Hechos 24

Pablo tsi' su'bu i bʌ ti' tojlel Félix

1Che' bʌ tsa' ñumi jo'p'ejl q'uiñ, tsa' ju'bi majlel ti Cesarea jiñi ñuc bʌ motomaj i c'aba' Ananías yic'ot cha'tiquil uxtiquil xñoxob año' bʌ i ye'tel yic'ot juntiquil i c'aba' Tértulo wen yujil bʌ t'añ. Tsa' majli i pejcañob jiñi gobernador ti' contra Pablo. 2Che' bʌ tsa' pʌjyi tilel Pablo ba'añob, Tértulo tsa' caji i jop'ben i mul Pablo, tsi' yʌlʌ:

—Cha'añ ti a we'tel ti yumʌl ñʌch'ʌl añon lojon tic lumal, cha'añ ti a ña'tʌbal uts'at woli' cʌntʌntelob c pi'ʌlob tic lumal, 3uts'atet bʌ Félix, ti pejtelel ora uts'at mij q'uel lojon a melbal ti pejtelel c lumal, jiñi cha'añ mic su'beñet lojon wocolix a wʌlʌ.#24.2-3 I tilelʌch che' mi' su'beñob yumʌlob che' bajche' jiñi, come Félix jiñʌch juntiquil yumʌl jontol bʌ mach bʌ añic tsi' pʌsʌ i yutslel. 4Mach comic c jalitesañet lojon ti ca'bʌl t'añ, jiñi jach mij c'ajtibeñet lojon cha'añ ma' poj u'bibeñon lojon ts'ita' c t'añ ti' yutslel a pusic'al. 5Come tsa'ix j q'uele lojon cha'añ ili wiñic ca'bʌl woli' tic'lañon lojon, mi' tech leto ti pejtelel pañimil baqui jach añ judíojob, ili wiñic ñumen ch'ejl mi' mel i bʌ che' bajche' yaño' bʌ tsa' bʌ i tsajcʌbeyob i cʌntesʌbal jiñi wiñic ch'oyol bʌ ti Nazaret. 6Tsi' ñopo i bi'b-esan jiñi Templo ja'el; pero tsa' c chucu lojon. [Tsa' c ña'ta c mel lojon che' bajche' mi' yʌl tic mandar lojon, 7pero jiñi Lisias am bʌ ñuc bʌ i ye'tel cha'añ soldadojob, tsi' colta, tsi' wersa chili loq'uel Pablo tij c'ʌb lojon. 8Lisias tsi' su'be i contrajob Pablo cha'añ mi' tilelob ba'añet.] Che' ma' c'ajtiben ili wiñic, mi caj a ña'tan isujm pejtelel i mul tsa' bʌ c su'beyet lojon.#24.6-8 Jiñi i yujtibal jiñi versículo 6, versículo 7 yic'ot i tejchibal jiñi versículo 8 ma'añic ti yan tac bʌ Biblia: 6Tsa' c ña'ta c mel lojon che' bajche' mi' yʌl tic mandar lojon, 7 pero jiñi Lisias am bʌ ñuc bʌ i ye'tel cha'añ soldadojob, tsi' colta, tsi' wersa chili loq'uel Pablo tij c'ʌb lojon. 8 Lisias tsi' su'be i contrajob Pablo cha'añ mi' tilelob ba'añet.

9Jiñi judíojob, tsi' yʌlʌyob ja'el cha'añ isujmʌch ti' pejtelel che' bajche' tsi' yʌlʌ Tértulo. 10Che' bʌ tsi' pʌsʌ i c'ʌb jiñi gobernador cha'añ mi' cha'len t'añ Pablo, tsi' yʌlʌ:

—Come cujil ca'bʌlix ja'b woli a cha'len yumʌntel ti ili lum; jiñi cha'añ wen tijicña mic su'b c bʌ ti a tojlel. 11Majqui jach mi mejlel a c'ajtiben, mux i su'beñet cha'añ añ jaxto lajchʌmp'ejl q'uiñ tsa' letsiyon ti Jerusalén cha'añ mic ch'ujutesan Dios; 12ma'añic tsi' tajayoñob che' añ majqui woli j cʌlʌx pejcan ya' ti Templo, mi ti sinagoga mi ti jiñi tejclum, ma'añic tsa' c xic'beyob wiñicob x'ixicob cha'añ mi' tempañob i bʌ, 13mi muq'uic jax i mejlel i tsictesañob ti isujm i t'añ woli bʌ i jop'ob tij contra. 14Pero mic su'beñet ti isujm: Woli c tsajcan ja'el i bijlel Cristo, anquese mi' yʌlob sojquem bajche' mic ch'ujutesan Dios tsa' bʌ i ñopoyob c ñojte'el; mic ñop pejtelel mu' bʌ i yʌl jiñi mandar yic'ot chuqui tac ts'ijbubil ti' t'añ x'alt'añob;#24.14 Jiñi mandar yic'ot chuqui tac ts'ijbubil ti' t'añ x'alt'añob: Jiñʌch jiñi Oñiyi bʌ Wen T'añ (Hch 26.22; 28.23). 15añʌch c pijtaya ti Dios, jiñi jach mu' bʌ i ñopob ja'el, come tal i yorajlel che' mi caj i ch'ojyelob jiñi chʌmeño' bʌ, jiñi tojo' bʌ yic'ot jiñi mach bʌ tojobic.#Dn 12.2; Jn 5.28-29; Hch 23.6; 26.6-8 16Jiñi cha'añ mic chʌn cha'len wersa c mel chuqui toj ti' wut wiñicob yic'ot ti' wut Dios cha'añ ma'añic mi' cajel ti t'añ c pusic'al.#Hch 23.1

17Che' bʌ tsa' ñumi cha'p'ejl uxp'ejl ja'b, tsa' tiliyon cha'añ mi cʌq'ueñob taq'uiñ jiñi p'ump'uño' bʌ tic lumal, yic'ot cha'añ mi cʌq'uen Dios i majtañ ja'el.#24.17 Tic'ʌl jiñʌch jiñi ofrenda tsa' bʌ i ch'ʌmʌyob tilel cha'añ p'ump'uño' bʌ ti Jerusalén (Hch 20.1-6). 18Che' bʌ woli cʌq'uen Dios i majtañ, cha'tiquil uxtiquil judíojob ch'oyolo' bʌ ti Asia tsi' tajayoñob ti Templo, sʌc-esʌbilon, ma'añic ca'bʌl wiñicob quic'ot, ma'añic woliyon lojon ti ca'bʌl t'añ. 19Jiñob yom mi' tilelob ti a tojlel cha'añ mi' su'bob mi añ c mul, yic'ot mi añ chuqui mi' yʌlob tij contra.#Hch 21.17-28 20La' i su'bob jiñi wʌ' bʌ añob mi añ c mul che' bʌ tsa' wa'leyon ba' tsi' tempayob i bʌ jiñi año' bʌ i ye'tel, 21cojach jiñi t'añ tsa' c su'beyob che' ya' wa'alon ti' tojlelob: “Pʌybilon cha'añ mic mel c bʌ wʌle ti la' tojlel, come mic ñop cha'añ mi' cha' ch'ojyelob chʌmeño' bʌ”,#Hch 23.6 che'en Pablo.

22Che' bʌ tsa' ujti i yu'bin jiñi t'añ, Félix mach yomic i bʌc' cha'len meloñel ti' tojlel Pablo, come tsa'ix su'benti isujmlel che' bajche' añob jiñi woli bʌ i tsajcañob i bijlel Cristo. Tsi' poj cʌyʌ jiñi tempa bʌ, tsi' yʌlʌ:

—Jinto mi' ju'bel tilel Lisias, jiñi ñuc bʌ i ye'tel, mi caj c melet, —che'en.

23Tsi' su'be i yaj capitán soldadojob cha'añ mi' cʌntan Pablo, pero mach yomic mi' junyajlel ñup', uts'at mi' tilel i pi'ʌlob Pablo cha'añ mi' yʌq'ueñob chuqui yom.

24Che' bʌ tsa' ñumi cha'p'ejl uxp'ejl q'uiñ tsa' tili Félix yic'ot i yijñam i c'aba' Drusila,#24.24 Drusila: Jiñʌch ijts'iñʌl bʌ i yalobil Herodes Agripa I (Hch 12.1), i yerañob jiñʌch Herodes Agripa II yic'ot Berenice (q'uele Hch 25.13); Drusila tsi' cʌyʌ ñaxan bʌ i ñoxi'al rey bʌ ti Emesa, cha'añ mi' ñujpuñijel yic'ot Félix. jiñʌch ja'el judía. Félix tsi' pʌyʌ tilel Pablo, tsi' yu'bibe i t'añ che' bʌ tsi' su'be bajche' yom mi lac ñop Jesucristo. 25Tsi' su'be bajche' yom mi lac taj toj bʌ lac pusic'al yic'ot bajche' yom mi lac bajñel tic' lac pusic'al yic'ot bajche' mi caj i melonla Dios, Félix tsi' cha'le bʌq'uen, tsi' su'be:

—Jasʌlix wʌle, cucux, che' mic tajben i q'uiñilel, mi caj c cha' choquet ti pʌyol, —che'en.

26Félix tsi' ña'ta cha'añ Pablo mi caj i yʌq'ueñ taq'uiñ cha'añ mi' yʌc' ti colel. Jiñi cha'añ ca'bʌl tsi' pʌyʌ tilel ba'añ, cha'añ mi' cha'len t'añ yic'ot. 27Pero che' ñumeñix cha'p'ejl ja'b tsa' ochi Porcio Festo i tajben i ye'tel Félix; Félix tsi' cʌyʌ Pablo ti mʌjquibʌl come yom q'uejlel ti uts'at ti' tojlel judíojob.#24.27 Félix: Tsa' chilbenti i ye'tel, pero tsi' pʌyʌ majlel jiñi emperador Nerón ti Roma; yom q'uejlel ti uts'at ti' tojlel judíojob cha'añ ma'añic mi' sujbel i mul, pero jiñi judíojob tsi' wa'chocoyob wiñicob cha'añ mi majlelob ti Roma cha'añ mi' tsictesañob cha'añ mach weñic tsi' mele i ye'tel Félix.

Currently Selected:

Hechos 24: NTCH

Highlight

Copy