Romanos 5
5
Nat Dios nas̈yacs̈icninʉmgap
1Dios nas̈yacs̈icninʉmgap ni'c nacupʉjcap, mit jemni'c natsʉ̱nga oy mit Dios, ni'c el Señor Jesucristu nas̈actsʉ̱ngap oy mit je'. 2Mit jinap oyap nas̈cutómiga Dios ni'c Jesucristu nas̈cowangap, mit Dios nas̈moygap favor ni'c nacupʉjcap Jesucristu, mit como nas̈moygap favor, jinap natsʉ̱ngap mʉgʉc mit je'. Mit ji'cp najo̱jtat ni'c na-atsʉ̱ngap pa nas̈-e'pcawa'n Dios mam itsʉ̱na mʉjninʉmic. 3Mit ji'cpey najo̱jtat cuandu nas̈tunás̈ca. Najawigap ni'c nas̈tunas̈cawa'n, namajmoygáj más. 4Mit te namajmoygap, más napichingáj oy. Mit te napichingap oy, más oyáj nas̈atsʉ̱́nga Dios. 5Mit te na-atsʉ̱ngap Dios, nagawinchu̱gap ni'c Dios nas̈moygau Espíritu Santu najo̱tni'jcat, mit je' nas̈actujawigap ni'c Dios nas̈wangap.
6Ʉjtsatu ca-oyapate nanisalva̱tcʉjʉ, po en tu'c oyway tiempu Dios i-ajyu't Cristu pa i-o'cwa'n pa maljayajwat. 7Iyacs̈ta'cway majo'c tu'c jayau i-o'cwa'n pa tu'c jayau yacs̈icway, mit oyáj i-it tu'c jayau jeme o'gámpay pa tu'c jayau oyway. 8Po Dios nas̈actujawigap ni'c nas̈wangap, ni'c Cristu o'c pa ʉjtsat cuandu nas̈wátcaj mayo'c ma̱jlat. 9Mit jinap Dios nas̈yacs̈icninʉmgap ni'c Cristu iyac inipin pa ʉjtsat. Jemni'c más natsʉ̱ngáj libra̱tic en ayé s̈ʉjw ijuzga̱twa'n Dios. 10Dios primeru nas̈-is̈cau as̈am nas̈mutsúguijnat, po jinap natsʉ̱ngap oy mit je' ni'c o'c iway pa nas̈salva̱tcáj. Natsʉ̱ngap oy mit Dios, mit más seguru natsʉ̱ngawa'n salva̱tic ni'c namutʉgʉygau Cristu jeme ijtʉpay vida. 11Mit we'ney ji'cp najo̱jtat ni'c Dios nas̈wangap, ni'c el Señor Jesucristu nas̈cowangau pa natsʉ̱́nga oy mit Dios.
Adán mit Cristu
12Tu'c jayau inʉ'jy Adán iwajtʉ'c mal en ayʉ̱́j mundu, mit ayé ma̱jlat nas̈ago'jcap, mit jemni'c i-o'jca nu'pʉjʉn jayajwat ni'c iwatcap mal. 13Antes i-ijt Moisés iley, jayajwat iwatcau mal en ayʉ̱́j mundu, po mam iga-it ley, nepʉn nas̈caculpa̱tcap. 14Po majawe'naj, desde iguiwajt mal Adán hasta Moisés iguiwajt iley, jayajwat it ti i-o'jcaj mit o'jcawey jeme igawatcaway mal as̈am Adán iguiwajt. Ni'c Adán nas̈actogoygau po Jesucristu nas̈libra̱tcau, mit nʉmic desde ámbanu pa imi'nwa'n.
15Ayé mal iwatway Adán caje' as̈am ayé favor nas̈moygapay Dios, ni'c nu'pʉjʉn jayajwat o'jcap ni'c Adán iwat mal. Po jinap natsʉ̱ngap salva̱tic ni'c Dios nas̈wangau mit nas̈moygau tu'c mʉjway favor. Jat we'n ni'c tu'c jayau Jesucristu nas̈wangau, mit jemni'c Dios nas̈moygau may favor pa natsʉ̱́nga oy nanu'pʉjʉjnat. 16Ayé favor nas̈moygapay Dios nas̈pichingajap oy, caje' as̈am iguijat Adán jeme iwatway mal. Adán juzga̱tic itsʉ̱naj ni'c je'yu iwat mal, mit por je' jayajwat tsʉ̱ngap condena̱tijcat. Mit jayajwat iwatcau mayo'c mal, po majawe'naj Dios iyacs̈icninʉmgʉs̈p ni'c imoygʉs̈ favor. 17Jayajwat itp ti i-o'jcawa'n ni'c ayé jayau Adán iwat mal. Po jinap ayé jayau Jesucristu imoygʉs̈áj vida pa jeme ipʉctsougapay Dios imʉjway favor. Ni'c Dios nas̈yacs̈icninʉmgap mit napʉctsougap ayé favor as̈am tu'c regalu.
18Dios inʉm ni'c nu'pʉjʉn jayajwat tsʉ̱ngap condena̱tijcat ni'c ayé jayau Adán iwat mal. Po Dios ipʉctso̱u Jesucristu ni'c iwat oy mit ipʉctsougʉs̈ámpey nu'pʉjʉn jayajwat icupʉjcapay je', mit itcʉjʉ̱́j vida cacʉs̈ámpay. 19Ni'c nu'pʉjʉn jayajwat pichingau mal ni'c ayé jayau Adán igajayaumayu Dios. Po Dios oyáj iguipʉctsougʉs̈ jayajwat ni'c ayé jayau Jesucristu ijayaumay Dios.
20Dios i-acmin iley pa jayajwat ma jawiga ni'c iwatcap mayo'c ma̱jlat. Po cuandu iguiwatca más mal, Dios más iguiyac favor pa natsʉ̱́nga salva̱tic, ni'c nas̈wano'jcau. 21Jayajwat itp ti i-o'jcawa'n ni'c iwatcap mal, po Dios nas̈moygap favor ni'c nas̈yacs̈icninʉmgap. Jinap nas̈manda̱tcap el Señor Jesucristu, mit je' nas̈moygáj vida cacʉs̈ámpay.
Currently Selected:
Romanos 5: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
