1 Corintios 9
9
Lo que iwatámpay tu'c apóstol
1Ʉ̱ tʉ-apóstol ni'c Dios tʉs̈ajyu't, mit tʉnaguepey nu'pʉjʉn derechu ni'c tʉn-is̈ el Señor Jesús. Ʉ̱ tʉyos̈wat pa tʉ-actugupʉjcʉs̈wa'n el Señor. 2Te japu̱jtat inʉmgap ni'c tʉgaje' apóstol po mijchat injawigap ni'c tʉjemé. Oyap is̈jawiga ni'c tʉ-apóstol ni'c tʉ-actugupʉjcʉs̈ el Señor.
3Yename tʉs̈po'ngʉs̈wa'n jeme tʉs̈acusa̱tcapay. 4Ʉjtsat tʉnaguepcapey derechu tʉs̈pʉctsougawa'n nʉ' mit cayan tʉs̈moygapay. 5Ʉjtsat tʉnaguepcapate-ey derechu tʉs̈muyo'ygawa'n tʉnto's̈ajyat jeme cupʉjcapay as̈am iguiwatca el Señor Jesús ije̱wajyat, mit Pedro mit we'ney japu̱t apóstojlat. 6Mijchat impensa̱tcap ni'c solo ʉ̱ mit Bernabé tʉtsʉ̱ngap obliga̱tic pa tʉyos̈watcawa'n. 7¿Is̈jawiga tu'c soldaj je'yu nimantenia̱jtʉp icuentani'c? ¿Pʉn ini̱p tu'c uvajuc mit igato'jap itʉjm? ¿Pʉn icuida̱tp pa̱gas̈juc mit iga-u̱jcap ileche iyacpay? 8¿Is̈jawiga ʉ̱jyu tʉnyʉmp ayʉ̱́j? We'ney iguinʉm Moisés iley. 9Ni'c ja'yic itsʉ̱na ileyni'c: “Ingacojmáj pusa̱t ayé buey jeme na-actute'ní̱jcapay trigu, po moyga laj ma cay s̈ʉ̱n.” ¿Is̈jawiga Dios icuida̱tcʉs̈p buejyatu? 10Dios inʉm wename pa ʉjtsat natsʉ̱nga oy, mit jemni'c itsʉ̱na ja'yic. Ni'c ara̱tpay ijtʉp ti i-atsʉ̱napay. Mit jeme iwopay trigu i-atsʉ̱nap iguipʉctsowa'n trigu. 11Ʉjtsat tʉ-ajque's̈cajau Dios ipalabra pa pi tsʉ̱nga oy injo̱tni'jcat. ¿Is̈jawiga ca-oyáj is̈moygap lo que tʉnyesitá̱tcapay? 12Te inmoygap japu̱jtat lo que inaguepcapay, ʉjtsat tʉnaguepcap más derechu.
Po ʉjtsat tʉngani-aprovecha̱tcap ayʉ̱́j derechu, siempre tʉnimajmoygʉjʉp pa magatentan Cristu i-oyway noticia. 13¿Ingajawigap ni'c jeme yos̈watcapay templuni'c, itucaygap jeme itpay templuni'c? Ni'c jeme majyigapay mam isacrifica̱tca, icaygap ayé aníma̱jtat icotscajapay Dios. 14Wename-ey manda̱t el Señor ni'c jeme i-ajque's̈pay oyway noticia, ijtʉp derechu iguitucaywa'n ni'c i-ajque's̈p ayé oyway noticia. 15Po nes̈ʉ̱n tʉnga-aprovecha̱tu tʉnderechu, ne tʉngaja'yp ayʉ̱́j noc pa is̈watcajáj we'n. Po más oy tʉ-o'c que is̈nʉmgawa'n ni'c tʉcayp por mijchat.
16Ni'c te tʉmpredica̱tp oyway noticia ca-oyap tʉnimʉjninʉjmʉ ni'c itp ti tʉs̈watwa'n wename. Mit ¡pro̱wij de ʉ̱ te tʉnganʉmdacyo'yp oyway noticia! 17Ni'c te tʉnwatp ayʉ̱́j ni'c tʉnwamp, tʉmpʉctsowáj premiu. Po te tʉngawatp tʉngustuni'c, majawe'naj itp ti tʉcumplia̱twa'n ni'c ayé yos̈ Dios tʉs̈moy. 18¿Ti pagu tʉmpʉctsowáj? Tʉnjawip ni'c neti, solo ji'cp tʉnjo̱jt ni'c tʉnyʉmdacyo'yp Cristu i-oyway noticia, mit tʉngaque'chump neti pa tʉga-abusa̱t tʉnderechu ni'c oyapate tʉs̈tucay ayé oyway noticia.
19Mit nepʉn tʉs̈camanda̱tp po tʉniwajtʉu mozo mit nu'pʉjʉn jayajwat pa tʉ-actsʉ̱na más cupʉcpajyat. 20Tʉniwajtʉu as̈am judíu pa tʉ-actsʉ̱ngʉs̈ judíujat ma cupʉjca-ey. Jeme irespeta̱tcajapay Moisés iley, tʉniwajtʉp as̈am tʉnrespeta̱tpayey pa tʉs̈actsʉ̱ngʉs̈wa'n jeme irespeta̱tcapay ley, po ʉ̱ tʉs̈cadomina̱tp ayé ley. 21Mit jeme iga-is̈capcapay ayé ley, tʉniwajtʉp as̈am tʉnga-is̈capay ayé ley pa tʉs̈actsʉ̱ngʉs̈wa'n jeme iga-is̈capcapay ayé ley. Po tʉnwatp lo que imanda̱tpay Dios, mit tʉnjayaumajyap Cristu iley. 22Mit jeme cacupʉjcapay mʉgʉc, tʉniwajtʉpey as̈am tʉgacupʉcpay mʉgʉc pa tʉs̈actsʉ̱ngʉs̈wa'n je'jat. Tʉniwajtʉp natcapa'tu pa nu'pʉjʉn jayajwat, wename tʉnactsʉ̱ngʉs̈áj cʉjtu'c. 23Mit ayʉ̱́j tʉnwatp ni'c tʉnwamp ayé oyway noticia, mit tʉnwamp tʉs̈nʉmdacyo'ywa'n ayé oyway noticia.
24¿Ingajawigap ni'c jeme pujʉ'jcapay carrerani'c, nu'pʉjʉn pujʉ'jcap po tu'gujyu ayé i-actsʉ̱napay premiu? Pujʉ'jca-ey wename pa pi actsʉ̱nga ayé premiu iyagámpay Dios. 25Mit nu'pʉjʉn jayau niprepara̱jtʉpay pa ipujʉ'cwa'n carrerani'c, igawatcada̱cp tigapa'tu. Iyacs̈ta'cway je'jat niprepara̱tcʉjʉp we'n pa iguipʉctsougawa'n tu'c premiu jeme togoyámpay. Po ʉjtsat napremiujat napʉctsougámpay catogoyáj. 26Jemni'c ʉ̱ yename tʉpujʉ'c, po tʉgatʉ'tspujʉ'cpu. Yename ʉ̱ tʉlucha̱t, po caje' as̈am i-acnʉs̈capay igolpe s̈e'mni'gu. 27Po tʉndomina̱tp tʉncuerpu mit tʉngawatp lo que tʉncuerpu iwampay, ni'c tʉnajque's̈cʉs̈away japu̱jtat, po ʉ̱ mismu oyap tʉpichin mal mit Dios.
Currently Selected:
1 Corintios 9: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
