Colosenses 2
2
1Tʉnwamp pi jawiga ni'c tʉlucha̱tp mʉgʉc pa mijchat, mit pa jeme tsʉ̱ngapay nʉ'jcopac Laodicea, mit tʉlucha̱tpey pa nu'pʉjʉn hermanujat jeme tʉs̈cani-e'pcapay. 2Tʉnwamp ma ni-anima̱tcʉjʉ mit ma niwangʉjʉ pareju. Mit tʉnwampey ma entendia̱tca oy lo que icupʉjcapay, pa we'n tsʉ̱ngáj mʉgʉc mit Dios, mit we'n Dios nas̈actujawigáj ni'c nacupʉ́jca Cristu. 3Mit como namutʉgʉygau Cristu, najawigap nu'pʉjʉn cosa oyway mit na-is̈capcap nu'pʉjʉn. 4Tʉnʉmgʉs̈ap we'n ma is̈cawe̱jta̱jcac nepʉn, ni'c cʉjtu'c jayajwat iwangap is̈mucotscáj oymanac pa is̈we̱tcáj. 5Ʉ̱ tʉgatsʉ̱nap mit mijchat, po siempre tʉpensa̱tp por mijchat, mit ji'cp tʉnjo̱jt cuandu tʉs̈jawi ni'c mitsʉ̱ngap de acuerdu, mit incupʉjcap mʉgʉc Cristu.
6Jinap como impʉctsougau el Señor Jesucristu, yo'yga mit je'. 7Tánga mʉgʉc mit Cristu, mit cupʉjca mʉgʉc as̈am is̈ajque's̈cajau, mit nʉmí̱jcaja Dios ni'ctiyu̱s̈.
Natsʉ̱ngap nu'tsic mit Cristu
8Nicuida̱tcʉjʉ ma is̈cawe̱jta̱jcac jeme inʉmgapay ni'c i-is̈capo'jcap, ni'c ayé we̱jtat caservia̱tp. Je'jat i-ajque's̈cap as̈am iguipʉctánga mit jayajwat, mit i-ajque's̈cap puru ampay creenciajat itpay en ayʉ̱́j mundu, mit iga-ajque's̈cap lo que Cristu inʉmway.
9Ni'c Cristu nije'yu Dios, mit Cristu jat jayau, mit jinap je' ijtʉp nu'pʉjʉn poder as̈amu Dios. 10Mit como namutʉgʉygau Cristu, jinap Dios nas̈moygap nu'tsic nu'pʉjʉn cosajat, mit je' i-actambʉ'mp nu'pʉjʉn ángejlat jeme manda̱tcapay mit jeme itcʉjʉpay poder. 11Mit mijchat mitsʉ̱ngap as̈am marca̱ticway injo̱tni'jcat, mit caje' as̈am judíujat iguimarcá̱tca icuerpujat. Ayé inʉmo'jcʉp ni'c incuyaguigaway ayé mal iyo'tway injo̱jtat, mit jinap Cristu tsʉ̱nap injo̱tni'jcat. 12Cuandu naninʉ'gutémgʉjʉj, natsʉ̱ngau as̈am ni'pic mit Cristu, mit jinap na-aguepcap nam vida as̈am najutucta̱jcaway mit je'. Jat we'n ni'c nacupʉjcau ni'c Dios ijtʉp poder ni'c i-acjutucta̱c Cristu mam itsʉ̱nga á̱nimajat. 13Mijchat ámbanu mitsʉ̱ngau as̈am o'guijcatway ni'c inwatcau mayo'c ma̱jlat, migatsʉ̱ngawu marca̱tic as̈am judíujat iguiwatca, jemni'c inga-aguepcapate parte mit Dios, po jinap Dios is̈moygau vida ni'c inmutʉgʉygau Cristu, mit is̈perdona̱tcajau nu'pʉjʉn ma̱jlat inwatcaway. 14Mit i-actogoyda̱c ayé ampay ley jeme nas̈culpa̱tcaway, ni'c ayé nas̈condena̱tcapate ni'c ca-oyawu nas̈cumplia̱tca. Mit Cristu i-actogoyda̱c ayé nas̈culpa̱tcapayate cuandu i-o'jc cunu̱s̈ni'c. 15Mit Cristu ichi'tcʉs̈au ipoder mal espíritujat jeme manda̱tcapay, mit je' i-actujawigʉs̈ nu'pʉjʉn jayajwat ni'c ca-itcʉjʉwu maj ayé mal espíritujat, mit ivencia̱tcʉs̈ cuandu i-o'jc cunu̱s̈ni'c.
Che'nga jeme tsajpni'cway
16Nepʉn ma is̈camalninʉmgac te micaygap o te mi-u̱jcap, te ingaguarda̱tcap ma̱s̈ʉjwat, te ingatsougap ma̱s̈ʉjw cada po' ne po'cs̈ans̈ʉjwat. 17Ni'c ayé ampay costumbrejat as̈am tu'c amu̱jʉc inas̈, po ayé solo nas̈actujawigau ti jatámpay, mit como minway Cristu, jinap je'yu nacupʉjcap. 18Cammoyga laj is̈chi'tcajáj premiu impʉctsougámpay, ni'c cʉjtu'c ayé jayajwat niwatcʉjʉp as̈am humilde, mit i-adora̱tcap ángejlat, itunitʉgʉygʉjʉp jeme igani-e'pcapay, nimʉjninʉmgʉjʉp may jalmanu, as̈am je'jatu ipensá̱tca. 19Mit ayé jayajwat igamutʉgʉygap mʉgʉc Cristu, ni'c ayé cupʉcpajyat jeme Cristu i-actangʉs̈pay ayé as̈am icuerpu mit imoygʉs̈p maj pa ma tsʉ̱nga en acuerdu, mit nimajyigʉjʉp as̈am Dios iguiwa'n.
20Mitsʉ̱ngap as̈am o'guic mit Cristu ni'c incuyaguigaway ampay creenciajat itpay en ayʉ̱́j mundu, mit jinap ¿tini'c miyo'ygapnaj as̈am jayajwat ayʉ̱́j mundujway? mit ¿tini'c is̈jayaumáyga lo que is̈nʉmgajapay? 21Is̈nʉmgajap: “Camactánga neti, camcayga ayé, ne camtsʉjca neti. We'n is̈nʉmgajap ayé jayajwat.” 22Nu'pʉjʉn je'jat is̈nʉmgajapay ayé jalmanu ni'c itp ti icʉs̈cawa'n ayé cosajat. Ni'c ayé ama̱s̈an is̈ajque's̈cajapay, je'jatu i-acchu̱chigau. 23Nu'pʉjʉn je'jat iwatcapay que's̈pate oymanac, ni'c adora̱tcap as̈amu iguiwanga, niwatcʉjʉp as̈am humilde, hasta ipas̈cap icuerpujat. Po nes̈ʉ̱n caservia̱tp ayé cosajat ni'c cʉs̈wa'n iwangapatu ayé mal iyo'tpay ijo̱jtat.
Currently Selected:
Colosenses 2: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
