1 Corintios 8
8
Lo que icotscajapay tiyu̱s̈at
1Jinap tʉpo'ngʉs̈áj te oy nas̈caywa'n cayan icotscajapay tiyu̱s̈at. Najawigap ni'c na-is̈capcap ayʉ̱́j asuntu. Jeme i-is̈capay may nimʉjninʉjmʉp, po te nawamp nahermanu, más nawajtáj oy. 2Te tambʉn inʉmp ni'c i-is̈cap, ayé ni'c igani-is̈cap neti as̈am imerecia̱t igui-is̈capwa'n. 3Mit te tu'c jayau iwamp Dios, Dios igui-e'páj ayé jayau as̈am iway.
4Jinap tʉ-actujawigʉs̈p de ayé cayan icotscajapay tiyu̱s̈at. Najawigap ni'c tu'c tiyu̱s̈ caje' neti en ayʉ̱́j mundu, ni'c tu'gu Dios i-it mit ca-itp más. 5Iyacs̈ta'cway tsajpni'c mit na̱s̈ni'c itp mayo'c cosajat inʉmgajapay ni'c diosat. Te wename, mayo'c i-itwa'n diosat jeme manda̱tcapay. 6Po ʉjtsat na-aguepcap tu'gu Dios Nate̱jat jeme iwatway nu'pʉjʉn cosa, mit ʉjtsat natsʉ̱ngap pa je'. Mit itpey tu'c Señor Jesucristu mit Dios itumuwat je' nu'pʉjʉn cosajat, mit je' nas̈moygap vida.
7Po caje' nu'pʉjʉn jayajwat i-is̈capcap wename. Ni'c cʉjtu'c hasta jinap imuyujcaway tiyu̱s̈at, mit icaygapnaj ayé cayan as̈am icotscajapay tiyu̱s̈at, mit jeme cacupʉjcapay mʉgʉc, ipensa̱tcap ni'c nijingʉjʉp mit ma̱jlat. 8Dios nas̈capʉctsougap por lo que nacaygapay. Ni'c te nacaygap, nagajatcáj más oy, mit te nagacaygap, ni-as̈amu. 9Mijchat oyap is̈watca nu'pʉjʉn cosa, po nicuidá̱tcʉjʉ, camactuwatca mal jeme canicupʉjcapay mʉgʉc. 10Mijchat injawigap ni'c oy jʉmaygapa'tu cayan, po te is̈-e'pcap tu'c hermanu cacupʉcpay mʉgʉc ni'c mits-ngap me̱s̈ani'c en tu'c lugar mam igui-adora̱tca tiyu̱s̈at, je' iwa'námpey iguicaywa'n jeme icotscajaway tiyu̱s̈at. 11Mijchat inis̈capcap jeme oyway, po inactuwatcau mal ayé hermanu canicupʉcpay mʉgʉc, mit Cristu o'c pa je'. 12Inwatcau mal ni'c inwatcajau we'n inhermanujat. Inactuwatcau mal ayé hermanu cacupʉcpay mʉgʉc, mit we'ney inwatcau mal mam Cristu is̈-e'pcap. 13Jemni'c te tʉnactuwatp mal tʉnhermanu ni'c tʉncayp ayé cayan icotscajaway tiyu̱s̈at, nunca tʉngajacayáj ayé cayan magawat mal tʉnhermanu.
Currently Selected:
1 Corintios 8: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
