1 Corintios 7
7
Itsawigap sobre ayé cʉ'pa't
1Tʉpo'ngʉs̈áj ayé asuntujat is̈ja'ygajaway. Oyate tu'c jayau maganicʉ'pa̱jtʉ, 2po pa nepʉn magachajyo'y, cada jayau ma ijtʉ ito's̈ay mit cada to's̈ay ma ijtʉ ina'u. 3Tu'c jayau ma wajta oy ito's̈ay as̈am imerecia̱t, mit we'ney tu'c to's̈ay ma wajta oy ina'u. 4Tu'c to's̈ay ca-oyap iguiwat lo que je'yu iwampay, mit tu'c jayau ca-oyapey iguiwat lo que je'yu iwampay, ni'c tsʉ̱ngap obliga̱tic inimechcatij inigupʉjcʉjʉwa'n. 5Tu'c jayau mit ito's̈ay maganiyajcʉjʉ jec. Po oy te iwatcap we'n te tsʉ̱ngap en acuerdu pa i-ora̱ti̱jcawa'n, mit cʉs̈wa'n ma nipʉjcʉjʉ-atu jaran, ni'c oyap iguitenta̱tcap Awayagatsna', ni'c ca-oyap inimajmoygʉjʉ jec.
6Ayʉ̱́j tʉnʉmgʉs̈ap ni'c tʉmoygʉs̈p laj pi pensa̱tca, caje' ni'c tʉmanda̱tcʉs̈p. 7Tʉnwampate nu'pʉjʉn jayajwat ma tsʉ̱nga as̈am ʉ̱. Po cada jayau Dios iguiyac as̈am je' iguiwajn, pa tu'c jayau ma wat tu'c cosa mit tu'c ma wat jatu'c.
8Tʉnyʉmgʉs̈ap jeme cacʉ'pa'tijcatway mit cu-o'cwájat ni'c oyate maganicʉ'pa̱tcʉjʉ as̈am ʉ̱ tʉgacʉ'pa'tic. 9Po te canimajmoygʉjʉp, ma nicʉ'pa̱tcʉjʉ. Ni'c más oy inicʉ'pa̱tcʉjʉwa'n que iguipensa̱tcawa'n ayé.
10Po jeme cʉ'pa'tijcatway tʉnmanda̱tcʉs̈p ni'c tu'c to's̈ay magacuyagui ina'u, mit ayé caje' ʉ̱jyu tʉnmanda̱tp po el Señor we'n imanda̱jt. 11Mit te tu'c to's̈ay icuyaguip ina'u, magapʉc jatu'c, más oy ma pʉcnu-atu ina'u, mit tu'c jayau magacuyagui ito's̈ay.
12Mit japu̱jtat ʉ̱ tʉntsawigʉs̈p, mit ayʉ̱́j el Señor iga-ajque's̈u. Te tu'c hermanu ijtʉp ito's̈ay mit caje' cupʉcpay, po te ayé to's̈ay iwamp itsʉ̱nawa'n mit je', magacuyagui. 13Mit te tu'c to's̈ay ijtʉp ina'u mit caje' cupʉcpay, po te ayé jayau iwamp itsʉ̱nawa'n mit je', magacuyagui. 14Ni'c tu'c jayau cacupʉcpay tsʉ̱nap bendiciona̱tic ni'c ito's̈ay cupʉcp, mit we'ney tu'c to's̈ay cacupʉcpay tsʉ̱nap bendiciona̱tic ni'c ina'u cupʉcp. Te catsʉ̱ngap wename, iwajyat catsʉ̱ngáj bendiciona̱tic, po jinap bendiciona̱tic itsʉ̱nga iwajyat. 15Po te tu'c jayau cacupʉcpay pichimp, tsac ma pichin. Ni'c te iwatp wename, tu'c hermanu o tu'c hermana tangap libre, ni'c Dios nas̈ya̱s̈cau pa natsʉ̱nga en paz. 16To's̈ay, ¿nat is̈jawi te inacnisalva̱jtʉ̱́j inya'u? Jayau, ¿nat is̈jawi te inacnisalva̱jtʉ̱́j into's̈ay?
17Cada jayau ma yo'y as̈am Dios iguimoy favor, mit as̈am Dios iguiya̱s̈. Yename tʉs̈ajque's̈ pa nu'pʉjʉn cupʉcpajyat. 18Te Dios iya̱s̈ tu'c jayau marca̱tic, ma tan marca̱tic. Mit te Dios iya̱s̈ tu'c jayau jeme camarca̱ticway, maganimarca̱jtʉ. 19Caje' neti te namarca̱tic o te nagamarca̱tic. Po más oy nas̈jayaumaygawa'n lo que Dios imanda̱tpay. 20Cada jayau ma tan as̈am itsʉ̱naj cuandu Dios iguiya̱s̈. 21¿Mitsʉ̱ngapate as̈am mozo cuandu Dios is̈ya̱s̈cau? Camjapensa̱tcawit, po te oyap intsʉ̱nga libre, aprovechá̱tca ayé. 22Ni'c te el Señor iya̱s̈ tu'c jayau cuandu itsʉ̱naj to'ctʉgʉyic mit mal, el Señor i-acnilibra̱jtʉp. We'ney te el Señor iya̱s̈ tu'c jayau tsʉ̱napay libre, ayé itp ti iyos̈watwa'n pa Cristu. 23Dios is̈juybichingau mit tu'c preciu mʉjway. Jinap camniyajcʉjʉ is̈domina̱tcáj jayajwat. 24Hermanujat, as̈am Dios is̈ya̱s̈cau cada jayau, wename tánga mit Dios.
25El Señor tʉs̈camanda̱tu nat tʉs̈ajque's̈cʉs̈awa'n quis̈ajyat, po tʉnʉmgʉs̈áj lo que ʉ̱ tʉmpensa̱tpay, ni'c el Señor tʉs̈-ayo̱wis̈ mit confia̱tp mit ʉ̱ ni'c iyacs̈ta'cway lo que tʉmpensa̱tpay. 26Como in-e'pcap ni'c mimp tiempu pa nas̈tunas̈cawa'n, tʉpensa̱tp más oy tu'c jayau ma tan as̈am itsʉ̱na. 27¿Inaguepcap to's̈ay? Camcuyaguiga. ¿Inga-aguepcap to's̈ay? Camche'ngawit. 28Po te minicʉ'pa̱tcʉjʉp, ingawatcap mal. Mit te tu'c quis̈ay nicʉ'pa̱jtʉp, igawatpey mal. Po as̈am aye'jat itunas̈cáj en ayʉ̱́j mundu, mit tʉngawampate pi tunas̈ca.
29Po ayʉ̱́j tʉnʉmgʉs̈ap hermanujat, nas̈cajatangajap may tiempu. Jinap pa jʉpm jeme itcʉjʉpay to's̈ay ma tsʉ̱nga as̈am ca-itcʉjʉpay, 30mit jeme jʉygapay ma tsʉ̱nga as̈am cajʉygapay, mit jeme ji'jcapay ijo̱jtat ma tsʉ̱nga as̈am caji'jcapay ijo̱jtat. Mit jeme ijuygaway tanti ma tsʉ̱nga as̈am ca-itcʉjʉpay neti. 31Mit jeme tsʉ̱ngapay oy en ayʉ̱́j mundu, maga-oyninʉmga lo que itcʉjʉpay, ni'c ayʉ̱́j mundu na-e'pay cʉs̈áj.
32Tʉngawamp pi pensa̱tí̱jca. Jeme ca-ijtʉpay to's̈ay más iwatp cuenta pa iyos̈watwa'n mit el Señor, mit iwatpey cuenta nat iguiwatwa'n lo que el Señor iwampay. 33Po jeme ijtʉpay to's̈ay más iwatp cuenta pa iyos̈watwa'n en ayʉ̱́j mundu, mit pa iguiwatwa'n lo que ito's̈ay iwampay. 34Wename-ey tigatsic tu'c to's̈ay mit tu'c quis̈ay, ni'c tu'c quis̈ay iwatp cuenta lo que el Señor iwampay pa iguiservia̱jtawa'n je' mit nu'pʉjʉn ijo̱jt. Po tu'c cʉ'pa'jto's̈ay iwatp cuenta pa iyos̈watwa'ney en ayʉ̱́j mundu, mit pa iguiwatwa'n lo que ina'u iwampay.
35Ayʉ̱́j tʉnʉmgʉ́s̈ap pa pi tsʉ̱nga oy, caje' pa tʉ-actuwatcʉs̈wa'n obliga̱tic, po ni'c tʉnwamp pi yo'yga limpiu, mit pi wanga el Señor mit nu'pʉjʉn injo̱jtat.
36Te tu'c jayau ipensa̱tp ni'c ca-oy igui-actsʉ̱nawa'n iwaymá̱m as̈am quis̈ay, mit te ijtʉnup may s̈iwit, más oy ma acnicʉ'pa̱jtʉ. Ayé jayau ma wat as̈am iguipensa̱t, ni'c caje' mal te nicʉ'pa̱jtʉp ayé quis̈ay. 37Po jatu'c jayau ipensa̱táj ni'c iga-acnicʉ'pa̱jtʉ̱́j iwaymá̱m, mit je' nepʉn iguiga-obliga̱tp, je' oyáj iguiwat as̈am iguiwa'n. Je' iwatp oy te i-actsʉ̱nap iwaymá̱m as̈am quis̈ay. 38Jemni'c iwatp oy te i-acnicʉ'pa̱jtʉp iwaymá̱m, po iwatp más oy te iga-acnicʉ'pa̱jtʉp iwaymá̱m.
39Tu'c to's̈ay cʉ'pa'ticway obliga̱tic itsʉ̱nawa'n mit ina'u. Po te o'cp ina'u, libre itan pa inicʉ'pa̱jtʉwa'n mit pʉn iwa'námpay, po oy ma pʉc tu'c jayau icupʉgámpay el Señor. 40Po tsʉ̱náj más oy te canicʉ'pa̱jtʉp ayé cu-o'c. Ʉ̱ we'n tʉpensa̱t, mit tʉs̈jawi ni'c Dios i-Espíritu tʉs̈acpensa̱tp we'n.
Currently Selected:
1 Corintios 7: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
