Hebreos 9
9
Ayé lugar na̱s̈ni'cway mit ayé lugar tsajpni'cway
1Mit ayé acuerdu iwajtʉ'cway Dios iyac orden nat iguiservia̱tcajawa'n Dios, mit iwatcau tu'c tʉjc yam na̱s̈ni'c mam iguiservia̱tcajawa'n. 2Mit ayé tʉjc mam iserviá̱tcaj pa̱nijat, yename itsʉ̱naj: Primer cuartu aparta̱tic pa pa̱nijat mam iguiservia̱tcajawa'n Dios, mit jem i-ijt ta'cs̈anyagan, me̱s̈a mit me̱s̈ayucuinm jem itsʉ̱naj ayé ma̱s̈anʉ̱n jeme Dios ibendiciona̱tway. 3Mit en ayé nije'yu tʉjc it tu'c cortina i-atucpay ayé lugar más aparta̱ticway pa Dios. 4Mit en ayé lugar más aparta̱ticway it tu'c me̱s̈a mam itsʉ̱naj tu'c po̱mwi's̈an watic de oro, mit jemey i-ijt ayé cas̈u̱n adorna̱tic mit oro nu'pʉjʉn laj, mit jemey i-ijt ayé acuerdu jeme Dios iyacway. Mit ayé cas̈u̱n ijtʉu tu'c s̈uy watic de oro, mit ayé s̈uy ijtʉu tu'c cayan inʉ'jyway maná. Mit en ayé cas̈u̱n ijtʉwey Aarón ivara jeme ayawiway. Mit jemey i-ijt ayé tsa'jat lapsijcatway mam iguija'jy Moisés iley, mit jemé ayé ampay acuerdu iwatway Dios. 5Mit cas̈u̱nyucuinm tenagau figurajat as̈am ángejlat, mit ayé inʉmo'jcʉu ni'c jem itsʉ̱naj Dios. Mit ayé figurajat icutucmo'ngau mit ique̱gajnat ayé lugar mam mʉjpa̱nij iguiyajc aníma̱tnipin. Mit ayé cosajat tʉngawamp tʉs̈acyagachiwa'n más.
6Cuandu cʉs̈ igui-oyájcaj nu'pʉjʉn ayé cosajat, tʉgʉyí̱jcau pa̱nijat en ayé primer cuartu pa iguicumplia̱tcawa'n iyos̈at. 7Po en jatu'cway cuartu jeme más aparta̱ticway solo tʉgʉy meru mʉjpa̱nij tu'c viaje cada s̈iwit, mit it ti iguimutʉgʉjy aníma̱tnipin, mit ayé icojtsau Dios pa nu'pʉjʉn mal iwatway je', mit we'ney pa nu'pʉjʉn mal iwatcaway nʉ'jcopac jayajwat. 8Mit Espíritu Santu nas̈actujawigap ni'c cuandu i-ijt ayé primer acuerdu, ʉjtsat ca-oyapate nas̈cutomiga Dios. 9Mit ayé tu'c ejemplu pa ʉjtsat. Ni'c pa̱nijat iyajcau ofrendajat mit aníma̱tnipin, po ca-oyawu ipíchinga oy jeme adora̱tcaway jem, ni'c siempre ijawigau ni'c catsʉ̱ngawu limpiu ijo̱jtat. 10Solo itcʉjʉu orden pa iguicumplia̱tcawa'n ayé ampay costumbrejat, ti icaygámpay, ti i-u̱jcámpay, mit nat inilimpia̱tcʉjʉwa'n. Mit it ti iguiwátcaj we'n hasta Dios iguitigajts ayé cosajat pa ma it nam acuerdu.
11Jinap Cristu min pa itanwa'n mʉjpa̱nij mit pa ma it cosa más ojyatway pa ʉjtsat. Ni'c je' tʉgʉy en ayé lugar más mʉjninʉmicway mit más oyway, mit ayé lugar caje' cʉ'waticway ni'c tsʉ̱nap tsajpni'c. 12Mit cuandu Cristu itʉgʉjy en ayé lugar aparta̱ticway pa Dios, igamutʉgʉyu chi̱bunipin ne becerrunipin. Je' tu'mbagu itʉgʉjy mit je'yu inipin ni'c je' o'c pa ʉjtsat, mit wename nas̈salva̱tcau pa siempre. 13Ambanu te tu'c jayau itsʉc tu'c cosa ma̱lway, je' tan mancha̱tic, mit is̈ics̈cu'tcajau tu̱runipin, chi̱bunipin mit tu'c becerra no'guicway ipo't. Mit wename oyau iguilimpia̱tca tu'c jayau jeme mancha̱ticway. 14Te wename iguiwátcaj ámbanu, jinap más oy Cristu inipin. Je' nicotstʉgʉjyʉu mit Dios mit je' ca-ijtʉwu mancha, mit como je' tsʉ̱nap pa siempre, jemni'c je' más oyap is̈chi'tcajap nu'pʉjʉn mal inwatcaway, pa we'n inservia̱tcajáj ayé Dios jeme tsʉ̱napay pa siempre.
15Mit Cristu i-oyac tu'c namay acuerdu pa jayajwat ma tsʉ̱nga oy mit Dios. Mit je' o'c pa iguitso̱jcʉs̈awa'n jayajwat ima̱jlat, ni'c ca-oyawu iguijayaumayga ayé ampay acuerdu ijtʉ'cway. Po jinap ipʉctsougáj ayé vida cacʉs̈ámpay jeme iya̱s̈cʉs̈way Dios, ni'c we'n iguiprometia̱jt. 16Te tu'c jayau iwatp tu'c acuerdu pa iguitumuyacwa'n jatu'c jayau ibiejnat, itp ti i-o'jcʉ'cwa'n ayé jayau jeme iwatway ayé acuerdu. 17Ni'c hasta i-o'cwa'n ayé jayau oyájama i-ijtʉ valor ayé acuerdu. Po te cani-o'cp ayé jayau ca-ijtʉp valor ayé acuerdu. 18Mit jemni'c cuandu Dios igui-acchu̱chij ayé primer acuerdu, it ti igui-ago'jcaj aníma̱jtat. 19Ni'c Moisés inʉmgʉs̈au jayajwat ma jawiga nu'pʉjʉn mandamientu itway leyni'c. Mit cʉs̈ iguinʉjm we'n, ipʉc becerrunipin, chi̱bunipin, mit imot mit nʉ'. Mit ipʉguey borregupʉjc jinicway tsabats mit tu'c ma'jts inʉ'jyway hisopo, mit is̈ics̈cu'jtau ayé acuerdu ja'yicway, mit is̈ics̈cʉs̈awey nu'pʉjʉn nʉ'jcopac jayau. 20Inʉm Moisés: “Ayʉ̱́j nipin inʉmo'jcʉp tu'c acuerdu imanda̱t Dios pi watca.” 21Mit is̈ics̈awey nipin ayé tʉjc, mit we'ney nu'pʉjʉn cosajat i-ocupa̱tcaway jem mam pa̱nijat iyos̈wátcaj. 22Mit ayé ley inʉm ni'c ayé nipin ma tulimpia̱tca casi nu'pʉjʉn cosajat. Ni'c te capujʉ'cp nipin, Dios ca-oyap iguichi'tcʉs̈a jayajwat ima̱jlat.
Cristu oyap nas̈chi'tcajap nama̱jlat
23Ayé nipin iyajcaway ámbanu itulimpia̱tcau nu'pʉjʉn cosajat, po ayé solo imu-e'p lo que Dios iwatway pájtsat tsajpni'c, ni'c je' jinap nas̈limpia̱tcau iyacs̈ta'cway, mit nas̈tulimpia̱tcau tu'c nipin más oyway iyacway Cristu. 24Ni'c Cristu catʉgʉyu en tu'c lugar aparta̱ticway jeme jayajwat iwatcaway, ni'c ayé lugar na̱s̈ni'cway solo imu-e'p ayé lugar tsajpni'cway mam Dios itsʉ̱na. Po je' tʉgʉy meru tsajpni'c pa inipresenta̱jtʉwa'n mit Dios pájtsat nas̈cowangáj. 25Mit Jesús igayagu inipin may veces. Igawatu as̈am ayé judíujat imʉjpa̱nijat, ni'c ayé mʉjpa̱nij tʉgʉy en ayé lugar aparta̱ticway pa Dios cada s̈iwit, mit imutʉgʉy jaynipin. 26Ma watate we'n Jesús itájate ti iguitunas̈wa'n may veces desde ichu̱chij ayʉ̱́j mundu. Po Dios iyac tu'c tiempu pa imi'nwa'n Cristu, mit je' oy tu'mbagu pa ini-entrega̱jtʉwa'n pa nas̈chi'tcajáj nama̱jlat. 27Nʉmic itsʉ̱na ni'c jayajwat o'jcáj tu'mbagu, mit cʉs̈wa'n Dios ijuzga̱tcʉs̈áj as̈amu iguiwatca. 28Mit we'ney Cristu ni-entrega̱jtʉu tu'mbagu pa iguichi'tcʉs̈awa'n jayajwat ima̱jlat. Mit mi'nájatu, po cajaje' pa iguitso̱jcʉs̈awa'n jayajwat ima̱jlat. Je' mi'náj pa iguisalva̱tcʉs̈wa'n ijayajwat jeme igui-atsʉ̱ngapay.
Currently Selected:
Hebreos 9: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
