Popular Bible Verses from Hebreos 11

Share

Na-aguepcap seguru lo que na-atsʉ̱ngapay ni'c nacupʉjcap. Mit najawigap ni'c iyacs̈ta'cway ayé naga-e'pcapay, po nacupʉjcap. Mit ayé jayajwat ámbanuway tsʉ̱ngau oyninʉmic ni'c cupʉjcau.

Po jeme cacupʉcpay, ca-oyap igui-acji'jca Dios ijo̱jt. Ni'c jeme icutomiyámpay Dios, itp ti iguicupʉcwa'n ni'c itp Dios, mit ma cupʉguey ni'c Dios imoygʉs̈áj premiu jeme je' iguiche'ngapay.

Mit como nacupʉjcap, najawigap nat iguinʉjm Dios ma jat ayʉ̱́j mundu. Jemni'c nu'pʉjʉn cosa na-e'pcapay, ayé iwat Dios jeme jinap naga-e'pcapay.

Abraham ni'c icupʉc Dios, ijayaumay cuandu iguiya̱s̈ pa ma nʉcs̈ jatu'c lugar jeme je' iguimo'ámpay. Mit je' pichin itʉcmayna̱s̈ maja igajawipaj jʉm inʉcs̈wa'n. Ni'c je' icupʉc Dios, tsʉ̱nau as̈am tu'c pe'ta̱may jayau en ayé na̱s̈ iguiprometia̱jtaway Dios, mit en ayé jayna̱s̈ je' itutsʉ̱nau mantialtʉcwájat, mit wename-ey itsʉ̱ngaj Isaac mit Jacob, mit je'jat ipʉctsougawey ayé promesa.

Noé ni'c cupʉc, Dios igui-actujawiu jaran ayé peligru jeme jatámpay, mit ayé nunca canijatp. Mit je' pʉ̱jtʉgʉy mit chu̱chiu jaran iguiwat ayé barcu itunisalva̱jtʉway je' mit ifamilia. Ni'c je' cupʉc, i-actujawigʉs̈ jayajwat ni'c tsʉ̱ngáj condena̱tic ni'c iwatcau mal. Mit je' Dios iguipʉctso̱u ni'c icupʉc.

Enoc ni'c icupʉc Dios, Dios iguimunʉcs̈ nijutuc pa tsajpni'c mit je' ca-o'gu yam, mit nepʉn igajapa̱tu ni'c Dios iguimunʉcs̈ pa tsajpni'c. Ja'yic itsʉ̱na Dios ilibruni'c, antes inʉjcs̈ pa tsajpni'c je' i-acji'jcau Dios ijo̱jt.

Abel ni'c icupʉc Dios, icojtsau tu'c ofrenda más oyway, po jeme iyacway Caín, igapʉctso̱wu Dios. Mit Dios inʉm ni'c Abel tu'c jayau yacs̈icway ni'c ipʉctso̱u lo que iguiyajcaway. Mit Abel maja o'guigaj, najawigap ni'c icupʉc Dios.

We'ney Sara ni'c cupʉc, Dios iguimajyiu pa i-íjtʉj iway, mit cani-ijtʉpate. Mit je' oyau ita'c mit ajchwayo'ganu. Jat we'n ni'c je' icupʉc ni'c Dios icumplia̱táj lo que iguiprometia̱jtaway.

Mit Abraham i-atsʉ̱nau ayé nʉ'jcopac tsajpni'cway jeme cacʉs̈pay, mit ayé nʉ'jcopac iforma̱t Dios.

Mit Moisés icupʉc Dios, ni'c cuandu mʉjanu, igawanu ma iguiwayjatac rey Faraón iwayma̱m. Je' icupi̱u pa iguitunas̈wa'n mit Dios ijayajwat que inimojyʉwa'n gustu mit ayé ma̱jlat jeme cʉs̈ámpay. Je' ijawiu ni'c más oy iguitunas̈wa'n as̈am Cristu iguitunas̈, mit igawangʉs̈awu Egiptojatway iriquezajat. Ni'c je' isiguia̱jtau hasta iguipʉctsowa'n ayé premiu iguimo'ámpay Dios. Je' icupʉc Dios, jemni'c iguiyajc Egiptojway na̱s̈, mit igapʉ̱tu te awa'nip ayé rey. Je' imajmoy ayé peligru ni'c as̈am i-is̈way ayé Dios naga-e'pay.

Abraham icupʉc mʉgʉc Dios cuandu iguiproba̱t, ni'c iguinajau ma ago'c iway Isaac mam isacrifica̱tca. Mit Abraham i-ago'gájate iway tu'gujyuway, mit jemé ayé Dios iguiprometia̱jtaway.

Ayé malto's̈ay Rahab ni'c icupʉc Dios, catogoyu as̈am ayé jayajwat igajayaumaygaway Dios, ni'c je' ipʉctsougʉs̈ oy ayé soldajat Israelway jeme mingaway espia̱tpay.

Ni'c icupʉjcau Dios, Israejlatway oyau iguinas̈ca ayé Mar Rojo as̈am tʉ'tsna̱s̈ni'c. Mit Egiptojatway iwangawey iguinas̈cawa'n ni-as̈amu, po jem inʉ-o'jcaj.

Ni'c icupʉjcau Dios, i-apitucje̱jcau siete s̈ʉjwat ayé nʉ'jcopac Jericó, mit ca'u ayé barda itu-atujcaway ayé nʉ'jcopac.

Moisés ni'c icupʉc Dios, iwatchu̱chiu ayé ma̱s̈ʉjw pascua, mit manda̱t ma s̈ics̈ca borregunipin tʉc-auni'jcat. Iwat we'n pa ayé ángel maga-ago'jcʉs̈a Israejlatway iprimer-wajyat.

José icupʉc Dios, ni'c cuandu tom pa i-o'cwa'n, i-anuncia̱t ni'c pichingáj Egiptojway na̱s̈ Israel ijayajwat, mit iyac orden ma munʉs̈caja je' ipajc cuandu ipichingawa'n, mit ma ni̱pca je' inʉ'jcopacni'c.

Jacob icupʉc Dios, ni'c cuandu tom pa i-o'cwa'n, je' ibendiciona̱tcʉs̈au inimechquij José iwajyat, mit i-adora̱t Dios tsactsowic iporto̱ni'c.

Mit Isaac ni'c icupʉc Dios, ibendiciona̱tcʉs̈ Jacob mit Esaú, mit inʉmgʉs̈au ni'c iguimingajáj cosa oyway.