Colosenses 3
3
1Mijchat mitsʉ̱ngap as̈am mijutucta̱jcaway mit Cristu. Jinap che'nga lo que Dios is̈acmingajapay mam Cristu itsʉ̱na i-oyimaycʉ'ni'c Dios. 2Pensa̱tí̱jca ayé cosajat is̈acmingajapay Dios, mit campensa̱to'jca mit ayé cosajat itpay en ayʉ̱́j mundu. 3Mitsʉ̱ngap as̈am o'guic ni'c ingajawatcap cuenta mal cosajat, mit jinap inaguepcap nam vida ni'c inmutʉgʉygau Cristu, mit Dios is̈cuida̱tcap. 4Mit Cristu ayé nas̈moygapay vida, mit cuandu je' ique's̈ta'cwa'n, naque's̈ta̱jcámpey mit je' tsajpni'c mam i-oymánagui.
Na-ampay vida mit nanam vida
5Nijawiyo'tca nu'pʉjʉn mal iyo'tpay injo̱jtat yam, inchajyo'ygawa'n, is̈watcawa'n mal, is̈wangawa'n mʉgʉc mal cosajat, is̈wangawa'n jayje'. Ni'c jeme iwangapay mʉgʉc jayje' ayé imu-e'p as̈am tiyu̱s̈wampajyat ni'c iyajcap menus Dios. 6Jemni'c Dios icastiga̱tcʉs̈áj jeme cajayaumaygapay, ni'c iwatcap ayé mal cosajat. 7Mijchat wename-ey inyo'ygaj ámbanu, ni'c inwatcawey ayé mal cosajat. 8Po jinap cuyáguiga ayʉ̱́j: Cam-awa'niga, camjoranda̱jca, camwatca mal, camtucotsca nepʉn, camtʉ'tscotscayu. 9Camjaniwe̱tcʉjʉ mijchatu ni'c incuyaguigaway ayé ampay vida inaguepcaway ámbanu, ni'c ámbanu inwatcau puru mal. 10Mit jinap inaguepcap nam vida, ni'c Dios is̈namwatcau pa pi jatca as̈am je', pa we'n inis̈capcáj más Dios. 11Dios niwe'nu igui-e'pcʉs̈ nu'pʉjʉn jayajwat, judíujat mit jeme caje'jatway judíujat, marcá̱tijcatway mit camarcá̱tijcatway, pe'tá̱majyat mit jeme iga-is̈capcapay neti, mozojat mit jeme yo'ygapay libre, ni'c Cristu ayé i-actampay nu'pʉjʉn.
12Dios is̈wangap mit is̈cupiugau pa is̈je'jatcáj. Jinap wátca ayʉ̱́j: Jayaumáyga nu'pʉjʉn is̈nʉmgajapay Dios, ayo̱wís̈ca, jayawánga, camnimʉjninʉ́mgʉjʉ mit aguépca calma. 13Nimajmóygʉjʉ mit niperdoná̱tcʉjʉ te miniche'jcʉjʉp. As̈am Cristu is̈perdona̱tcau, wename-ey mijchat wátca. 14De nu'pʉjʉn cosajat, más oy pi niwangʉjʉ, ni'c ayé nas̈acjatcap as̈am tu'jcatu. 15Mit ma tsʉ̱na injo̱tni'jcat ayé paz is̈moygapay Dios, ni'c Dios is̈ya̱s̈cau pi tsʉ̱́nga as̈am tu'jcatu, mit tsʉ̱́nga agradecidu.
16Nu'pʉjʉn is̈nʉmgajaway Cristu ma tan injo̱tni'jcat. Ajque's̈ca mit tsáwiga minu'pʉjʉjnat ni'c Dios is̈actujawigap nu'pʉjʉn. Ʉuga salmu mit himnujat, mit ʉ́ugaja el Señor, mit ʉ́uga jeme Espíritu Santu is̈moygámpay, mit tsʉ̱́nga agradecidu. 17Nu'pʉjʉn inyʉmgámpay o inwatcámpay, watca nu'pʉjʉn ni'c injayaumaygap el Señor Jesús, mit nʉmgaja Dios Nate̱jat ni'ctiyu̱s̈ ni'c inmutʉgʉygau Jesús.
Lo que iwatcámpay cupʉcpajyat
18To's̈ajyat ma jayaumayga ina'jwat ni'c je'jat icupʉjcap el Señor. 19Jayajwat ma wanga ito's̈ajyat mit magamu-awa'niga. 20Nu'pʉjʉn ya̱wájat ma jayaumayga iguimanda̱tcáj ima̱jmat mit ite̱jtat, ni'c ayé igui-acji'jcap ijo̱jt el Señor. 21Jayajwat maga-ac-awa'niga iwajyat, ni'c oyap inidesanimá̱tcʉjʉ. 22Mozojat, jayaumáyga injaycat mit tiyu is̈nʉmgajámpay yam. Yos̈wátca caje'yu cuandu is̈-e'pcáj, caje' as̈am iwangapay itangawa'n oy mit ijaycat, po mijchat yos̈wátca oy mit nu'pʉjʉn injo̱jtat ni'c impʉ̱tcap Dios. 23Mit nu'pʉjʉn inwatcámpay pi watca mit nu'pʉjʉn injo̱jtat ni'c inservia̱tcajap el Señor, mit caje' jayajwat. 24Injawigap ni'c Cristu el Señor is̈moygáj ayé recompensa itpay tsajpni'c, ni'c inservia̱tcajap je'. 25Po jeme iwatpay mal, Dios igui-actutso'gáj por ayé mal iwatway, ni'c Dios niwe'nu igui-e'pcʉs̈ nu'pʉjʉn jayajwat.
Currently Selected:
Colosenses 3: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
