2 Corintios 13
13
Pablo itsawigʉs̈p Corintojatway
1Tʉnʉs̈patu mam mijchat imutu̱gupay viaje. Tʉngajuzga̱táj tu'c jayau acusa̱ticway te ca-itp mechc o tu̱gup testigu contra je'. 2Cuandu tʉtsʉ̱́naj mit mijchat, tʉnche'cta̱jcʉs̈ jeme iwatcaway mal. Mit jinap tʉgatsʉ̱nap mit mijchat po tʉnyʉmgʉs̈apatu jeme siguia̱tcapay iguiwatca ma̱jlat, ni'c te tʉnʉs̈patu mam mijchat, tʉnga-ayo̱wis̈áj nepʉn jeme iwatcapay mal. 3Tʉnwatáj we'n ni'c inwangap is̈jawigawa'n te iyacs̈ta'cway Cristu tʉs̈ajcotsp ʉ̱. Mit je' caje' débil mit mijchat, po je' oyap is̈moygap maj en nu'pʉjʉn cosa. 4Mit Cristu ca-ijtʉwu maj cuandu iguiyájcaj cunu̱s̈ni'c, po jinap je' ijtʉp vida ni'c Dios iguimoy maj. Ʉjtsat we'ney tʉnga-aguepcap maj as̈am je' primeru, po como tʉnmutʉgʉygau je', Dios tʉs̈moygámpey majpa tʉservia̱tcajawa'n mijchat.
5Pensá̱tca nat inyo'yga te micupʉjcap iyacs̈ta'cway, mit probá̱tca nat intsʉ̱nga mit Dios. ¿Ingajawigap ni'c Jesucristu tsʉ̱nap injo̱tni'jcat? Te ingamoygap laj Cristu injo̱tni'jcat, migacupʉjcap iyacs̈ta'cway. 6Po tʉnwamp pi jawiga ni'c ʉjtsat tʉcupʉjcap iyacs̈ta'cway. 7Mit tʉn-ora̱tcajap Dios pigawatca nejʉmay mal, po caje' pa ʉjtsat tʉtsʉ̱́nga oyninʉmic. Tʉnaguepcap derechu tʉche'cta̱jcawa'n po más oy pi watca iyacs̈ta'cway, pa we'n tʉgache'cta̱jcáj, maja iguinʉmgawa'naj ni'c tʉgamanda̱tcap. 8Tʉnganʉmgáj neti te inwatcap oy, solo tʉnche'jcáj jeme iwatcapay mal. 9Jemni'c ji'cp tʉnjo̱jtat cuandu tʉgache'jcawa'n, mit ji'cpey tʉnjo̱jtat intsʉ̱ngawa'n oy mit Dios, mit tʉnyo'jtap Dios pi jatca más oy. 10Jemni'c tʉja'ygʉ́s̈a ayʉ̱́j noc antes tʉnʉs̈wa'n mam mijchat, pa cuandu tʉcojawa'n tʉgache'cta̱jcʉs̈áj, ni'c el Señor tʉs̈moy autoridad pa pi pʉjca maj mit je', caje' pa intogoygawa'n.
11Jinap, hermanujat, Dios pi is̈mutangac, pi jatca oy, pʉctsóuga ayé conseju tʉnyacpay, tsʉ̱nga en acuerdu mit camaguépca tsuguin. Mit tsʉ̱náj mit mijchat ayé Dios nas̈moygapay paz mit nas̈wangapay. 12Nisaludá̱tcʉjʉ minu'pʉjʉjnat mit tu'c ame'tamuc ni'c miniwangʉjʉp. 13Is̈saluda̱tcap nu'pʉjʉn Dios ijayajwat.
14El Señor Jesucristu jeme nas̈moygapay favor, mit ayé Dios nas̈wangapay, mit Espíritu Santu jeme ts-napay mit ʉjtsat, pi is̈mutangac minu'pʉjʉjnat. Amén.
Currently Selected:
2 Corintios 13: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
