Hechos 25

Pablo ti' tojlel Festo

1Tsa' c'oti Festo#25.1 Jiñʌch Porcio Festo tsa' bʌ ochi ti' q'uexol Félix. Che' ja'el tsi' mele i ye'tel che' bajche' procurador ti Judea che' ti ja'bil 60 c'ʌlʌl tsa' chʌmi che' ti ja'bil 62 che' tilemix Cristo. ya' ti Cesarea cha'añ mi' mel i ye'tel ti yumʌl. Che' ñumeñix uxp'ejl q'uiñ tsa' letsi majlel ti Jerusalén. 2Jiñi cha'añ jiñi ñuc bʌ motomajob yic'ot jiñi año' bʌ ñuc bʌ i ye'tel ti' tojlel judíojob tsa' tiliyob ba'añ Festo, tsi' cha'leyob t'añ ti' contra Pablo, tsi' c'ajtibeyob ti wocol t'añ, 3cha'añ mi' mel bajche' yomob ti' contra Pablo, tsi' c'ajtibeyob cha'añ mi' yʌc' i t'añ cha'añ mi' pʌjyel tilel ti Jerusalén. Come tsi' ña'tayob cha'añ mi' chijtañob ti bij cha'añ mi' tsʌnsañob. 4Jiñi cha'añ Festo tsi' jac'ʌ: “Ya' woli' cʌntʌntel Pablo ti Cesarea, mach jalix mi caj c majlel ya'i. 5Jiñi cha'añ, jiñi wa'chocobil bʌ la' cha'añ, la' ju'bic majlel quic'ot cha'añ mi' su'b mi añ chuqui jontol tsi' mele ili wiñic”, che'en.

6Ya' to tsa' jal-a yic'ot judíojob che' bajche' waxʌcp'ejl o lujump'ejl q'uiñ, ti wi'il tsa' ju'bi majlel Festo ti Cesarea; ti yijc'ʌlal che' buchul ya' ti melobʌjʌl tsi' yʌc'ʌ mandar cha'añ mi' pʌjyel tilel Pablo. 7Che' bʌ tsa' c'oti Pablo, jiñi judíojob tsa' bʌ ju'biyob tilel ti Jerusalén tsa' wa'leyob ti' joytʌlel. Ca'bʌl tsi' jop'beyob ñuc tac bʌ i mul Pablo mach bʌ añic tsa' mejli i tsictesʌbeñob ti isujmlel.#Mc 14.55-59; Lc 23.13-15 8Pablo tsa' caji i coltañ i bʌ, tsi' yʌlʌ:

—Ma'añic chuqui tsa' c wis mele ti' contra i mandar judíojob, mi ti' contra jiñi Templo, mi ti' contra César, —che'en.

9Come Festo yom q'uejlel ti uts'at ti' tojlel judíojob, jiñi cha'añ tsi' c'ajtibe Pablo:

—¿Awom ba letsel majlel ti Jerusalén cha'añ mic melet ya'i? —Che'en.

10Pablo tsi' yʌlʌ:

—Wa'alon ti melobʌjʌl i cha'añ César ba' yom mic mel c bʌ. Ma'añic chuqui tsa' c cha'le ti' contra judíojob, wen awujil. 11Mi xñusa mandaron, mi añ chuqui tsa' c mele mu' bʌ i mejlel i yʌc'on ti chʌmel, la' chʌmicon, pero mi mach isujmic chuqui woli' yʌlob tij contra, ma'añic majqui mi mejlel i yʌc'on ti chʌmel. La' c mel c bʌ ba'añ César.#25.9-11 Pablo yujil cha'añ ya' ti Jerusalén mach tojic mi' caj i cha'leñob meloñel cha'añ ti' cajob judíojob, jiñi cha'añ tsi' c'ajti i mel i bʌ ti' tojlel César, come ya'ʌch yom mi' melob i bʌ jiñi romanojob.

12Che' jiñi Festo, che' bʌ tsa'ix i pejca jiñi año' bʌ i ye'tel, tsi' su'be Pablo:

—Tsa'ix a c'ajtibeyon cha'añ ma' mel a bʌ ba'añ César; ya' mi caj a majlel ba'añ César,#25.12 Festo tsi' yʌc'ʌ t'añ cha'añ uts'at mi' mel i bʌ ti' tojlel César, jiñi cha'añ yom mi' majlel Pablo c'ʌlʌl ti Roma (Hch 27—28). —che'en Festo.

Pablo ti' tojlel Agripa yic'ot Berenice

13Che' ñumeñix cha'p'ejl uxp'ejl q'uiñ, tsa' tili ti Cesarea jiñi rey Agripa#25.13 Agripa: Jiñʌch Herodes Agripa II, o Marco Julio Agripa, i yalobil Herodes Agripa I (Hch 12.1); tsa' caji ti pejcʌntel ti César che' bajche' mi' pejcʌntel jiñi rey ti' lumal. Isujm Herodes tilem ti' p'olbal juntiquil judío. Agripa tsi' teme i t'añ yic'ot romanojob pero ma'añic tsa' wen ajñi che' bajche' mi' ch'ujutesayob Dios judíojob; isujm, Pablo tsi' pejca che' bajche' mi' cha'leñob t'añ judío (Hch 26.3-8,27). yic'ot Berenice#25.13 Berenice: I yeran Agripa yic'ot Drusila (Hch 24.24), tsa' ajñi yic'ot ca'bʌl i ñoxi'al, ti wi'il tsa' chumle yic'ot i yeran. i yijñam cha'añ mi' yʌq'ueñob i yutslel i t'añ Festo. 14Che' bʌ tsa' jal-a ya'i, Festo tsi' yʌq'ue i cʌñ jiñi yumʌl che' bajche' woli' mel i bʌ Pablo, tsi' su'be:

—Wʌ'an juntiquil wiñic tsa' bʌ i cʌyʌ ti mʌjquibʌl jiñi Félix, 15che' bʌ tsajñiyon ti Jerusalén, jiñi ñuc bʌ motomajob yic'ot jiñi xñoxob año' bʌ i ye'tel cha'añ judíojob tsa' c'otiyob ba'añon, tsi' c'ajtibeyoñob cha'añ mi cʌq'uen i toj i mul.

16Tsa' c jac'beyob, ma'añic mi' mejlel i to'ol ac'ob ti chʌmel wiñic jiñi romanojob che' ma'añic mi' ñaxan tilelob i contra cha'añ mi' su'bob i mul ya' ti' wut cha'añ mi mejlel i coltañ i bʌ che' añ chuqui mi' su'bob ti' contra.#25.16 Che'ʌch añob i mandar jiñi romanojob. 17Che' bʌ tsa' c'otiyob ba'añon, mach jalic tsa' c teche meloñel, ti yijc'ʌlal tsa' buchleyon ya' ti melobʌjʌl, tsa' cʌc'ʌ mandar cha'añ mi' pʌjyel tilel jiñi wiñic. 18Che' bʌ ya'ix añ i contrajob, mach che'ic tsi' su'buyob i mul bajche' tsa' c lon ña'ta, 19jiñi jach tsi' contrajiyob Pablo cha'añ i ñopbalob, cha'añ tsi' taja ti t'añ juntiquil i c'aba' Jesús tsa'ix bʌ chʌmi, pero Pablo mi' su'b cha'añ cha' cuxul. 20Ma'añic tsa' c ña'ta bajche' yom mic mel jiñi wiñic, jiñi cha'añ tsa' j c'ajtibe Pablo mi yom majlel ti Jerusalén cha'añ ya'i mi' mel i bʌ. 21Pero Pablo tsi' c'ajtibeyon cha'añ mi majlel i mel i bʌ ba'añ Augusto, jiñi cha'añ tsa' cʌc'ʌ mandar cha'añ mi' cʌntʌntel jinto mi mejlel c choc majlel ba'añ César.#25.21 César: Nerón, emperador tsa' bʌ i mele i ye'tel che' ti ja'bil 54 c'ʌlʌl ti ja'bil 68 che' tilemix Cristo.

22Che' jiñi Agripa, tsi' su'be Festo:

—Joñon ja'el com cu'biben i t'añ jiñi wiñic, —che'en.

Festo tsi' su'be:

—Ijc'ʌl mi caj a wu'bin.

23Ti yijc'ʌlal wen ch'ʌlbil#25.23 Wen ch'ʌlbil: I tilelʌch jiñi yumʌlob mi' wen ch'ʌlob i bʌ. tsa' tiliyob Agripa yic'ot Berenice, tsa' ochiyob ba' mi' yu'biñob t'añ yic'ot jiñi año' bʌ ñuc bʌ i ye'tel yic'ot jiñi ñuco' bʌ wiñicob ti jiñi tejclum. Tsa' pʌjyi tilel Pablo cha'añ ti' mandar Festo. 24Che' jiñi Festo tsi' yʌlʌ:

—Rey Agripa yic'ot pejtelel wiñicob tempʌbilob bʌ quic'ot lojon, wolix la' q'uel jiñi wiñic. Pejtelel judíojob tsi' wersa su'beyoñob ti c'am bʌ t'añ ya' ti Jerusalén yic'ot wʌ'i cha'añ mach chʌn yomic che' chʌn cuxul. 25Tsa' c ña'ta ma'añic chuqui jontol tsi' mele cha'añ mi' chʌmel. Pablo tsi' c'ajti i mel i bʌ ba'añ Augusto, jiñi cha'añ tsa' c su'be cha'añ muc'ʌch caj c choc majlel.#Hch 18.14-15; 23.29 26Come ma'añic chuqui mi mejlel c ts'ijbuben jiñi c yum ti' contra Pablo, jiñi cha'añ tsa' c pʌyʌ tilel ti la' tojlel yic'ot ti a tojlel ja'el, rey Agripa, cha'añ ma' su'beñon chuqui mi mejlel c ts'ijbuben jiñi c yum che' bʌ tsa'ix a c'ajtibe pejtelel chuqui tac tsa' ujti, 27come mi cʌl mach yomic mic choc majlel xñujp'el mi ma'añic chuqui mi mejlel c su'b ti' contra, che'en Festo.

Currently Selected:

Hechos 25: NTCH

Highlight

Copy