Gálatas 1
1
Pablo ija'ygʉs̈ap cupʉcpajyat Galaciajatway
1Ʉ̱ Pablo, tʉ-apóstol, mit jayajwat tʉs̈cacupiugawu pa apóstol, mit nejʉmay jayau tʉs̈cayagu pa apóstol, po tʉs̈yajcau Jesucristu mit Dios Nate̱jat jeme i-acjutucta̱cway Jesús mam itsʉ̱nga á̱nimajat. 2Nu'pʉjʉn hermanujat jeme tsʉ̱ngapay mit ʉ̱ tʉnsaluda̱tcap nu'pʉjʉn hermanujat jeme ni-apʉcmujcʉjʉpay Galaciajway na̱s̈. 3Dios Nate̱jat mit el Señor Jesucristu pi is̈moygac favor mit paz. 4Jesucristu je'yu ni-entrega̱jtʉu pa nas̈chi'tcajáj nu'pʉjʉn mal nawadcaway pa nas̈libra̱tcáj de ayʉ̱́j jinapay tiempu ma̱lway, ni'c we'n iguiwa'n Dios Nate̱jat. 5Namʉjninʉ́mga Dios pa nu'pʉjʉn tiempu. Amén.
Ca-itp jatu'c oyway noticia
6Tʉnigu-épijyʉp ni'c incuyaguigap jaran Dios, mit je' is̈ya̱s̈cau ni'c Cristu is̈wano'jcap, po mijchat insiguia̱tcajap jatu'c noticia tígatsicway. 7Mit ca-itp jatu'c oyway noticia, po una̱c jayajwat is̈trastorna̱tcap mit iwangap iguitigatscajawa'n Cristu i-oyway noticia. 8Po te ʉjtsat o te tu'c ángel tsajpni'cway is̈nʉmgajap tu'c noticia tigatsicway, mit te caje' as̈am ayé oyway noticia tʉnʉmgajaway, ma tsʉ̱na maldiciona̱tic. 9As̈am tʉs̈nʉ́mgaj primeru, jinap tʉnyʉmpatu: Te tu'c jayau is̈nʉmgajap tu'c noticia jeme caje'way as̈am impʉctsougaway, ma tsʉ̱na maldiciona̱tic.
10¿Is̈jawiga tʉnwamp tʉs̈-amigujatcʉs̈wa'n jayajwat o Dios? ¿Is̈jawiga tʉnwamp tʉtsʉ̱nawa'n oy mit jayajwat? Te tʉnwamp tʉtsʉ̱nawa'n oy mit jayajwat, ca-oyáj tʉs̈serviá̱jta Cristu.
Ayé yos̈ iwatpay Pablo
11Hermanujat, tʉnwamp pi jawiga ni'c jayajwat igawatcawu ayé oyway noticia jeme tʉnyʉmdacyo'ypay, 12ne jayajwat tʉs̈camoygawu, mit nejʉmay jayau tʉs̈ca-ajque's̈awu, po tʉs̈actujawiu Jesucristu.
13Inmaraugau nat tʉyo'jy ámbanu cuandu tʉs̈cupʉjc as̈am judíujat, nat tʉs̈po'ctangʉ́s̈a mʉgʉc Dios ijayajwat, mit tʉnwanate ma togoyga. 14Mit cuandu tʉcupʉ́gate as̈am judíujat, tʉmpʉctan más may que japu̱t tʉntʉcmayna̱s̈atway jeme itcʉjʉway nije'yu s̈iwit, ni'c más tʉnwano'c ayé costumbrejat iyajcaway tʉnte̱jtat ámbanuway. 15Mit Dios tʉs̈cupi̱u antes tʉ-itwa'n, mit tʉs̈ya̱s̈ pa tʉs̈mo'áj favor. 16Mit cuandu Dios iguiwajn tʉs̈actu-is̈capáj iway pa tʉs̈nʉmgʉs̈awa'n jeme caje'jatway judíujat, tʉnga-ucyo'tcʉs̈u jayajwat. 17Ne tʉganʉcs̈u Jerusalén mam itsʉ̱nga apóstojlat antes ʉ̱ tʉjajt apóstol, po tʉnʉcs̈ pa Arabiajway na̱s̈ mit tʉpitugatu pa nʉ'jcopac Damasco.
18I-íjtʉj tu̱gup s̈iwit, tʉnʉcs̈ Jerusalén pa tʉs̈-is̈capwa'n Pedro, mit tʉtan mit je' quince s̈ʉjwat. 19Po tʉnga-is̈u jatu'c apóstojlat, solo tʉn-is̈ Jacobo, el Señor ije̱way. 20Ayʉ̱́j tʉnja'ypay, Dios ijawip ni'c tʉgawe̱tp.
21Mit cʉs̈ tʉnʉcs̈ pa Siria mit Ciliciajway na̱s̈. 22Mit ʉ̱ tʉs̈ca-is̈capcawu ayé hermanujat jeme ni-apʉcmujcʉjʉpay Judeajway na̱s̈ jeme icupʉjcapay Cristu, 23solo imaraugau iguinʉmga: “Ayé jayau jeme nas̈po'ctangaway primeru, jinap inʉmdacyo'yp ni'c jayajwat ma cupʉjca Cristu, mit primeru igawanu ma cupʉjca.” 24Mit imʉjninʉmgau Dios ni'c tʉcupʉcnup.
Currently Selected:
Gálatas 1: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
