1 Corintios 3
3
Namuyos̈watcap Dios
1Hermanujat, ʉ̱ ca-oyawu tʉmucotscʉs̈ as̈am jeme ipʉctsougaway Espíritu Santu, po tʉmucotscʉs̈ as̈am iwatcapnajway mal, as̈am ya̱wájat inamcupʉjcapnajway Cristu. 2Tʉ-ajque's̈cʉs̈au fácil as̈am in-u̱jcapay leche po tʉgamoygʉs̈u cayan ni'c ca-oyawu is̈cayga ne jinap ca-oyapey. 3Mitsʉ̱ngap as̈am yauya̱wájat ni'c inwangapnaj ma̱jlat iyo'tpay injo̱jtat. Te mini-ángʉjʉp, te mini-ago'jcʉjʉp mit te inwatcap división, ayé ni'c inwatcap ma̱jlat iyo'tpay injo̱jtat, mit miyo'ygap as̈am jayajwat canicupʉjcapay. 4Ni'c tu'c inʉmp: “Ʉ̱ tʉnmutʉgʉyp Pablo”, mit jatu'c inʉmp: “Ʉ̱ tʉnmutʉgʉyp Apolos.” Como inyʉmgap we'n, ayé ni'c mijchat miyo'ygapnaj mal as̈am jayajwat canicupʉjcapay.
5¿Pʉn ayé Pablo mit pʉn ayé Apolos? Ʉjtsat tʉmajyigau pa pi cupʉjca, po el Señor tʉs̈moygau favor tʉwatca we'n. 6Ʉ̱ tʉnyi̱p, mit Apolos imujtsau nʉ', po Dios i-acye'cp nu'pʉjʉn. 7Jemni'c jeme ni̱pay caje' neti ne jeme nʉ'mutspay, po Dios ayé jeme i-acye'cpay nu'pʉjʉn. 8Mit jeme ni̱pay mit jeme nʉ'mutspay nije'jatu, po cada jayau Dios iguitso'gáj as̈am iguiwajt. 9Ni'c ʉjtsat tʉnmuyos̈watcap Dios. Mijchat as̈am tu'c cam jeme Dios i-acye'cpay.
Mit je' is̈watcawey as̈am tu'c tʉjc. 10Mit Dios tʉs̈moy favor as̈am tu'c tʉnjatpay tʉcwat. Ʉ̱ tʉnyi̱jpau ibase mit jatu'c jayau i-ajca's̈ʉ'cp iyucuinm. Po cada jayau ma e'p nat igui-ajca's̈ʉ'c. 11Ni'c nepʉn ca-oyap iguini'p jatu'c base más que jeme itnupay. Ayé inʉmo'jcʉp Jesucristu. 12Mit tu'c jayau i-ajca's̈ʉ'gáj iyucuinm ayé base mit oro, plata, tsa' tsówajatway. Mit jatu'c i-ajca's̈ʉ'gáj mit cujy, mʉjy o pʉ̱yan. 13Po cuque's̈áj lo que iwatway cada jayau en ayé s̈ʉjw ijuzga̱twa'n Dios, ni'c cuque's̈áj mit jʉjn, mit ayé jʉjn iproba̱táj lo que iwatway cada jayau. 14Te tu'c jayau i-ajca's̈ʉ'cp base-yucuinm mit te imajmoyp ayé jʉjn, je' ipʉctsowáj ipremiu. 15Te toyp lo que iwatpay tu'c jayau, i-actogoyáj ayé yos̈, po je'yu nisalva̱jtʉ̱́j as̈am jeme nisalva̱jtʉpay en tu'c jʉnjuc.
16¿Ingajawigap ni'c mijchat as̈am Dios itemplu mit Dios i-Espíritu tsʉ̱nap injo̱tni'jcat? 17Te tu'c jayau i-actogoyda̱cp jeme Dios ipʉcway pa itemplu, Dios icastiga̱táj ayé jayau, ni'c mijchat ayé Dios is̈templujat, mit ayé templu itp ti itsʉ̱nawa'n limpiu.
18Nepʉn maganiwe̱jtʉ je'yu. Te tu'c jayau mam mijchat pensa̱tp ni'c ijatp may en ayʉ̱́j tiempu, ma niwajtʉ as̈am igajatpay pa ma oya iguipʉctanwa'n iyacs̈ta'cway. 19Dios i-e'p as̈am tontería lo que jayajwat ijawigapay en ayʉ̱́j mundu. Ja'yic itsʉ̱na Dios ilibruni'c: “Je' i-actangʉs̈p jeme jatcʉjʉpay ni'c mismu imañajat igui-ajca'ugap.” 20Mit inʉmpatu: “El Señor ijawip ni'c jalmanu lo que ipensa̱tcapay jeme jatcʉjʉpay.” 21Jemni'c nepʉn magamʉjninʉm jayajwat, ni'c Dios is̈moygau nu'pʉjʉn cosa pa mijchat. 22Te Pablo, te Apolos, te Pedro, te ayʉ̱́j mundu, te natsʉ̱ngap o te na-o'jcap, te jinapay tiempu o te ayé tiempu mi'námpay, ayé pa mijchat ni-as̈amu, 23mit mijchat inservia̱tcajap Cristu, mit Cristu iservia̱jtap Dios.
Currently Selected:
1 Corintios 3: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
