1 Corintios 6
6
Naganicotsnás̈cʉjʉ
1Te tu'c hermanu mam mijchat imuni-ago'jcʉp ihermanu, atrevidu ayé te cotsnas̈p mam tu'c juez cacupʉcpay, más oy ma resolvia̱tca mam Dios ijayajwat. 2¿Ingajawigap ni'c Dios ijayajwat ijuzga̱tcáj jayajwat ayʉ̱́j mundujway cuandu Dios i-arregla̱twa'n? Mit te injuzga̱tcáj jayajwat ayʉ̱́j mundujway, ¿ca-oyap is̈-arregla̱tca tu'c asuntu más titicway? 3¿Ingajawigap ni'c najuzga̱tcáj ángejlat jeme iwatcaway mal? ¿Tini'cpaj nas̈ca-arregla̱tcawa'n asuntu jinapay tiempuway? 4Jemni'c te mini-ago'jcʉjʉp, ¿tini'c is̈yájca juezat ma arregla̱tca? ni'c je'jat ca-itcʉjʉp parte mit mijchat. 5Tʉnʉmgʉs̈ap ayʉ̱́j pa pi winchú̱gaga. ¿Ca-itp mam intsʉ̱nga tu'c jayau ijawiyámpay, ne ca-itp tu'c jeme oyámpay igui-arregla̱jta hermanujat i-asuntujat? 6¿Is̈jawiga tu'c hermanu itp ti iguicotsnas̈wa'n ihermanu mam itsʉ̱nga jeme cacupʉjcapay?
7Iyacs̈ta'cway is̈togoygapnaj ni'c minicotsnas̈cʉjʉp mijchatu. ¿Tini'c is̈camajmóyga is̈watcajáj mal? ¿Tini'c is̈camajmóyga cuandu is̈nu'mgajap tanti? 8Po mijchat inwatcajap mal mit inyu'mgajap inhermanujat.
9¿Ingajawigap ni'c jeme iwatcapay mal, igapʉctsougáj neti mam imanda̱t Dios? Camniwe̱tcʉjʉ, ni'c ne chajyo'ypajyat, ne tiyu̱s̈-adora̱tpajyat, ne jeme ichajyo'ygajapay ito's̈ajyat, ne afeminadujat, 10ne nu'mpajyat, ne tumi̱nwampajyat, ne mu'gajayajwat, ne tucotspajyat, ne jeme ipʉjcapay jayje', as̈am aye'jat igapʉctsougáj neti mam imanda̱t Dios. 11Mit wename inyo'ygaj cʉjtu'c mijchat, po jinap limpia̱tiganu nu'pʉjʉn mal inwatcaway, mit jinap Dios is̈je'jatcau mit is̈yacs̈icninʉmgau ni'c incupʉjcau el Señor Jesús, mit Dios is̈moygau Espíritu Santu.
Yo'yga limpiu
12Oyate tʉs̈watwa'n nu'pʉjʉn cosa, po caje' nu'pʉjʉn pichimp oy. Nu'pʉjʉn cosa oyate pa ʉ̱, po tʉganiyajcʉp tʉs̈dominatáj neti. 13Ayé cayan pa natinchay mit natinchay pa cayan, po Dios inʉm ni'c cʉs̈áj ayé cosajat. Po nacuerpu caje' pa nas̈tuchajyo'ywa'n, ni'c nacuerpu pa el Señor mit el Señor pa nacuerpu. 14Mit Dios i-acjutucta̱c el Señor Jesús mit we'ney ʉjtsat nas̈acjutucta̱jcáj mit ipoder.
15¿Ingajawigap ni'c incuerpujat Cristu ije'? ¿Is̈jawiga tʉnchi'táj Cristu ije' mit tʉnactuje'jatáj tu'c malto's̈ay? Ne magawa'n Dios. 16¿Ingajawigap ni'c jeme imunipʉjcʉpay tu'c malto's̈ay, jatcáj tu'gu cuerpu? Ni'c ja'yic itsʉ̱na Dios ilibruni'c, ayé mechc jatcáj tu'gu cuerpu. 17Po jeme imunipʉjcʉpay el Señor, jatcáj tu'gu mit el Señor.
18Jinap camchajyo'yga. Jʉmaygapa'tu mal iwatpay tu'c jayau, iguigawajtap may dañu icuerpu. Po jeme chajyo'ypay, ayé mal más iguiwajtap dañu icuerpu. 19¿Ingajawigap ni'c Espíritu Santu ipʉc incuerpujat pa itemplu? Je' tsʉ̱nap injo̱tni'jcat, mit Dios is̈moygau ayé, mit imvidajat caje' pa inje'jat. 20Ni'c Dios is̈juybichingau mit tu'c preciu mʉjway. Jemni'c yo'yga oy pa Dios ma tsʉ̱na oyninʉmic, ni'c je' is̈je'jatcau pi watca oy.
Currently Selected:
1 Corintios 6: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
