1 Corintios 1
1
Pablo ija'ygʉs̈ap cupʉcpajyat
1Ʉ̱ Pablo. Dios tʉs̈ya̱s̈ tʉ̱jat apóstol pa Jesucristu ni'c we'n iguiwajn Dios. 2Ʉ̱ mit hermanu Sóstenes tʉnsaluda̱tcap Dios icupʉcpajyat tsʉ̱ngapay Corinto. Mijchat Cristu Jesús is̈limpia̱tcau, mit Dios is̈ya̱s̈cau pa is̈jayajwat. Tʉnsaluda̱tcapey nu'pʉjʉn inʉ'jutcapay iyacs̈ta'cway el Señor Jesucristu jʉmgapa'tu. Je'jat ijaycat el Señor, mit ʉjtsatey. 3Dios Nate̱jat mit el Señor Jesucristu pi is̈moygac favor mit paz.
Dios iyacp nu'pʉjʉn favor
4Tʉnyʉmí̱jcap Dios ni'ctiyu̱s̈ pa mijchat ni'c je' is̈moygau favor ni'c inmutʉgʉygau Cristu Jesús. 5Je' is̈moygap nu'pʉjʉn ni'c inmutʉgʉygau je'. Is̈moygap pa incotscawa'n mit pa is̈-is̈capcawa'n nu'pʉjʉn. 6Tʉ-actujawigʉs̈ lo que iwatway Cristu, mit ayé pichin iyacs̈ta'cway ni'c mijchat incupʉjcau je'. 7Mit jinap is̈catogoygap nejʉmay favor i-acmimpay Dios, solo inatsʉ̱ngap ique's̈ta'cwa'n el Señor Jesucristu. 8Mit je' is̈moygáj maj hasta últimu s̈ʉjw, pa we'n nepʉn is̈caculpa̱tcáj en ayé s̈ʉjw itumi'námpay el Señor Jesucristu. 9Mit Dios is̈moygáj maj ni'c je' icumplia̱tp lo que inʉmpay, mit je' is̈ya̱s̈cau pa is̈munipʉjcʉjʉwa'n je' iway Jesucristu el Señor.
División mam cupʉcpajyat
10Hermanujat, tʉnʉmgʉs̈ap pi tsʉ̱nga en acuerdu ni'c is̈ta'c inwangap el Señor Jesucristu, maga-it división mam mijchat, más oy pi tsʉ̱nga en acuerdu mit lo que impensa̱tcapay mit lo que inwatcámpay. 11Tʉnhermanujat, tʉs̈nʉmgajau jeme tsʉ̱ngapay tʉc Cloé ni'c mini-ago'jcʉjʉp. 12Ayʉ̱́j tʉnyʉmo'jcʉp, ni'c cada jayau mam intsʉ̱nga inʉmp: “Ʉ̱ tʉnmutʉgʉyp Pablo.” Jatu'c inʉmp: “Ʉ̱ tʉnmutʉgʉyp Apolos.” Jatu'c inʉmp: “Ʉ̱ tʉnmutʉgʉyp Pedro”, mit jatu'c inʉmp: “Ʉ̱ tʉnmutʉgʉyp Cristu.” 13¿Is̈jawiga itp may Cristujat? ¿Is̈jawiga Pablo iyajcau cunu̱s̈ni'c pa iguitso'cwa'n inma̱jlat? ¿Is̈jawiga minʉ'gutemijcat Pablo inʉ'jyni'c? 14Tʉnyʉjmap Dios ni'ctiyu̱s̈ ni'c nepʉn de mijchat tʉnganʉ'gutemu, solo Crispo mit Gayo tʉnyʉ'gutem, 15pa we'n nepʉn mam mijchat iganʉmáj ni'c minʉ'gutemijcat tʉnyʉ'jyni'c. 16Mit tʉnyʉ'gutemwey Estéfanas ifamilia, mit tʉngajanijawip te tʉnyʉ'gutem jatu'jcat. 17Cristu tʉs̈ca-ajyu'tu pa tʉnʉ'gutemwa'n. Tʉs̈ajyu't pa tʉ-ajque's̈a i-oyway noticia ni'c Cristu nas̈salva̱tcap. Po tʉnajque's̈ fácil pa jayajwat ma jawiga ni'c Cristu o'c cunu̱s̈ni'c pa iguitso'cwa'n nama̱jlat.
Lo que nas̈actujawigapay Dios
18Ʉjtsat tʉnyʉmdacyo'ygap ni'c Cristu o'c cunu̱s̈ni'c pa iguitso'cwa'n nama̱jlat, po jeme togoygámpay inʉmgap ni'c caservia̱tp ayé. Po ʉjtsat najawigap ni'c Dios i-ajque's̈ ipoder cuandu nas̈salva̱tcau. 19Ni'c ja'yic itsʉ̱na Dios ilibruni'c:
Tʉnactogoyda̱jcʉs̈áj lo que jayajwat ijawigapay,
Mit tʉngawatáj cuenta jeme i-entendia̱tcapay may.
20¿Pa ti iservia̱tp tu'c jayau i-is̈capay may? ¿Pa ti iservia̱tp tu'c jayau inʉmpay ni'c je' jajtʉp? ¿Pa ti iservia̱tp idiscutia̱tpay asuntujat ayʉ̱́j mundujway? Dios inʉmp ni'c tonto lo que ijawigapay jayajwat iga-is̈capcapay Dios. 21Como Dios ijawip nu'pʉjʉn, je' inʉm ni'c jayajwat ca-oyáj igui-is̈capcap je' maja iguijawigawa'naj may. Po Dios iwan iguisalva̱tcʉs̈wa'n jeme icupʉjcapay tʉmpredica̱tcapay, mit jayajwat inʉmgap ni'c tontería ayé.
22Ni'c judíujat iwangap igui-e'pcawa'n milagrujat, mit griegujat iwangap iguijawigawa'n más. 23Po ʉjtsat tʉmpredica̱tcap ni'c Cristu iyajcau cunu̱s̈ni'c, mit lo que tʉnajque's̈capay ayé igui-ac-awa'nigap judíujat, mit jeme caje'jatway judíujat inʉmgap ni'c tontería lo que tʉnyʉmgapay. 24Po ayé jeme Dios iya̱s̈cʉs̈way, judíujat mit griegujat itunimoygʉjʉp ni'c Cristu ijtʉp Dios ipoder nas̈tusalva̱tcapay, mit je' nas̈actujawigap ni'c je' ijawip nu'pʉjʉn. 25Te inʉmgap ni'c tontería lo que iwatway Dios, po je' más ijawip que jayajwat. Mit te inʉmgap ni'c Dios ca-ijtʉp poder, po je' más ijtʉp poder que jayajwat. 26Po hermanujat, e'pca nat Dios is̈ya̱s̈cau, inga-is̈capcap may as̈am jayajwat ayʉ̱j mundujway, inga-aguepcap may fama, ne camʉjninʉmijcat infamiliajat. 27Po Dios icupiugʉs̈way jeme i-aguepcapay as̈am tontojat pa igui-acwinchu̱cta̱jcʉs̈wa'n jeme i-is̈capcapay may, mit icupiugʉs̈ey jeme i-aguepcapay as̈am débijlat pa igui-acwinchu̱cta̱jcʉs̈wa'n jeme itcʉjʉpay maj. 28Mit Dios icupiugʉs̈way jeme imalninʉmgapay en ayʉ̱́j mundu mit jeme iga-e'po'jcʉjʉpay. Mit Dios ipʉcp jeme igajatpay neti pa iguicʉs̈pʉ'nwa'n jeme jatcʉjʉpay, 29pa nepʉn maganimʉjninʉjmʉ Dios iwindugʉtʉm. 30Mit je' is̈moygau vida ni'c incupʉjcap Cristu Jesús. Dios iyac Cristu pa nas̈actujawigáj nu'pʉjʉn, pa nas̈yacs̈icninʉmgáj, pa nas̈je'jatcáj mit pa nas̈chi'tcajáj nama̱jlat, 31pa we'n as̈am itsʉ̱na ja'yic Dios ilibruni'c: “Jeme iwampay inimʉjninʉjmʉwa'n, más oy ma mʉjninʉm el Señor.”
Currently Selected:
1 Corintios 1: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
