1 Corintios 5
5
Ijuzga̱tcap tu'c chajyo'ypay
1Iyacs̈ta'cway inʉmgap ni'c chajyo'ygap mam intsʉ̱nga, po chajyo'ygap más que jayajwat cacupʉjcapay, ni'c hasta tu'c jayau i-aguejpap ite̱t ito's̈ay. 2Po majawe'naj, mijchat mini-oyninʉ́mgʉjʉp, más oyate ma tu'nga injo̱jtat. Más oy pi acpichinga ayé jayau jeme iwatway wename. 3Iyacs̈ta'cway tʉgatsʉ̱nap mit mijchat, po tʉnjawip nat intsʉ̱nga, mit casi tʉtsʉ̱napey mit mijchat. Mit como tʉtsʉ̱nap mit mijchat, tʉnjuzga̱tway jeme iwatway wename. 4Tʉnwamp pi watca yename: Ni-apʉcmújcʉjʉ mit yo'tcaja el Señor Jesucristu ma is̈majyigac, mit casi ʉ̱ tʉtsʉ̱námpey mit mijchat, mit el Señor Jesucristu ipoder tsʉ̱náj mit mijchat. 5Ayé jayau ma tsʉ̱na entrega̱tic Awayagatsna' icʉ'jugum pa ma tunas̈ mʉgʉc pa ma cuyagui ima̱lway to̱u, pa we'n i-espíritu oyáj inisalva̱jtʉ en ayé s̈ʉjw ijuzga̱twa'n el Señor Jesús.
6Ca-oy inyi-oyninʉmgʉjʉ. ¿Ingajawigap ni'c s̈ʉ̱n levadura i-actimamp nu'pʉjʉn harina-cʉ't? 7Limpiá̱tca ayé ampay levadura pa pi jatca limpiu. Incupʉjcanup Cristu, mit mijchat as̈am ma̱s̈anʉ̱n ca-ijtʉpay levadura jeme icaygapay pascuani'c. Ni'c Cristu as̈am tu'c borreguwáy jeme i-ago'jcaway pascuani'c pa nas̈chi'tcajáj nama̱jlat. 8Jemni'c nagatsóuga ayé ma̱s̈ʉjw pascua mit ampay levadura, ni'c ayé levadura imu-e'p puru ma̱jlat, po natsóuga mit ma̱s̈anʉ̱n sin levadura ni'c ayé imu-e'p jeme oyway mit jeme iyacs̈ta'cway.
9Tʉja'ygʉs̈away en tu'c noc pigamunipʉjcʉjʉ jeme chajyo'ygapay. 10Po tʉganʉmgʉs̈ap pi niju'ptangʉjʉ de nu'pʉjʉn maljayajwat ayʉ̱́j mundujway, jeme chajyo'ygapay, tumi̱nwampayna'jat, nu'mpajyat, mit jeme i-adora̱tcapay tiyu̱s̈at. Te tʉnʉmgʉs̈apate pigamunipʉjcʉjʉ je'jat, itpate ti impichingawa'n en ayʉ̱́j mundu mijchat micupʉjcapay. 11Po tʉja'ygʉs̈away cammunipʉjcʉjʉ tu'c jayau jeme inʉmpay ni'c je' hermanu mit te chajyo'yp, te tumi̱nwamp, te i-adora̱tp tiyu̱s̈, te tucotsp, te mu'gajayau o te nu'mpay. Mit wename'jatway ne cammucaygawit. 12Ni'c ¿pa chan tʉs̈juzga̱twa'n jeme canicupʉjcapay? Po mijchat juzgá̱tca jeme cupʉjcapay. 13Ni'c Dios icondena̱tcʉs̈áj jeme cacupʉjcapay. Jinap acpíchinga ayé maljayau mam intsʉ̱nga.
Currently Selected:
1 Corintios 5: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
