Romanos 15
15
Namájyiga jeme cacupʉjcapay mʉgʉc
1Ʉjtsat nacupʉjcapay mʉgʉc namájyiga jeme cacupʉjcapay mʉgʉc, mit nagawátca lo que ʉjtsatu nawangapay. 2Ʉjtsat nanu'pʉjʉjnat nawátcaja oy namupro̱wije̱wajyat pa ma pʉjca maj mit Dios. 3Mit we'ney Cristu igawatu lo que je'yu iwanway, po iguijat as̈am itsʉ̱na ja'yic Dios ilibruni'c, je' inʉjmau Dios yename: “Ʉ̱ tʉs̈malninʉmgawey jeme is̈malninʉmgaway mi̱.” 4Ni'c nu'pʉjʉn inʉmgaway ámbanu Dios ilibruni'jcat, ayé ja'yic pa napʉctánga. Mit ayé librujat nas̈majyigap pa na-aguépca calma mit nas̈-animá̱tcap, jemni'c nas̈atsʉ̱́nga lo que mi'námpay. 5Dios nas̈moygap calma mit nas̈-animá̱tcap. Je' iwamp natsʉ̱́nga en acuerdu ni'c namutʉgʉygau Cristu Jesús. 6Mit we'n nanu'pʉjʉjnat na-oyninʉmgáj Dios, el Señor Jesucristu ite̱t.
Oyway noticia pa jeme caje'jatway judíujat
7Jemni'c nipʉctsóugʉjʉ oymanac minu'pʉjʉjnat, as̈am Cristu is̈pʉctsougau mijchat, pa jayajwat ma oyninʉmga Dios. 8Mit tʉnʉmgʉs̈ap ni'c Cristu min pa iguiservia̱tcʉs̈awa'n judíujat, mit pa iguicumplia̱twa'n ayé promesajat Dios imoygʉs̈way nate̱jtat ámbanuway, mit we'n i-actujawigʉs̈ ni'c Dios icumplia̱tp lo que inʉmway. 9Mit Cristu miney pa jeme caje'jatway judíujat pa ma oyninʉmga Dios ni'c je' igui-ayo̱wis̈cau, as̈am itsʉ̱na ja'yic Dios ilibruni'c:
Tʉ-oyninʉmáj mi̱ mam itsʉ̱nga jeme caje'jatway judíujat,
mit tʉn-ʉwáj himnujat pa pi tsʉ̱na oyninʉmic. We'n iguinʉ́jmaj Dios.
10Mit inʉmwey Dios ilibruni'c:
Jeme caje'jatway judíujat ma ji'c ijo̱jtat as̈amu Dios ijayajwat.
11Mit inʉmwey:
Ma oyninʉmga el Señor nu'pʉjʉn jeme caje'jatway judíujat.
Ma mʉjninʉmga Dios nu'pʉjʉn jayajwat.
12Mit inʉm Isaías wename pa najawiga nat imi'nwa'n Cristu:
Tu'c jayau pichináj Isaí ifamiliani'c,
mit je' imanda̱tcʉs̈áj jeme caje'jatway judíujat,
mit je'jat i-atsʉ̱ngáj hasta imi'nwa'n je'.
13Ʉjtsat na-atsʉ̱ngap Dios pa nas̈pʉctsougawa'n cosa oyway, mit tʉnyo'jtap je' pi is̈acji'jcajac injo̱jtat, pi is̈moygac paz ni'c micupʉjcap, pa we'n inatsʉ̱ngáj Dios ni'c Espíritu Santu is̈moygap maj.
14Tʉnhermanujat, tʉtsʉ̱nap seguru ni'c mijayawano'jcap, mit inis̈capo'jcap may, mit oyap inyitsáwigʉjʉ. 15Po tʉgapʉ̱tu tʉja'ygʉs̈a ayʉ̱́j noc pa pi nijawiga nu'pʉjʉn tʉnʉmgʉs̈away. 16Dios tʉs̈moy favor, tʉs̈yac pa tʉs̈servia̱jtawa'n Jesucristu mam itsʉ̱nga jeme caje'jatway judíujat. Mit tʉnyʉmdacyo'jyap i-oyway noticia mam je'jat. Mit jeme caje'jatway judíujat tʉnyajcʉs̈áj Dios icʉ'jugum as̈am tu'c ofrenda je' iwampay, mit Espíritu Santu tsʉ̱nap ijo̱tni'jcat pa iguilimpia̱tcʉs̈wa'n.
17Tʉnservia̱jtap Cristu Jesús, mit jemni'c tʉs̈-oyninʉm ayé yos̈ tʉs̈moyway Dios. 18Jinap solo tʉnyʉmáj lo que Cristu tʉs̈actuwatpay ʉ̱, pa ma jayaumayga jeme caje'jatway judíujat. Cristu tʉs̈ajyu't pa tʉs̈nʉjmawa'n ipalabra mit pa tʉs̈watwa'n cosa oyway. 19Je' tʉs̈actuwatp majatway milagrujat mit tʉnacnigu-epigʉs̈ʉu ayé jayajwat ni'c Espíritu Santu tʉs̈moy poder. Mit tʉnyʉmdacyo'ygʉ́s̈au Cristu i-oyway noticia, mit imaraugau desde Jerusalén mit nu'pʉjʉn laj hasta Ilíricoway na̱s̈. 20Mit siempre tʉncuji'cs̈iu tʉs̈nʉmdacyo'ywa'n oyway noticia mam nunca iguiganimáraugaja Cristu inʉ'jy, ni'c tʉngawamp tʉyos̈watwa'n mam jatu'c jayau iguichú̱chij. 21As̈am itsʉ̱na ja'yic Dios ilibruni'c:
Igajawigapate ni'c mi'náj je', po je'jat igui-e'pcáj.
Je'jat nunca iganimaraugajap Dios ipalabra, po imaraugáj.
Pablo iwamp inʉs̈wa'n Roma
22Tʉnwanate tʉnʉs̈wa'n mam mijchat, po mayo'c cosajat ca-oyap tʉs̈acnʉs̈p. 23Po jinap tʉncʉs̈way tʉnyos̈ yam. Mayap s̈iwit tʉnʉs̈o'jcʉ mam intsʉ̱nga, 24po tʉnʉs̈wa'n pa España, tʉnas̈áj mam mijchat ni'c tʉnwamp tʉ-e'pcʉs̈wa'n mit ji'gáj tʉnjo̱jt mit mijchat. Mit cʉs̈wa'n nʉs̈áj is̈yacta̱jcap mam tʉnʉs̈wa'n. 25Po jinap tʉnʉs̈p Jerusalén pa tʉs̈-entrega̱twa'n tu'c ayuda pa Dios ijayajwat jeme tsʉ̱ngapay jem. 26Ni'c hermanujat jeme tsʉ̱ngapay Macedonia mit Acayajway na̱s̈ iwangau iguiyajcawa'n tu'c ofrenda pa hermanujat pro̱wijatway jeme tsʉ̱ngapay Jerusalén. 27Iwangau iguiyajcawa'n ayé ofrenda ni'c je'jat casi ipʉ́jquijat judíujat. Ni'c jeme caje'jatway judíujat ipʉctsougau ayé cosa oyway iyacway Dios pa judíujat. Mit jemni'c je'jat itpey ti iguimajyigawa'n ayé judíujat jeme cupʉjcapay. 28Icʉs̈wa'n ayé asuntu, tʉn-entrega̱tcʉs̈áj ayé ofrenda iyajcaway. Mit cʉs̈wa'n tʉnas̈áj mam intsʉ̱nga cuandu tʉnʉs̈wa'n pa España. 29Cuandu tʉcojawa'n mam mijchat, tʉtsʉ̱nap seguru ni'c Dios tʉs̈mo'áj may favor pa tʉs̈nʉmdacyo'ywa'n ayé oyway noticia iyacway Cristu, mit wejpu'n ji'jcáj injo̱jtat.
30Hermanujat, inwangap el Señor Jesucristu, mit Espíritu Santu is̈acniwangʉjʉp. Jemni'c tʉyo'tcʉs̈ap pi is̈-orá̱tcajac mʉgʉc, mit wename ʉ̱ is̈majyigáj. 31Orá̱tca pa Dios ma tʉs̈libra̱tac de ayé judíujat cacupʉjcapay. Orá̱tca-ey pa ayé hermanujat Jerusaléjnatway ma pʉctsouga oy ayé ofrenda tʉnmunʉs̈cʉs̈apay, 32mit in-ora̱tcajámpey Dios, pa ma ji'c tʉnjo̱jt cuandu tʉ-e'pcʉs̈wa'n, mit tʉpo'cs̈áj mam mijchat. Mit te Dios iwamp, pichináj oy ayé. 33Ayé Dios nas̈moygapay paz ma tsʉ̱na mit mijchat minu'pʉjʉjnat. Amén.
Currently Selected:
Romanos 15: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
