2 Corintios 12
12
Tu'c visión i-is̈way Pablo
1Ca-oy tʉni-oyninʉjmʉwa'n po itp ti tʉnʉmgʉs̈awa'n ayé visiójnat tʉs̈actu-is̈way el Señor mit lo que tʉs̈actujawiway. 2Tʉnis̈cap tu'c jayau icupʉcpay Cristu, mit i-íjtʉj catorce s̈iwit, Dios imunʉcs̈ pa yucm hasta imutu̱gupay tsajp. Mit tʉngajawip te nʉcs̈ mit cuerpu o te nʉcs̈ sin cuerpu. Solo Dios ijawip. 3Tʉnjawip ni'c nʉcs̈ ayé jayau po tʉngajawip te nʉcs̈ mit cuerpu o te nʉcs̈ sin cuerpu. Solo Dios ijawip. 4Mit iguimunʉcs̈ tsajpni'c mam i-it tu'c lugar oymanacway mam iguimarajw palabrajat igamarapay nepʉn, ne tu'c jayau ca-ijtʉp derechu iguinʉmwa'n ayé. 5Mit tʉn-oyninʉmáj ayé jayau po ʉ̱jyu tʉgani-oyninʉjmʉ̱́j nes̈ʉ̱n, solo tʉn-oyninʉmp ayé debilidad tʉnaguepay. 6Po te tʉnwamp tʉni-oyninʉjmʉwa'n, tʉgaje' loco ni'c tʉnyʉmáj iyacs̈ta'cway. Po tʉnganʉmp neti pa nepʉn maganʉm ni'c más tʉjajtʉp, po solo tʉs̈-oyninʉmgáj te i-e'pcap ni'c tʉnwatp oy, mit te imaraugap ni'c oy lo que tʉnyʉmpay.
7Mit Dios tʉs̈actu-is̈ mayo'c cosa oymanajcatway tsajpni'c. Mit pa tʉgani-oyninʉjmʉwa'n, Dios imoy laj Awayagatsna' imandajwatpay ma tʉs̈actu'jnʉc, mit tʉs̈acpʉjcʉs̈ʉu as̈am tʉs̈cotway tʉncuerpuni'c. Jat we'n pa tʉgani-oyninʉ́jmʉ demás. 8Mit tu̱gup viaje tʉs̈yo'jtaj el Señor ma tʉs̈chi'jtac ayé dolor. 9Mit je' tʉs̈nʉjmau: “Inaguepnup ayé favor tʉmoyway, ni'c tʉmoyp más maj cuandu intsʉ̱na débil.” Jemni'c más tʉnwamp tʉni-oyninʉjmʉwa'n cuandu tʉs̈ca-aguep maj, pa we'n Cristu tʉs̈moyi̱gáj maj. 10Jemni'c ji'cp tʉnjo̱jt cuandu tʉtsʉ̱na débil. Ji'cp tʉnjo̱jt cuandu tʉs̈apes̈cáj, tʉs̈aguepwa'n necesidad, tʉs̈po'ctangáj, mit cuandu tʉs̈tunas̈wa'n ni'c tʉnwamp Cristu. Ni'c cuandu tʉs̈ca-aguep maj, wenajpu'n Dios tʉs̈mo'áj más maj.
Pablo ipensa̱to'cp pa Corintojatway
11Tʉniwajtʉu as̈am tu'c loco ni'c tʉni-oyninʉjmʉu po mijchat is̈-obliga̱tcau tʉwat wename, mit más oyate mijchat is̈-oyninʉmgáj. Ni'c nes̈ʉ̱n tʉgaje' menus mit ayé niwatcʉjʉway apóstojlat, po tʉniwajtʉp as̈am tʉgaje'way neti. 12Dios tʉs̈actuwat milagrujat mam mijchat pa pi jawiga ni'c ʉ̱ tʉ-apóstol iyacs̈ta'cway, mit tʉ-aguepcʉs̈au calma mijchat. Mit Dios i-acmin milagrujat mit is̈acnigu-épigʉjʉu mit is̈actu-is̈cau ipoder. 13¿Tini'c is̈jawiga ni'c tʉ-aguepcʉs̈ más menus que japu̱t hermanujat tsʉ̱ngapay jatu'c laj? Más mitsʉ̱ngap oy ni'c tʉgajomigʉs̈u is̈mantenia̱tcáj. Te impensá̱tcap ni'c tʉwatcʉ́s̈au mal, dispensa̱tcac. 14Jinap tʉtsʉ̱nap listu pa tʉnʉs̈wa'n mam mijchat pa imutu̱gupay viaje mit tʉgajomigʉs̈áj is̈mantenia̱tcáj, ni'c tʉngache'mp biejnat inaguepcapay po tʉnche'mp pi tsʉ̱nga oy mit Cristu. Ni'c ya̱wayna'jat igamantenia̱tcap ite̱jtat po ite̱jtat ayé iguimantenia̱tcapay. We'ney mijchat tʉ-e'pcʉs̈p as̈am tʉ̱wajyat. 15Mit ʉ̱ tʉnwamp tʉs̈gasta̱twa'n nu'pʉjʉn pa mijchat, mit tʉnyagáj tʉmvida pa mijchat. ¿Is̈jawiga te más tʉwangʉs̈p, mijchat más is̈cawangáj? 16Injawigap ni'c tʉgajomigʉs̈u is̈mantenia̱tcáj, po majawe'naj mijchat inyʉmgap ni'c tʉnaguep maña pa tʉwe̱tcʉs̈wa'n en jatu'c forma. 17¿Is̈jawiga tʉ-ajyu'tcʉs̈au ayé hermanujat pa is̈we̱jta̱jcáj? 18Ʉ̱ tʉnyʉjmau Tito ma nʉcs̈ mam mijchat, mit tʉnajyu't mit je' ayé hermanu. ¿Is̈jawiga is̈we̱jta̱jcau Tito? Ʉ̱ tʉnjawip ni'c ʉ̱ mit Tito tʉpensa̱tcap ni-as̈amu mit tʉniporta̱tcʉjʉpey ni-as̈amu.
19Mijchat inyʉmgap ni'c tʉnidefendia̱tcʉjʉp mit mijchatu. Po ʉjtsat tʉcotscap mam Dios tʉs̈-e'pcap ni'c tʉnmutʉgʉygau Cristu. Jemni'c tʉmucotscʉs̈ mijchat tʉwangʉs̈pay, pa pi pʉjca maj mit Dios. 20Ni'c tʉpʉ̱tp tʉcojawa'n ni'c oyap is̈watca lo que tʉngawampay, mit ʉ̱ is̈-e'pcáj ni'c tʉ-awa'n. Tʉpʉ̱tp tʉpa̱tcʉs̈wa'n te migatsʉ̱ngap en acuerdu, te in-angap jeme itcʉjʉpay, te mi-awa'jnat, te mini-ago'jcʉjʉp, te minitucotscʉjʉp, te miniwe̱twatcʉjʉp, te minimʉjninʉmgʉjʉp mit te inwatcap tigapa'tu. 21Mit cuandu tʉpitucnuwa'n, tʉngajawip te Dios tʉs̈acwinchu̱gáj por mijchat, mit itáj ti tʉjʉ'wa'n por ayé jayajwat jeme siguia̱tcapay iguiwatca ma̱jlat, mit iganicuyaguigap ayé ma̱jlat iwatcaway, iganiyajcap pa ichajyo'ygawa'n ne iganiyajcap iviciujat.
Currently Selected:
2 Corintios 12: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
