1 Corintios 4
4
Lo que iwatcaway apóstojlat
1Jayajwat ma tʉs̈pʉctsougac as̈am Cristu imozojat, ni'c ʉjtsat tʉtsʉ̱ngap encarga̱tic tʉs̈ajque's̈cawa'n jeme Dios tʉs̈actujawigapay, mit ayé nepʉnate igajawip. 2Po encargá̱tijcatway itp ti icumplia̱tcawa'n en nu'pʉjʉn. 3Pa ʉ̱ caje' neti te impensa̱tcap tanti de ʉ̱, ne tʉngawatpey cuenta lo que ipensa̱tcapay jayajwat, ne ʉ̱ mismu tʉngapensa̱tp nat tʉtsʉ̱na. 4Mit tʉngajawip te tʉnwatp mal tʉnyos̈ni'c, po tʉnganʉmp ni'c tʉgatsʉ̱nap sin culpa, po el Señor ayé tʉs̈arregla̱jtámpay tʉmvida, ni'c je' ijawip nat tʉtsʉ̱na. 5Jemni'c cammalninʉmga nepʉn. Atsʉ̱́nga hasta imi'nwa'n el Señor, ni'c je' i-ajcuque's̈áj itpay cuyu'tsic chitimicni'c, mit i-ajcuque's̈áj lo que napensa̱tcapay najo̱tni'jcat. Mit wenajpu'n Dios i-oyninʉmáj cada jayau as̈amu iguiwajt.
6Hermanujat, tʉnʉmgʉs̈au ayʉ̱́j pa pi tsʉ̱nga oy mijchat. Ʉ̱ mit Apolos tʉyajcajau ejemplu, pa we'n impʉctangáj inyo'ygawa'n as̈am itsʉ̱́na ja'yic Dios ilibruni'c, pa we'n inga-oyninʉmgáj tu'c jayau más que jatu'c. 7Ni'c ¿pa chan incupíuga? Nu'pʉjʉn inaguepcapay, Dios is̈moygau. Mit te is̈moygau je', ¿pa chan inyimʉjninʉmgʉjʉ as̈am is̈canimoygapay? ¿Is̈jawiga mijchatu impʉctsougau ayé?
8Impensa̱tcap ni'c inaguepcap nu'pʉjʉn, miri̱cujo'jcatanu, miniwatcʉjʉp as̈am rejyat, mit ʉjtsat is̈yajcau menus. Mit ojalá pi mandá̱tca-ate iyacs̈ta'cway as̈am rejyat pa ʉjtsat tʉmandá̱tca-ey mit mijchat. 9Ʉ̱ tʉpensa̱tp ni'c Dios tʉs̈yajcau ʉjtsat tʉ-apóstojlat más últimu, mit tʉtsʉ̱ngap as̈am condena̱tic pa tʉ-o'jcawa'n, ni'c tʉs̈yajcau tʉs̈tunas̈cawa'n pa tʉs̈-e'pcáj nu'pʉjʉn jayajwat ma tʉs̈burla̱tcac, mit ángejlat tʉs̈-is̈cawey mam tʉs̈tunas̈ca. 10Inʉmgap ni'c tʉtontojat ni'c tʉnwangap Cristu, po mijchat miniwatcʉjʉp as̈am inis̈capcapay lo que i-ajque's̈way Cristu. Ʉjtsat tʉnga-aguepcap maj, po mijchat miniwatcʉjʉp as̈am inaguepcapay maj. Mijchat is̈-oyninʉmgap mit ʉjtsat tʉs̈malninʉmgap. 11Hasta jinap tʉntunas̈cap sin cay, tʉnʉ-u̱go'jcʉjʉp, tʉtsʉ̱ngap sin jamuc, tʉs̈moyta̱jcap mit tʉnga-aguepcap tʉjc mam tʉcoygawa'n. 12Mit cʉs̈ tʉnjo̱jtat tʉyos̈wátca ni'c ʉjtsatu tʉnimantenia̱tcʉjʉp. Tʉs̈malninʉmgap po ʉjtsat tʉn-oyninʉmgap. Tʉs̈po'ctangap po tʉnimajmoygʉjʉp. 13Tʉs̈tucotscap po ʉjtsat tʉn-oymucotscap. Tʉs̈aguepcap as̈am pu̱tsputs en ayʉ̱́j mundu, mit hasta jinap nu'pʉjʉn jayajwat tʉs̈camunipʉjcʉjʉp, tʉs̈aguepcap as̈am ma̱jlatway.
14Tʉgaja'ygʉs̈ap ayʉ̱́j pa pi winchu̱cta̱jca, po pa tʉtsawigʉs̈wa'n mijchat as̈am tʉ̱wajyat tʉwangʉs̈pay. 15Maja i-itwa'naj diez mil ajque's̈pajyat is̈nʉmgajámpay de Cristu, po inga-aguepcap may inte̱jtat. Ʉ̱jyu tʉwayjatcʉs̈ ni'c ʉ̱ tʉ-actugupʉjcʉs̈ Cristu Jesús i-oyway noticia. 16Jemni'c tʉyo'tcʉs̈ap watca as̈am ʉ̱ tʉs̈wat.
17Jemni'c tʉ-ajyu'tcʉs̈au Timoteo. Je' tʉn-e'p as̈am tʉnwáy tʉnwampay, mit je' icumplia̱tp nu'pʉjʉn ni'c icupʉcp el Señor. Je' is̈actunijawigáj nat tʉyo'y pa Cristu, mit nat tʉs̈ajque's̈ jʉmgapa'tu mam nu'pʉjʉn cupʉcpajyat. 18Po cʉjtu'c nimʉjninʉmgʉjʉp ni'c ipensa̱tcap ni'c tʉgajapitugáj mam mijchat. 19Po tʉnʉs̈áj pe'jyu mam mijchat te el Señor iwamp, mit tʉnis̈capáj jeme nimʉjninʉmgʉjʉpay, te itcʉjʉp maj mit Dios, o te jalmanu lo que inʉmgapay. 20Ni'c Dios nas̈camanda̱tcap mit nʉmna'yu, po nas̈manda̱tcap mit poder. 21¿Nat is̈wánga? ¿Tʉnʉs̈wa'n pa tʉche'cta̱jcʉs̈wa'n o pa tʉ-oymucotscʉs̈wa'n?
Currently Selected:
1 Corintios 4: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
