1 Corintios 2
2
Pablo i-ajque's̈ ni'c Cristu crucifica̱tic
1Jemni'c hermanujat, cuandu tʉ-ojy mam mijchat, tʉga-oyu pa tʉcotswa'n mit majatway palabra ne as̈am tu'c jayau i-is̈capay may, po solo tʉmpredica̱t lo que inʉmway Dios. 2Ni'c tʉngawanu tʉs̈pensa̱twa'n jatu'c cosa mam mijchat, solo tʉnwan tʉnʉmgʉs̈awa'n ni'c Jesucristu o'c cunu̱s̈ni'c pa iguitso'cwa'n nama̱jlat. 3Cuandu tʉtsʉ̱́naj mit mijchat, tʉnga-aguepu maj mit tʉs̈jawi as̈am tʉpʉ̱tway mit tʉyarato'c. 4Mit tʉgapredica̱tu as̈am jayajwat i-is̈capcapay may ni'c tʉga-obliga̱tcʉs̈u pi cupʉjca, po ayé Espíritu Santu mit Dios ipoder is̈actugupʉjcau. 5Mit ingacupʉjcawu as̈am jayajwat igui-ajque's̈ca, po incupʉjcau ni'c Dios is̈actujawigau ipoder injo̱tni'jcat.
Lo que Espíritu Santu nas̈actujawigapay
6Po tʉnactujawigap jeme más cupʉjcapay mʉgʉc, mit ayé caje' lo que jayajwat ijawigapay ne lo que ijawigapay jeme manda̱tcapay jinap, ni'c je'jat togoygáj. 7Po tʉnyʉmgap lo que Dios tʉs̈actujawigapay, mit jayajwat igajawigapate ti ayé, mit ayé Dios inʉm desde ámbanu ni'c natsʉ̱ngáj salva̱tic. 8Mit nejʉmay manda̱tcapay en ayʉ̱́j mundu iga-entendia̱tcawu lo que Dios ipensa̱tway iguiwatwa'n. Ni'c ma entendiá̱tca-ate, igayajcapate cunu̱s̈ni'c el Señor jeme mʉjninʉmicway. 9Iga-entendia̱tcawu ni'c ja'yic itsʉ̱na Dios ilibruni'c:
Dios i-oyac pa jeme je' iguiwangapay,
Lo que nagani-e'pay, lo que naganimarapay,
ne naganipensa̱tpay najo̱tni'c,
10Po Dios nas̈actujawigau ʉjtsat ni'c nas̈moygau Espíritu Santu, ni'c ayé Espíritu i-is̈cap nu'pʉjʉn hasta más mʉjway ipensa̱tpay Dios.
11¿Pʉn oyap iguijawi ipensa̱tpay tu'c jayau? Solo je'yu ijawip ijo̱tni'c. We'ney nepʉn igajawip lo que Dios ipensa̱tpay, solo Dios i-Espíritu ijawip. 12Mit ʉjtsat nagapensa̱tcap as̈am jayajwat ipensa̱tca, po napensa̱tcap as̈am Espíritu Santu iguiwa'n, ni'c ayé Espíritu Dios nas̈moygap. Pa we'n najawigáj nu'pʉjʉn nas̈moygapay Dios ni'c je' nas̈wano'jcap. 13Mit we'ney naganʉmgap jeme jayajwat ijawigapay po nanʉmgap jeme Espíritu Santu nas̈ajque's̈cajaway, pa we'n jeme itcʉjʉpay Espíritu Santu ipʉctsougáj lo que Espíritu nas̈ajque's̈cajapay.
14Po jeme ca-ijtʉpay Dios i-Espíritu igapʉctso̱p lo que iyacpay Dios i-Espíritu, ni'c je' inʉmp ni'c tontería ayé. Mit ca-oyap igui-entendia̱t ni'c solamente Espíritu Santu nas̈actujawigap ayé. 15Ni'c tu'c jayau ijtʉpay Espíritu Santu i-entendia̱tp nu'pʉjʉn cosa, mit nepʉn iguiganajáj te pensa̱tp oy. 16Ni'c ¿pʉn ijawip nat ipensa̱t el Señor? Mit ¿pʉn oyáj igui-ajque's̈ap? Po majawe'naj ʉjtsat najawigap nat ipensa̱t Cristu.
Currently Selected:
1 Corintios 2: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
