Hebreos 10
10
1Moisés iley que's̈ as̈am tu'c amu̱jʉc ni'c ca-oyawu itan pa siempre, solo jat we'n pa najáwiga ni'c mi'náj cosa ojyatway. Mit ja-icotstʉgʉygajau Dios aníma̱tnipin cada s̈iwit, po ne ayé cosajat ca-oyawu iguipichingajap oy ayé jayajwat jeme adora̱tcaway jem. 2Igapíchijnate oy ayé cosajat, canesita̱tpate iguicotscajawa'n Dios aníma̱tnipin. Mit jeme tʉgʉygaway adora̱tpay, ma tsʉ̱ngate limpiu pa siempre, igajanijawigájate ni'c iwatcau mal. 3Po como icotscajau Dios aníma̱tnipin cada s̈iwit, ayé inʉmo'jcʉu ni'c inijawi-í̱jcau ayé mal iwatcaway, 4ni'c ayé tu̱runipin mit chi̱bunipin ca-oyap iguichi'tcaja jayajwat ima̱jlat.
5Jemni'c cuandu Cristu imijn en ayʉ̱́j mundu, icumplia̱t inʉmway Dios ilibruni'c, inʉm:
Ingawanu aníma̱tnipin ne ofrendajat,
po ʉ̱ is̈yac pa tʉjatwa'n jayau.
6Ingapʉctso̱wu aníma̱jtat is̈no'jcajaway,
ne ingapʉctso̱wu-ey jeme is̈cotscajaway pa jayajwat ima̱jlat.
7Cʉs̈ tʉnʉjmau: “Oh Dios, tʉmín pa tʉs̈watwa'n lo que mi̱ inwampay,
as̈am itsʉ̱na ja'yic inlibruni'c ti tʉnwatámpay.”
8Primeru inʉjmau Dios: Ingawangʉs̈u aníma̱tnipin, ofrenda, ne aníma̱t no'guicway jeme is̈cotscajaway pa jayajwat ima̱jlat. Nejʉmay de ayé cosajat is̈ca-acji'jcawu injo̱jt, mit ayé iwatcau ni'c we'n iguinʉjm ley. 9Mit cʉs̈ inʉjmau: “Oh Dios, tʉmín pa tʉs̈watwa'n lo que mi̱ inwampay.” Dios ichi't ayé ampay ley jeme iwajtʉ'cway, mit jinap iyac tu'c cosa namay pa ʉjtsat nawátca lo que je' iwampay. 10Mit jinap natsʉ̱ngap aparta̱tic pa Dios ni'c Jesucristu iwat lo que Dios iwanway, ni'c je' ni-entrega̱jtʉu tu'mbagu pa i-o'cwa'n pa nu'pʉjʉn jayajwat.
11Nu'pʉjʉn judíujat ipa̱nijat cada s̈ʉjw iyos̈wátcaj pa Dios mit iyajcau may veces nije'yu aníma̱tnipin, mit ayé nunca ca-oyawu iguichi'tcaja jayajwat ima̱jlat. 12Po Jesucristu tu'mbagu iguiyajc inipin pa iguitso'cwa'n nu'pʉjʉn mal nawatcaway, mit cʉs̈ nitsʉ̱nda̱jcʉu Dios i-oyimaycʉ'ni'c. 13Mit jem i-atsʉ̱náj hasta Dios iguivencia̱tcʉs̈wa'n imutsuguijnat. 14Mit como je' tu'mbagu iguiyajc inipin, i-acpichingʉs̈ oy pa siempre nu'pʉjʉn jeme i-aparta̱tcʉs̈way pa ije'. 15Mit Espíritu Santu nas̈actujawigap ni-as̈amu, ni'c inʉjmʉ'c Dios ilibruni'c:
16Ayʉ̱́j ayé nam acuerdu tʉnwatámpay mit je'jat yam una̱c s̈ʉjwat,
inʉm el Señor: Tʉnajque's̈cʉs̈áj tʉnley ma mutanga ijo̱tni'jcat,
mit imutangámpey icopacni'jcat.
17Mit siguia̱t iguinʉm:
Tʉnyijawiyo'tcʉs̈áj nu'pʉjʉn mal iwatcaway.
18Mit te Dios nas̈perdona̱tcajau nama̱jlat ni'c nacupʉjcau Cristu, cajanesita̱tp nas̈cójtsa Dios tanti as̈am iguinʉjm ayé ampay ley.
Na-aguepcap confianza pa nas̈cutomigawa'n Dios
19Hermanujat, jinap na-aguepcap confianza pa nas̈cutomigawa'n Dios en ayé lugar i-aparta̱tway pa ʉjtsat tsajpni'c, ni'c Cristu iyac inipin pa ʉjtsat. 20Natʉgʉygáj jem ni'c je' tʉgʉjyʉ'c mam i-ijt ayé cortina itu-atujcaway ayé lugar aparta̱ticway templuni'c, ayé inʉmo'jcʉp ni'c je' iyac ivida pa ʉjtsat. Mit oyau iguiyac tu'c nam to̱u pa nas̈cutomigawa'n Dios, mit jem nas̈moygáj vida cacʉs̈ámpay. 21Mit na-aguepcap Cristu tu'c meru mʉjpa̱nij, mit je' icuida̱tcʉs̈ap Dios ijayajwat. 22Jemni'c nacutómiga Dios mit nu'pʉjʉn najo̱jtat, nacupʉ́jca iyacs̈ta'cway nagadudá̱tca, mit je' nas̈limpia̱tcau pa nagajanijáwiga ma̱jlat, mit je' nas̈chi'tcajau nu'pʉjʉn mal nas̈mancha̱tcaway. 23Namutánga mʉgʉc lo que nacupʉjcapay ni'c na-atsʉ̱ngap Dios, mit nagatígatsca lo que nacupʉjcapay ni'c Dios icumplia̱táj lo que iprometia̱tway. 24Mit nanimájyigʉjʉ nanu'pʉjʉjnat mit nani-animá̱tcʉjʉ pa we'n naniwangʉjʉ̱́j más, mit nawátca oy. 25Nagatentánga nani-apʉcmujcʉjʉwa'n as̈am cʉjtu'c iguicuyáguiga, más oy nanitsáwigʉjʉ. Mit más nanitsawigʉjʉ̱́j ni'c tomo'ganu pa imi'nwa'n Jesús.
26Te na-is̈capcanup lo que iyacs̈ta'cway mit te nawatcap mal pa nas̈tu'mbajcuyaguigawa'n lo que nacupʉjcapay, Dios ca-oyap iguipʉctsou nejʉmay ofrendajat nacotscajámpay pa nama̱jlat. 27Jeme iwatcámpay wename, ma pʉ̱tca ni'c je'jat itp ti iguijuzga̱tcáj Dios, mit Dios icastiga̱tcʉs̈áj imutsuguijnat mit icomgʉs̈áj en tu'c jʉjn tinimpay mʉgʉc pa ma cʉs̈ca. 28Ni'c jeme igajayaumajyaway Moisés iley, triste i-o'jc te ijtʉu mechc o tu̱gup testigujat contra je'. 29Mit itunas̈cáj más mʉgʉc ni'c iyajcau menus Dios iway, mit ni'c inʉmgap ni'c cavalia̱tp ayé nam acuerdu iyacway Jesús cuandu i-o'jc cunu̱s̈ni'c, mit por ayé acuerdu je'jat tsʉ̱ngau aparta̱tic pa Dios. Mit itunas̈cáj ni'c itucotscawey ayé Espíritu Santu iyacpay favor. 30Najawigap ni'c el Señor Dios inʉm: “Ʉ̱ tʉncastiga̱táj mit tʉnactutso'gáj jeme iwatcapay mal.” Mit inʉmatu Dios ilibruni'c: “El Señor ijuzga̱tcʉs̈áj ijayajwat.” 31Jemni'c napʉ̱́tca nagaca'uga icʉ'jugum ayé Dios jeme tsʉ̱napay pa siempre.
32Po nijáwiga ayé tiempu nas̈way. Cuandu cʉs̈ is̈namcupʉ́jcaj Dios, inmajmoygau cuandu is̈tunás̈caj mʉgʉc. 33Iyacs̈ta'cway una̱c mijchat intunas̈cau mit is̈tucotscau jayau-awa'tsam. Mit ja-una̱c mijchat incotsmajyigau jeme itunas̈caway wename. 34Mit inayo̱wis̈cawey jeme tsʉ̱ngaway presu, mit ji'c injo̱jtat cuandu maljayajwat is̈chi'tcajau nu'pʉjʉn inaguepcaway, ni'c injawigap ni'c impʉctsougáj tu'c lugar más oyway mit más jegámpay tsajpni'c. 35Siguiá̱tca inconfia̱tcawa'n, ni'c we'n impʉctsougáj tu'c premiu más oyway. 36Jemni'c oy pi majmoyga mit calma, ni'c cʉs̈wa'n is̈watca lo que Dios iwampay, impʉctsougáj lo que je' iprometia̱tway. 37Inʉm Dios ilibruni'c:
Cajati pa imi'nwa'n el Señor,
ni'c je' itp ti imi'nwa'n, mit cajajegáj.
38Po tu'c jayau yacs̈icway tsʉ̱náj oy ni'c cupʉcp,
po te pitucp pa mugus̈á̱m tʉnga-e'po'jcʉ̱́j.
We'n iguinʉjm Dios.
39Po ʉjtsat nagawatcáj as̈am jeme pitujcapay pa itogoygawa'n, po ʉjtsat nacupʉjcáj mʉgʉc pa natsʉ̱ngawa'n salva̱tic.
Currently Selected:
Hebreos 10: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
