Hechos 19
19
Pablo coy Efeso
1Mit mientras Apolos itsʉ̱naj Corinto, Pablo nʉcs̈ ta'nam copac-awa'tsajmat hasta icojy nʉ'jcopac Efeso. Mit imunipa̱tcʉs̈ʉu jem una̱c cupʉcpajyat. 2Pablo i-ucyo'tcʉs̈:
—¿Impʉctsougau Espíritu Santu cuandu incupʉ́jcaj?
Mit iguipo'ngau:
—Nes̈ʉ̱n tʉnganimaraugap te itp Espíritu Santu.
3Mit cʉs̈ Pablo i-ucyo'tcʉs̈:
—¿Nat inyinʉ'gutémgʉjʉj?
Mit iguipo'ngau:
—Tʉninʉ'gutemgʉjʉu as̈am Juan igui-ajque's̈.
4Mit Pablo inʉmgʉs̈au:
—Juan inʉ'gutemgʉs̈ jayajwat pa ma jawiga nu'pʉjʉjnat ni'c icuyaguigaway ima̱lway to̱jwat, mit inʉmgʉs̈au jayajwat ma cupʉjca ayé jayau jeme iguinatspoguiyámpay. Ayé inʉmo'jcʉp Jesús, ayé Cristu i-ajyu'tway Dios.
5Iguimáraugaj we'n, ninʉ'gutemgʉjʉu ni'c ipʉctsougau el Señor Jesús. 6Mit Pablo iguiyajcʉ́s̈aj icʉ'jat iyucuinmat, Dios imoygʉs̈ Espíritu Santu, mit cotscau en jatu'c ajwat, mit inʉmgau lo que Dios igui-actunʉmgaway. 7Mit nu'pʉjʉn je'jat como doce jayajwat.
8Tu̱gup po' Pablo nʉs̈í̱c mam judíujat i-adora̱tca. Mit je' capʉ̱tu icotswa'n. Imucotscʉs̈ mit inʉmgʉs̈au ma cupʉjca ni'c manda̱táj Dios. 9Mit copacmʉgʉcwatcau una̱c mit igawangawu cupʉjca, mit imalninʉmgau ayé oyway noticia mam iguimárauga jayajwat. Cʉs̈ Pablo ni-aparta̱jtʉu mam je'jat mit imunʉs̈cʉs̈ cupʉcpajyat, mit cada s̈ʉjw iguimucotscʉs̈ en tu'c escuela mam i-ajque's̈ tu'c jayau inʉ'jyway Tiranno. 10Mit wename iguiwajt pa mechc s̈iwit hasta iguimáraugaja el Señor Jesús ipalabra nu'pʉjʉn judíujat jeme tsʉ̱ngaway Asiajway na̱s̈, mit we'ney jeme caje'jatway judíujat. 11Mit Dios i-actuwat Pablo milagru majatway. 12Mit ayé pa̱yujat mit jamujcat jeme Pablo itsʉjcʉs̈way itsapcu'tcajau iyucuinmat tu'nijatway, mit oytangau jaran, mit demo̱nyujat pichingau mam je'jat.
13Mit una̱c judíujat jeme yo'ytacyo'ygaway oyau igui-acpichinga demo̱nyujat, mit iwangau iguinʉ'jutcajawa'ney el Señor Jesús inʉ'jy pa iguitu-acpichingawa'n demo̱nyujat. Mit cada jayau inʉmgajau demo̱nyujat:
—Ʉ̱ tʉmanda̱tcʉs̈p pi pichinga inʉ'jyni'c ayé Jesús jeme Pablo inʉmdacyo'ypay.
14Mit it tu'c jayau judíu mit je' mʉjpa̱nij mam judíujat itsʉ̱nga, mit inʉ'jy Esceva. Je' ijtʉu siete iwayna'jat, mit je'jat i-acpichingapey demo̱nyujat. 15Po cuandu iguiwátcaj we'n, cotsta̱c ayé demo̱nyu, inʉm:
—Tʉnis̈cap Jesús, mit tʉnis̈cap pʉn ayé Pablo, po mijchat tʉga-is̈capcʉs̈p.
16Mit ayé jayau jeme ijtʉway demo̱nyu itutsutcʉs̈ mit más ijtʉu maj que je'jat, idomina̱tcʉs̈ mit imuquitaugʉs̈ hasta po'jcau de ayé tʉjc sin jamuc mit bien golpia̱tijcat. 17Mit nu'pʉjʉn judíujat jeme tsʉ̱ngaway Efeso mit we'ney jeme caje'jatway judíujat ijawigau nat iguijatcau, mit nu'pʉjʉn ni-apʉ̱tigʉjʉu, mit i-oyninʉmgau el Señor Jesús.
18Mit mayo'c jeme cupʉjcaway mingau, mit inʉmgau nu'pʉjʉn mal iwatcaway. 19Mit we'ney mayo'c jayajwat jeme ipʉctangaway tso'c imumingau ilibrujat mit ino'ctiningau mam igui-e'pcaj nu'pʉjʉn jayajwat. Mit i-acpichingau cuenta pʉjʉn itsou ayé librujat, mit ipa̱tcajau itsou como cinquenta mil tumi̱n de plata. 20Mit we'ney más inʉmdacyo'ygajau el Señor ipalabra, mit ijtʉu poder, mit cupʉjcau más jayajwat.
21Mit cʉs̈ Pablo pensa̱t inʉs̈wa'n pa Macedoniajway na̱s̈ mit Acayajway na̱s̈, mit cʉs̈ pensa̱tey pa inʉs̈wa'n Jerusalén. Inʉm Pablo: Cʉs̈wa'n tʉs̈tuyo'y jem, itpey ti tʉnʉs̈wa'n pa Roma. 22I-acnʉs̈cʉs̈ pa Macedoniajway na̱s̈ Timoteo mit Erasto jeme iguimajyigaway, mit je' tan pa tu'c tiempu Asiajway na̱s̈.
Iwatcau tu'c ya's̈na̱s̈ en Efeso
23Mit wejpu'n iwatcau tu'c ya's̈na̱s̈ mʉjo'cway ni'c imutsuguinwatcau jeme icupʉjcaway Jesús i-oyway noticia. 24I-acchu̱chiu tsuguin tu'c plateru inʉ'jyway Demetrio. Je' iwat tiyu̱s̈tʉcwájat de plata pa tu'c tiyu̱s̈ inʉ'jyway Diana, mit jeme iguimuyos̈watcaway i-actsʉ̱ngau may tumi̱n. 25Mit Demetrio i-apʉcmujcau nu'pʉjʉn jayajwat jeme ijatcaway nije'yu yos̈, mit inʉmgʉs̈au:
—Jayajwat, injawigap ni'c natu-actsʉ̱ngap may tumi̱n ayʉ̱́j yos̈, 26mit in-e'pcap lo que iwatpay Pablo, mit inmaraugap ni'c je' inʉmp ni'c caje' diosat ayé tiyu̱s̈at jeme cʉ'wátijcatway, mit i-actugupʉjcʉs̈p we'n may jayajwat, caje' solo Efesojatway po we'ney casi nu'pʉjʉn Asiajatway. 27Mit oyap nas̈cʉs̈cajap nayos̈at, mit we'ney igajawangajáj itemplu ayé tiyu̱s̈ Diana jeme más mʉjninʉmicway, mit igaja-oyninʉmgáj ayé Diana jeme i-adora̱tcapay nu'pʉjʉn Asiajatway, mit nu'pʉjʉn mundu.
28Iguimáraugaj we'n, awa'nigau jaran, mit cʉs̈ ya̱s̈cau, inʉmgau:
—¡Mʉjninʉmic ayé Diana pa Efesojatway!
29Mit nʉ'jcopac jayajwat igajawigawu ti iwatcámpay. Mit i-actangau mechc Macedoniajway jayajwat, Gayo mit Aristarco, mit je'jat Pablo icumpajlat. Mit imunʉs̈cau jaran pa mam iguiwatca asamblea. 30Mit Pablo iwan inʉs̈wa'n mam itsʉ̱nga apʉcmúguijcat, po cupʉcpajyat igamoygawu laj ma nʉs̈. 31Mit Pablo ijtʉu una̱c amigujat, mit je'jat autoridajat Asiajway na̱s̈. Je'jat i-ajyu'tcau razón Pablo magatʉgʉy mam itsʉ̱nga apʉcmúguijcat. 32Mit ya̱s̈cada̱jcau. Una̱c inʉmgau tu'c cosa mit ja-una̱c inʉmgau jatu'c cosa, mit igajawigawu ti iwatcáj. Mit mayo'c je'jat igajawigawu tini'c ini-apʉcmújcʉjʉj. 33Mit una̱c jayajwat i-actujawigau Alejandro ti jatway, mit judíujat iwangau je' ma cots pa je'jat, mit i-acnʉs̈cau pa mam icótscaj. Wejpu'n Alejandro iwat seña mit icʉ' pa magacotsca, iwanate iguicowangʉs̈wa'n judíujat. 34Po cuandu iguijáwigaj ni'c je' judíu, ya̱s̈pʉ'ngau nu'pʉjʉjnat como mechc hora, mit inʉmgau:
—¡Mʉjninʉmic ayé Diana pa Efesojatway!
35Mit cʉs̈ nitenda̱jcʉu ayé ja'ypay en ayé nʉ'jcopac, igaja-ajcotscʉs̈ujyu mit inʉmgʉs̈au:
—Jayajwat Efesojatway, nu'pʉjʉn jayajwat ijawigap ni'c ayʉ̱́j nʉ'jcopac Efeso iguarda̱tcajap itemplu ayé tiyu̱s̈ Diana jeme mʉjninʉmicway jeme ca'way tsajpni'c. 36Como nepʉn ca-oyap iguinʉm ni'c caje' iyacs̈ta'cway, más oy pigajacotscawit, mit camwatcada̱jca neti te migapensa̱tcap oy. 37Inmumingau ayʉ̱́j jayajwat, mit iganiwatcap mal intempluni'jcat, ne iganitucotscap intiyu̱s̈at Diana. 38Te Demetrio mit jeme iguimuyos̈watcapay itcʉjʉp ti i-arregla̱tcámpay, jemni'c i-it yos̈tʉjc mit autoridajat pa igui-arregla̱tcawa'n i-asuntujat. 39Mit te inwangap jatu'c cosa, autoridajat ma watca tu'c asamblea iyacs̈ta'cway pa is̈-arregla̱tcawa'n in-asuntujat. 40Jinap natsʉ̱ngap en peligru. Oyap nas̈acusa̱tcap ni'c nawangap tsuguin ni'c nawatcau ayʉ̱́j ya's̈na̱s̈, ni'c ca-oyap nas̈nʉmga tini'c nani-apʉcmújcʉjʉj.
41Iguinʉmgʉ́s̈aj we'n, iacnʉs̈cʉs̈ ayé jayaujuc.
Currently Selected:
Hechos 19: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
