1 Pedro 5
5
Cuidá̱tca Dios ijayajwat
1Jinap tʉntsawigʉs̈áj na'waywájat jeme is̈cuida̱tcapay mijchat, ni'c ʉ̱ tʉna'wayanu-éy as̈am je'jat. Ʉ̱ tʉn-is̈ nat iguitunas̈ Cristu, mit natsʉ̱ngámpey mit Cristu cuandu itsʉ̱nawa'n mʉjninʉmic itrononi'c. 2Tʉtsawigʉs̈p pi cuida̱tca Dios ijayajwat ni'c je'jat tsʉ̱ngap as̈am borregujat mam mijchat. Incuida̱tcáj po caje' ni'c mitsʉ̱ngap obliga̱tic, ne caje' pa inactsʉ̱ngawa'nu, po incuida̱tcáj mit nu'pʉjʉn injo̱jtat, ni'c we'n iguiwa'n Dios pi watca. 3Ingamanda̱tcáj mʉgʉc Dios ijayajwat as̈am mozojat, po inyajcajáj oyway ejemplu je'jat. 4Mit mi'nájatu Cristu meru jeme icuida̱tcʉs̈pay nu'pʉjʉn cupʉcpajyat, mit ique's̈ta'cwa'n je', napʉctsougáj tu'c premiu oymanacway jeme catogoyámpay.
5We'ney mijchat ya̱wájat, jayaumáyga na'waywájat, mit minu'pʉjʉjnat nirespetá̱tcʉjʉ, mit camnimʉjninʉ́mgʉjʉ.
Ni'c Dios igapʉctsougʉs̈p jeme nimʉjninʉ́mgʉjʉpay,
Je' imajyigʉs̈p jeme canimʉjninʉ́mgʉjʉpay.
6Tsʉ̱́nga domina̱tic Dios icʉ'jugum ni'c je' ito'jcʉp poder pa is̈manda̱tcáj, mit icojawa'n tiempu Dios is̈yajcáj pi jatca mʉj. 7Tigapa'tu is̈jatcámpay, campensa̱tca, solo yájcaja nu'pʉjʉn Dios icʉ'jugum ni'c je' pensa̱tp pa is̈cuida̱tcáj mijchat.
8Pensá̱tca oy mit tsʉ̱́nga prepara̱tic, ni'c Awayagatsna' ayé inmutsuguijnat, mit je' as̈am león i-ʉjtacyo'y, ni'c iche'mp pʉn i-ajca'wámpay. 9Majmóyga ayé ma̱lwayna' mit cupʉ́jca mʉgʉc Dios. Injawigap ni'c jʉmba'tu en ayʉ̱́j mundu inhermanujat itunas̈cap ni-as̈amu. 10Dios nas̈moygap nu'pʉjʉn favor, mit je' nas̈ya̱s̈cau pa natsʉ̱ngawa'n mam i-oymanagui pa nu'pʉjʉn tiempu. Jatáj we'n ni'c namutʉgʉygau Jesucristu. Natsʉ̱ngáj mit je' cʉs̈wa'n nas̈tunas̈ca yam tu'c tiempu. Dios nas̈acpichingáj oy, nas̈moygáj maj mit nas̈actsʉ̱ngáj mʉgʉc. 11Na-oyninʉ́mga Dios ni'c je' ijtʉp poder pa nu'pʉjʉn tiempu. Amén.
Ultimu saludu
12Silvano tʉnactuja'y ayʉ̱́j noc ni'c tʉmpensa̱tp ni'c je' tu'c hermanu cumplia̱tpay. Tʉgaja'ygʉs̈awu mayo'c en ayʉ̱́j noc pa tʉtsawigʉs̈wa'n. Tʉ-actujawigʉs̈p ni'c Dios is̈wangau iyacs̈ta'cway ni'c is̈moygau favor. Jinap tsʉ̱́nga mʉgʉc mit ayé favor is̈moygaway Dios.
13Is̈saluda̱tcap Dios ijayajwat tsʉ̱ngapay Babilonia, ni'c aye'jat Dios icupiugʉs̈ as̈amu mijchat. Mit is̈saluda̱tcapey Marcos jeme tʉn-e'pay as̈am tʉnwáy. 14Nisaludá̱tcʉjʉ minu'pʉjʉjnat mit tu'c ame'tamuc ni'c miniwangʉjʉp.
Dios pi is̈moygac paz minu'pʉjʉjnat ni'c inmutʉgʉygau Jesucristu. Amén.
Currently Selected:
1 Pedro 5: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
