Ni'c ayé ley solo nas̈actujawigap ni'c nawatcap mal.

Dios nas̈yacs̈icninʉmgap ni'c nacupʉjcap

21Jinap nas̈caja-obliga̱tcap ayé ampay ley, ni'c Dios nas̈actujawigap nat nas̈pʉctsougap, ni'c we'n iguinʉjm ámbanu ayé ley mit profetajat. 22Dios iyacs̈icninʉmgʉs̈p nu'pʉjʉn icupʉjcapay Jesucristu. Ni'c Dios niwe'nu igui-e'pcʉs̈ nu'pʉjʉn jayajwat, judíujat mit caje'jatway judíujat. 23Ni'c nu'pʉjʉn jayajwat iwatcap mal, mit Dios ca-oyap iguipʉctsougʉs̈. 24Jinap Dios nas̈pʉctsougap ni'c nas̈wano'jcau mit nas̈moygau ayʉ̱́j favor we'nujyu ni'c Cristu Jesús itso̱c nama̱jlat pa nas̈libra̱tcáj. 25Dios i-ajyu't Jesús pa i-o'cwa'n pa iguitso'cwa'n nama̱jlat, pa we'n Dios oyap iguiperdona̱tcʉs̈ nu'pʉjʉn icupʉjcapay Jesús. Jat we'n pa najawiga ni'c Dios iwatp oy, ni'c je' ijtʉu calma mit ampay jayajwat, igacastiga̱tcʉs̈u mʉgʉc por ayé mal iwatcaway. 26Mit we'ney jinapay tiempu nas̈actujawigap ni'c je' iwatp oy mit iyacs̈icninʉmgʉs̈p jeme icupʉjcapay Jesús.

27Jinap ca-oyap nanimʉjninʉmgʉjʉ, ni'c ca-oyap nas̈cumplia̱tca ayé ley. Natsʉ̱ngap oy mit Dios solo ni'c nacupʉjcap Jesús. 28Jemni'c najawigap ni'c Dios ipʉctsowáj tu'c jayau te icupʉcp Jesús, mit caje' te puru ley icumplia̱tp.

29Dios caje' solo pa judíujatu. Najawigap ni'c je' Dios pa jeme caje'jatwayey judíujat. 30Ni'c itp tu'gu Dios mit je' iyacs̈icninʉmgʉs̈áj judíujat te icupʉjcap Jesús, mit we'ney te icupʉjcap Jesús jeme caje'jatway judíujat. 31¿Is̈jawiga te nacupʉjcap Jesús, nayajcap jalmanu Dios iley? Caje' we'n. Te nacupʉjcap Jesús, más najayaumaygáj Dios.

Currently Selected:

Romanos 3: PSNT

Highlight

Compare

Copy