Romanos I TEJCHIBAL
I TEJCHIBAL
Roma
Ti jiñi oñiyi bʌ juñ tac ba' tsa' ts'ijbunti che' bajche' tsa' tejchi jiñi tejclum i c'aba' Roma, jiñʌch che' ti ja'bil 800 che' maxto tilemic Cristo. Ti jim bʌ ja'bil tsa' cajiyob ti chumtʌl ya' ti wucp'ejl wits tac lʌc'ʌl ti colem ja' i c'aba' Tíber. Che' bʌ tsa' ñumi ca'bʌl q'uiñ tac tsa' cajiyob ti wen p'ojlel, che' jiñi tsa' caji tempayob i bʌ, jinto tsa' sujti ti colem tejclum. Che' ti ja'bil 600 c'ʌlʌl che' ti ja'bil 200 che' maxto tilemic Cristo, ti jim bʌ ora tsa' wen p'ʌt-ayob come junmojt tsa' chʌn ajñiyob, tsa' wen p'ojliyob i taq'uiñ, tsa' wen p'ojli i soldadojob, jiñi cha'añ tsa' caji i chilob majlel jiñi yan tac bʌ tejclum mach bʌ i lumalobic, tsa' caji i yotsañob ti x'e'tel i cha'añ jiñi yan tac bʌ lac pi'ʌlob mu' bʌ i cha'leñob t'añ ti' chajp ti' chajp, jinto tsa' wen p'ojli i ñuclel, tsa' ochi ti' yum pejtelel jiñi tejclum tac am bʌ ti' joytʌlel jiñi colem bʌ mar i c'aba' Mediterráneo.
Che' ti yorajlel Jesús, jiñi Roma tsa' sujti ti ñuc bʌ tejclum ti' tojlel pejtelel jiñi yan tac bʌ tejclum, jinto tsi' mele i yumʌntel ti' tojlel yan tac bʌ tejclum; añ lac pi'ʌlob tsa' bʌ i q'ueleyob ti ñuc, yic'ot añ lac pi'ʌlob tsa' bʌ i q'ueleyob che' bajche' jump'ejl tejclum mu' bʌ i tech ca'bʌl wocol, che' ja'el jiñʌch jump'ejl tejclum but'ul bʌ ti ca'bʌl mulil; pero che' ja'el ya'ʌch ba' tsa' wen p'ojli xñopt'añob; jiñi cha'añ Pablo tsi' ts'ijbubeyob ili juñ cha'añ mi' q'uelob, jiñʌch jump'ejl juñ wen ñuc bʌ i c'ʌjñibal ti' tojlel xñopt'añob.
Isujmlel ili juñ
Ili juñ i cha'añ Pablo ti' tojlel romanojob mi' tsictesan che' bajche' añob i cuxtʌlel jiñi xñopt'añob c'ʌlʌl ti wajali. Jiñi tsa' bʌ i ts'ijba ili juñ mi laj q'uel cha'añ tsi' yʌc'ʌ i bʌ ti' yutslel i pusic'al Dios, yic'ot mi' tsictesan cha'añ pʌybil i cha'añ Dios, jiñi cha'añ ch'ejl tsi' yʌc'ʌ ti cʌjñel jiñi wen t'añ ti' tojlel pejtelel lac pi'ʌlob año' bʌ i ñusa q'uiñ ti chajp ti' chajp.
Ba' ora Pablo tsi' ts'ijbu ili juñ, maxto jula'tʌbilic i cha'añ jiñi xñopt'añob año' bʌ ti Roma (1.10-15), mi laj q'uel cha'añ ili juñ jiñʌch jiñi wen oñ bʌ i ts'ijbujel che' bajche' jiñi yan tac bʌ i ts'ijbujel ti' pejtelel i juñ tac tsa' bʌ i mele. Che' mi laj q'uel jiñi lista tsolbil bʌ i cha'añ ba' woli i chocbeñob majlel cortesía ti capítulo 16, mi laj q'uel cha'añ añ ca'bʌl wiñicob x'ixicob tsa' bʌ i pʌyʌyob, cha'añ mi' cha'leñob e'tel yic'ot ti jiñi wen t'añ che' maxto jula'tʌbilic i cha'añob, che' bajche' mi laj q'uel ti (1.6,7). Jiñi cha'añ jiñi mu' bʌ i wen ña'tañob mi yʌlob cha'añ jiñi capítulo 16 mach ochemic yic'ot ili juñ, mi yʌlob tic'ʌl tsa' ts'ijbunti che' ba' ora tsi' ts'ijbubeyob juñ jiñi xñopt'añob año' bʌ ti Éfeso, come ya'i Pablo tsi' jula'ta cha'yajl uxyajl. (Mi' mejlel laj q'uel ti' tejchibal jiñi juñ cha'añ Efesios).
Ca'bʌl tsi' ña'ta Pablo cha'añ yom i jula'tan jiñi xñopt'añob año' bʌ ti Roma (1.9-10,13,15; 15.22-23), cha'añ mi' majlel i su'b jiñi wen t'añ ya'i (1.15), cha'añ mi' su'ben jiñi hermañujob chuqui i c'ʌjñibalob, cha'añ mi' comol p'ʌt-esañob i bʌ ti' ñopol lac Yum Jesucristo (1.11-12). I yorajlelʌch cha'añ mi' tech i ña'tan España che' bajche' jump'ejl tejclum ba' yom majlel i su'b jiñi wen t'añ; jiñi cha'añ tsi' ña'ta majlel i jula'tan (15.24,28).
Tsi' ña'ta che' ya'añ ti Roma mux i c'ʌjñibʌyel cha'añ mi' toj-esan wocol tac am bʌ ti' tojlel jiñi xñopt'añob. Che' mi laj q'uel jiñi Capítulo 11.11-25; 14.1—15.6, mi' lac taj cha'añ jiñi xñopt'añob yomob i t'ox i bʌ cha'añ ti' caj tsa' caji i contrajiñob i bʌ yic'ot jiñi ñajt bʌ ch'oyolob, lamital judíojob yic'ot jiñi mach bʌ judíojobic (Hch 6.1; Gl 1.7; 2.4).
I yorajlel yic'ot baqui tsa' ts'ijbunti
Ili juñ mi yʌlob cha'añ tsa' ts'ijbunti che' ti ja'bil 55 che' tilemix Cristo, che' bʌ ya'añ Pablo ti Corinto; ili juñ yoma lajal che' bajche' Gálatas; ili juñ tsa' ts'ijbunti ti jiñi jach bʌ ja'bil; jiñi cha'añ yoma lajal tac jiñi cʌntesa ti ili cha'p'ejl libro pero mach la cujilic baqui bʌ libro tsa' ñaxan ts'ijbunti, jiñi cha'añ lamital mi' q'uelob ili libro cha'añ Romanos che' bajche' jiñi jach bʌ cʌntesa am bʌ ti Gálatas, che' ja'el jiñi Gálatas mi' q'uelob che' bajche' jiñi jach bʌ cʌntesa am bʌ ti Romanos. Jiñi ñumen ñuc bʌ jiñʌch i cʌntesa che' bajche' iliyi: Jiñi mulil mu' bʌ i tic'lan pejtelel wiñicob x'ixicob (Rm 1.18—2.11; 3.9-19; Gl 3.10-11; 5.16-21); jiñi mandar i cha'añ Moisés ma'añic mi mejlel i coltañ wiñicob x'ixicob (Rm 2.12-29; 3.19-20; 7.1-25; Gl 2.15-16; 3.11-13,21-26); cojach ti' yutslel i pusic'al Dios tsa' bʌ i pʌsʌ ti Cristo (Rm 1.16-17; 3.21-26; Gl 2.20-21; 4.4-7); che' mi lac ñop Cristo, mi laj q'uejlel ti toj (Rm 3.26,30; 4.1—5.11; Gl 2.16; 3.11,22-26; 5.1-6) yic'ot i yʌc'bal jiñi Espíritu (Rm 8.1-30; Gl 5.22-26).
I cʌntesa yic'ot che' bajche' t'oxbil ili libro
Romanos mi' t'oxtʌl ti cha'mojt: Jiñi ñaxan bʌ jiñʌch puro cʌntesa tac (1.16—11.36); i cha'mojtlel bʌ, jiñʌch lac xic'bentel (12.1—15.13). Ti' tejchibal ili juñ mi lac taj uts'at tac bʌ cʌntesa (1.1-15); ti yujtibal ili juñ mi lac taj jump'ejl lista ba' ts'ijbubilob i c'aba' jiñi tsa' bʌ i cha'leyob e'tel temel yic'ot Pablo (15.14—16.27).
Jiñi cʌntesa mu' bʌ lac taj ti ili juñ jiñʌch tsʌts tac bʌ cʌntesa tsa' bʌ i cha'le Pablo pero mach wocolic ti' ch'ʌmbentel isujm, come Pablo yujil che' bajche' mi' cha'len cʌntesa anquese tsʌts jiñi t'añ tsa' bʌ i c'ʌñʌ pero mach wocolic tsa' mejli i su'b. Tsi' yotsa tac i c'ajtibal pero tsi' yʌq'ue i jac'bal; tsi' taja ti t'añ Oñiyi bʌ Wen T'añ yic'ot tsi' c'ʌñʌ lajiya tac. Jiñi ñumen oñ bʌ jiñʌch jiñi cʌntesa ti' chajp ti chajp. Pablo mi yʌq'ueñonla lac ña'tan che' bajche' chucbil ti p'ʌtʌlel mulil pejtelel wiñicob x'ixicob yic'ot cha'añ ti' bajñelil mach mejlic i bajñel coltañob i bʌ. Mi yʌl che' bajche' tsi' yʌlʌ jiñi (Sal 14.1-3; 53.1-3), cha'añ pejtelel judíojob yic'ot gentilob tsi' laj cha'leyob mulil, ñajt añob ti ñuclel Dios (3.23); cojach Dios mi' mejlel i coltañ jiñi xmulilob, cha'añ jach ti' yutslel i pusic'al mi coltañonla cha'añ tsa' chʌmi lac Yum Jesucristo (3.24).
Jiñi cʌntesa cha'añ i ñopol Dios, jiñʌch wen ñuc bʌ cʌntesa come cojach bajche' jiñi mi' cha' ajñel ti junmojt jiñi xmulil yic'ot Dios, che' bajche' mi tech i yʌl ti 3.21 c'ʌlʌl ti 4.25. Ti ili cʌntesa Pablo tsi' c'ʌñʌ t'añ che' bajche' iliyi: I mandar Dios, i ñusʌntel i t'añ Dios, che' mi laj q'uejlel ti' toj, i yutslel i pusic'al Dios yic'ot che' mi yotsañonla ti Yalobil Dios. Pejtelel iliyi mi mejlel lac taj cojach ti Cristo. Che' mi' cʌy i mul jiñi wiñic, mi' yajñel ti' c'uxbiya Dios yic'ot ti' cuxtʌlel (5.1—8.39).
Ti capítulo 9 c'ʌlʌl ti' capítulo 11, Pablo mi' mel i pusic'al ti' tojlel israelob come ma'añic mi' ña'tañob mi ti Cristo tsa'ix ts'ʌctiyi pejtelel jiñi mandar i cha'añ Dios, yic'ot cha'añ pejtelel mu' bʌ i ñopob Cristo mi' q'uejlelob ti toj (10.4). Pablo mi' ña'tan cha'añ Dios ma'añic mi caj i cʌy i cha'año' bʌ (11.1,2), come mach yujilic q'uextʌyel i pusic'al Dios che' mi yʌq'ueñ i pʌyol yic'ot i c'ʌjñibal jujuntiquil wiñic o x'ixic (11.29). Jiñi israelob mi caj i cha' tajob i wenlel ti jump'ejl bʌ q'uiñ che' ba' ora mi' ñopob Cristo (11.25-28), come Dios mi caj i p'untan jiñi judíojob yic'ot ja'el jiñi gentilob (11.11-24,30-32).
I cha'mojtlel bʌ cʌntesa mu' bʌ lac taj ti ili juñ jiñʌch ti 12.1. Mi lac taj lac xic'bentel cha'añ yom mi' lac cha'len c'uxbiya, yom mi lac cajñel ti xuc'ul ti lac ñopbal yic'ot cha'añ mi lac wen ña'tan che' bajche' yom mi lac cajñel che' tsa'ix lac ñopo Cristo. Pejtelel xñopt'añob yom mi' jac'ob ili mandar che' tempʌbilob (12.3-21; 14.1—15.13), yic'ot ti' tojlel wiñicob x'ixicob (13.7-9) yic'ot ti' tojlel año' bʌ i ye'tel ti pañimil (13.1-7).
Jiñi mu' bʌ i ñop Dios yom mi' pʌs i c'uxbiya. Jiñi cha'añ jiñi mu' bʌ i ñop Dios, ma'añic mi' chañ-esan i bʌ ti' tojlel i pi'ʌlob (12.1—15.13).
Ya' ti capítulo 15.14 c'ʌlʌl ti 16.27, Pablo mi' yujtesan i cʌntesa yic'ot cortesía tac ti' tojlel jiñi tsa' bʌ i cha'leyob e'tel yic'ot, che' bajche' Timoteo, yic'ot Tercio tsa' bʌ i ts'ijbu ili juñ. Che' ja'el mi' taj ti t'añ yaño' bʌ i pi'ʌlob che' bajche' Lucio, Jasón yic'ot Sosípater (v. 21-22); pero ti capítulo 16 mach cojic jach mi' choc tac majlel cortesía pero mi' su'ben ja'el pejtelel jiñi mu' bʌ i pejcañob ili juñ cha'añ yom xuc'ul mi' ñopob Cristo come Dios mi caj i yʌq'ueñonla lac t'uchtan Satanás (v. 20).
Ti yujtibal i cʌntesa mi' ch'ujutesan Dios (16.25-27).
Che' bajche' t'oxbil ili juñ:
I tejchibal (1.1-15)
1. Cʌntesa tac: Laj coltʌntel che' mi lac ñop (1.16—11.36)
2. I xic'bentel bajche' yom mi' yajñel xñopt'añob (12.1—15.13)
I yujtibal (15.14—16.27)
Currently Selected:
Romanos I TEJCHIBAL: NTCH
Highlight
Share
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.