Hebreos 11
11
Nat icupʉ́jcaj ampay jayajwat
1Na-aguepcap seguru lo que na-atsʉ̱ngapay ni'c nacupʉjcap. Mit najawigap ni'c iyacs̈ta'cway ayé naga-e'pcapay, po nacupʉjcap. 2Mit ayé jayajwat ámbanuway tsʉ̱ngau oyninʉmic ni'c cupʉjcau.
3Mit como nacupʉjcap, najawigap nat iguinʉjm Dios ma jat ayʉ̱́j mundu. Jemni'c nu'pʉjʉn cosa na-e'pcapay, ayé iwat Dios jeme jinap naga-e'pcapay.
4Abel ni'c icupʉc Dios, icojtsau tu'c ofrenda más oyway, po jeme iyacway Caín, igapʉctso̱wu Dios. Mit Dios inʉm ni'c Abel tu'c jayau yacs̈icway ni'c ipʉctso̱u lo que iguiyajcaway. Mit Abel maja o'guigaj, najawigap ni'c icupʉc Dios.
5Enoc ni'c icupʉc Dios, Dios iguimunʉcs̈ nijutuc pa tsajpni'c mit je' ca-o'gu yam, mit nepʉn igajapa̱tu ni'c Dios iguimunʉcs̈ pa tsajpni'c. Ja'yic itsʉ̱na Dios ilibruni'c, antes inʉjcs̈ pa tsajpni'c je' i-acji'jcau Dios ijo̱jt. 6Po jeme cacupʉcpay, ca-oyap igui-acji'jca Dios ijo̱jt. Ni'c jeme icutomiyámpay Dios, itp ti iguicupʉcwa'n ni'c itp Dios, mit ma cupʉguey ni'c Dios imoygʉs̈áj premiu jeme je' iguiche'ngapay.
7Noé ni'c cupʉc, Dios igui-actujawiu jaran ayé peligru jeme jatámpay, mit ayé nunca canijatp. Mit je' pʉ̱jtʉgʉy mit chu̱chiu jaran iguiwat ayé barcu itunisalva̱jtʉway je' mit ifamilia. Ni'c je' cupʉc, i-actujawigʉs̈ jayajwat ni'c tsʉ̱ngáj condena̱tic ni'c iwatcau mal. Mit je' Dios iguipʉctso̱u ni'c icupʉc.
8Abraham ni'c icupʉc Dios, ijayaumay cuandu iguiya̱s̈ pa ma nʉcs̈ jatu'c lugar jeme je' iguimo'ámpay. Mit je' pichin itʉcmayna̱s̈ maja igajawipaj jʉm inʉcs̈wa'n. 9Ni'c je' icupʉc Dios, tsʉ̱nau as̈am tu'c pe'ta̱may jayau en ayé na̱s̈ iguiprometia̱jtaway Dios, mit en ayé jayna̱s̈ je' itutsʉ̱nau mantialtʉcwájat, mit wename-ey itsʉ̱ngaj Isaac mit Jacob, mit je'jat ipʉctsougawey ayé promesa. 10Mit Abraham i-atsʉ̱nau ayé nʉ'jcopac tsajpni'cway jeme cacʉs̈pay, mit ayé nʉ'jcopac iforma̱t Dios.
11We'ney Sara ni'c cupʉc, Dios iguimajyiu pa i-íjtʉj iway, mit cani-ijtʉpate. Mit je' oyau ita'c mit ajchwayo'ganu. Jat we'n ni'c je' icupʉc ni'c Dios icumplia̱táj lo que iguiprometia̱jtaway. 12Mit we'ney Abraham na'wayo'ganu, po majawe'naj por je' pichin mayo'c familiajat as̈am ma̱jts tsajpni'cway, mit as̈am po'y lama̱t-auni'cway jeme nagamaycupa̱tipay.
13Mit nu'pʉjʉn je'jat icupʉjcau Dios hasta i-o'jcaj, mit igapʉctsougawu jaran lo que iguiprometia̱tcajaway Dios. Po i-is̈cau ni'c tomanu-ate pa iguipʉctsougawa'n ayé promesa mit icupʉjcau. Mit je'jat ijawigau ni'c catsʉ̱ngáj pa siempre en ayʉ̱́j mundu. 14Je'jat inʉmgau wename pa najáwiga ni'c iche'ngau jatu'c lugar más oyway tsajpni'c mam itangawa'n pa siempre. 15Ni'c igapensá̱tcaj en ayé lugar mam ipíchingaj, iguimoygapate tiempu pa ipitujcanuwa'n. 16Po je'jat iwangau tu'c lugar más oyway jeme itpay tsajpni'c. Jemni'c Dios nunca cawinchu̱gap pa iguiwayjatcʉs̈wa'n. Mit pa je'jat i-oyac tu'c nʉ'jcopac tsajpni'c.
17Abraham icupʉc mʉgʉc Dios cuandu iguiproba̱t, ni'c iguinajau ma ago'c iway Isaac mam isacrifica̱tca. Mit Abraham i-ago'gájate iway tu'gujyuway, mit jemé ayé Dios iguiprometia̱jtaway. 18Ni'c Dios ámbanu inʉjmau Abraham: “Por Isaac inaguepáj may familia.” 19Mit Abraham icupʉc ni'c Dios ijtʉu poder pa igui-acjutucta̱jcʉs̈wa'n o'guijcatway. Mit je' i-aguepate iway as̈am o'guicway, po imunʉcs̈nu-atu nijutuc.
20Mit Isaac ni'c icupʉc Dios, ibendiciona̱tcʉs̈ Jacob mit Esaú, mit inʉmgʉs̈au ni'c iguimingajáj cosa oyway. 21Jacob icupʉc Dios, ni'c cuandu tom pa i-o'cwa'n, je' ibendiciona̱tcʉs̈au inimechquij José iwajyat, mit i-adora̱t Dios tsactsowic iporto̱ni'c. 22José icupʉc Dios, ni'c cuandu tom pa i-o'cwa'n, i-anuncia̱t ni'c pichingáj Egiptojway na̱s̈ Israel ijayajwat, mit iyac orden ma munʉs̈caja je' ipajc cuandu ipichingawa'n, mit ma ni̱pca je' inʉ'jcopacni'c.
23Moisés ima̱m mit ite̱t icupʉjcau Dios, ni'c cuandu i-ijt Moisés, i-actsʉ̱ngau cuyu'tsic tu̱gup po' ni'c ayé rey i-ago'jcʉs̈p qui'chwájat. Ni'c ima̱m mit ite̱t i-is̈cau ni'c pichináj oy ayé qui'chwáy, mit igapʉ̱tcawu lo que imanda̱tway ayé rey. 24Mit Moisés icupʉc Dios, ni'c cuandu mʉjanu, igawanu ma iguiwayjatac rey Faraón iwayma̱m. 25Je' icupi̱u pa iguitunas̈wa'n mit Dios ijayajwat que inimojyʉwa'n gustu mit ayé ma̱jlat jeme cʉs̈ámpay. 26Je' ijawiu ni'c más oy iguitunas̈wa'n as̈am Cristu iguitunas̈, mit igawangʉs̈awu Egiptojatway iriquezajat. Ni'c je' isiguia̱jtau hasta iguipʉctsowa'n ayé premiu iguimo'ámpay Dios. 27Je' icupʉc Dios, jemni'c iguiyajc Egiptojway na̱s̈, mit igapʉ̱tu te awa'nip ayé rey. Je' imajmoy ayé peligru ni'c as̈am i-is̈way ayé Dios naga-e'pay.
28Moisés ni'c icupʉc Dios, iwatchu̱chiu ayé ma̱s̈ʉjw pascua, mit manda̱t ma s̈ics̈ca borregunipin tʉc-auni'jcat. Iwat we'n pa ayé ángel maga-ago'jcʉs̈a Israejlatway iprimer-wajyat. 29Ni'c icupʉjcau Dios, Israejlatway oyau iguinas̈ca ayé Mar Rojo as̈am tʉ'tsna̱s̈ni'c. Mit Egiptojatway iwangawey iguinas̈cawa'n ni-as̈amu, po jem inʉ-o'jcaj.
30Ni'c icupʉjcau Dios, i-apitucje̱jcau siete s̈ʉjwat ayé nʉ'jcopac Jericó, mit ca'u ayé barda itu-atujcaway ayé nʉ'jcopac. 31Ayé malto's̈ay Rahab ni'c icupʉc Dios, catogoyu as̈am ayé jayajwat igajayaumaygaway Dios, ni'c je' ipʉctsougʉs̈ oy ayé soldajat Israelway jeme mingaway espia̱tpay.
32¿Ti más tʉnʉmgʉs̈áj? Mayo'c tiempu tʉs̈pʉcwa'n te tʉnampi̱p de Gedeón, Barac, Sansón, Jefté, David, mit we'ney Samuel mit profetajat. 33Ni'c icupʉjcau Dios, ivencia̱tcau rejyat, i-arregla̱tcau oy nu'pʉjʉn asuntujat, Dios iguimajyigau as̈am iguiprometia̱tcajau, mit i-awatujcawey leojnat. 34Majatway jʉn-ádatsic iguigawatcajawu neti, icupo'jcau jeme iguitu-ago'jcámpayate espada, tsʉ̱ngau débil mit Dios iguimoygau maj, itcʉjʉu maj pa itsuguinwatcawa'n mit i-acpo'jcau soldajuc jatu'c lajatway. 35To's̈ajyat iguijutucta̱jcajau i-á̱nimajat.
Mit japu̱t jayajwat i-actunas̈cau hasta i-ago'jcau, mit je'jat oyapate inilibra̱tcʉjʉ te icuyaguigap Dios i-oyway to̱u, po je'jat más iwangau Dios igui-acjutucta̱jcáj pa itsʉ̱ngawa'n oy tsajpni'c. 36Mit una̱c iguitus̈i̱jcau maljayajwat mit iguiraunipʉ'ngau, mit hasta icutsumda̱jcau cuytujugum. 37Cʉjtu'c i-ago'jcawey mit tsa', cʉjtu'c itutsuctujcau sierra, itunas̈cau mayo'c, mit cʉjtu'c itu-ago'jcau espada. Je'jat yo'ytacyo'ygau, mit puru borregu-ác mit chi̱bu-ác ijamucjatcau. Je'jat tsʉ̱ngau pro̱wij, triste mit i-actunas̈cau may. 38Mit ayé maljayajwat ayʉ̱́j mundujway igamerecia̱tcap itsʉ̱ngawa'n mit Dios ijayajwat. Dios ijayajwat yo'ytacyo'ygau mam iga-it tʉjcat, copac-awa'tsajmat, mit inas̈cau s̈ʉjwat tsa'cʉtʉjmat mit mam i-ítcaj cʉtwájat copac-auni'cway. 39Mit nu'pʉjʉn Dios ijayajwat tsʉ̱ngau oyninʉmic ni'c icupʉjcau Dios, po igapʉctsougawu jaran lo que Dios iprometia̱tway. 40Ni'c Dios i-is̈ey tu'c cosa más oyway pa ʉjtsatey, pa we'n pareju napichingawa'n oy mit je'jat.
Currently Selected:
Hebreos 11: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
