1 Pedro 4
4
Mozojat ojyatway
1Cristu itunas̈ icuerpuni'c pa ʉjtsat, mit mijchat tsʉ̱́nga-ey dispuestu pa is̈tunas̈cawa'n, ni'c jeme itunas̈way icuerpuni'c, igajawa'náj iguiwatwa'n mal. 2Mit jinap tsʉ̱náj en ayʉ̱́j vida pa iguiwatwa'n lo que Dios iwampay, mit caje' pa iguiwatwa'n lo que iyo'tpay ijo̱jt. 3Ambanu inwatcau as̈am maljayajwat iguiwángaj, po jinap ingajawatcap we'n. Inwatcau mal, inwatcau lo que iyo'tway injo̱jtat, mi-u̱jcau pʉjʉn is̈wángaj, inwatcau tigapa'tu mam in-u̱ctacyo'ygaj, mit inadora̱tcau tiyu̱s̈at jeme ca-ojyatway. 4Mit jinap je'jat nigu-épigʉjʉp ni'c mijchat ingajatumuwatcap je'jat ayé mal iwatí̱jcapay, mit jemni'c is̈tucotscap. 5Po je'jat inʉmgajáj Dios ti iwatcaway, ni'c Dios itp ti iguijuzga̱tcʉs̈wa'n jeme tsʉ̱ngapnajway mit o'guijcatway. 6Jemni'guey Cristu iguinʉmgʉ́s̈aj oyway noticia o'guijcatway, ni'c je'jat o'jcau as̈am jayajwat po je'jat i-espíritu tsʉ̱ngáj pa siempre, as̈am Dios itsʉ̱na pa siempre.
7Mit tomo'ganu pa icʉs̈wa'n nu'pʉjʉn cosajat. Jemni'c pensá̱tca oy mit oratí̱jca. 8Jinap más oy pi watca ayʉ̱́j: Pi niwangʉjʉ may minu'pʉjʉjnat, ni'c te miniwangʉjʉp, ingawatcáj cuenta te tambʉn is̈watcajap mal, mit miniperdona̱tcʉjʉ̱́j. 9Nipʉctsóugʉjʉ oymanac minu'pʉjʉjnat mit camniquejá̱tcʉjʉ. 10Dios imoy favor cada jayau pa ma oya iguimajyiwa'n ihermanu, mit miyos̈watcáj oy pa Dios te inmajyigap inhermanujat ni'c Dios is̈yajcau pa pi watca we'n. 11Te tu'c jayau cotsp, ma cots as̈am Dios iguiwa'n. Te tu'c jayau iservia̱jtap ihermanu, ma servia̱t as̈am Dios iguimoyp maj pa iguiwatwa'n. Pa we'n Dios tsʉ̱náj oyninʉmic ni'c Jesucristu nas̈moygap nu'pʉjʉn. Na-oyninʉ́mga je' ni'c ijtʉp poder pa nu'pʉjʉn tiempu. Amén.
Jeme isiguia̱tcajapay Cristu, itunas̈cap
12Mijchat tʉwangʉs̈pay, camnigu-épigʉjʉ te is̈mingajap mʉgʉcway pruebajat, ni'c itp ti is̈jatcáj we'n. 13Más oy ma ji'c injo̱jtat ni'c intunas̈cap as̈amu Cristu iguitunas̈, pa we'n ique's̈ta'cwa'n oymanac je', ji'gáj injo̱jtat mʉgʉc. 14Ni'c te is̈tucotscap ni'c incupʉjcap Cristu, ma ji'c injo̱jtat, ni'c tsʉ̱nap injo̱tni'jcat ayé Dios jeme oyninʉmicway. Iyacs̈ta'cway ayé maljayajwat imalninʉmgap Cristu po mijchat in-oyninʉmgap. 15Te tu'c jayau mam mijchat itunas̈p, ma tunas̈ pa Cristu. Caje' iguitunas̈wa'n ni'c ago'c o nu'm o iwat mal o ni'c itunitʉgʉjyʉp jayje'. 16Po tu'c jayau magawinchú̱ga te itunas̈p ni'c isiguia̱jtap Cristu, po ma oyninʉm Dios ni'c je' imutʉgʉyp Cristu.
17Jinap coyway tiempu pa Dios iguiproba̱tcʉs̈wa'n ijayajwat. Mit te Dios nas̈proba̱jtʉ'jcap ʉjtsat, más mʉgʉc iguicastiga̱tcʉs̈wa'n jeme igajayaumaygapay i-oyway noticia. 18Mit te tu'c jayau yacs̈icway maj inisalvá̱jtʉ, ¿natpaj inisalva̱tcʉjʉwa'n maljayajwat mit jeme igarespeta̱tcapay Dios? 19Jemni'c te ʉjtsat natunas̈cap as̈am iguiwa'n Dios, na-entregá̱tcaja je' navidajat mit nawátca oy. Ni'c ʉjtsat Dios nas̈watcau mit je' cumplia̱tp.
Currently Selected:
1 Pedro 4: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
