romana 5
5
1ē kwayaskitātisiwakēyimikawiyahk māka tāpwēyēyitamowin ohci, pēyatakēyimowin ayātāk kisēmanitonāhk wiya ohci kā tipēyimikoyahk cisas Christ; 2ēwako mina ohci kā ki pihtokēyahk oma kisēwātotakowin ita kā nipawiyahk tāpwēyēyitamowin ohci; mina māmatākositāk ē pakosēyimoyahk o kistēyitākosiwin kisēmanito. 3namawiya māka ēwako piko, māka māmatākositāk mina kit āyimisiwinināhk: ē kiskēyitamahk āyimisiwin isi atoskēmakan sipēyitamowin; 4mina sipēyitamowin maskawātisiwin; mina maskawātisiwin, pakosēyimowin: 5pakosēyimowin māka namawiya nanēpēwiiwēw cikēmā o sākihiwēwin kisēmanito ē ki sikinikātēk ki tēhināhk kā kanātisit ahcāhk ohci kā ki miyikawiyahk. 6wiya kēyāpic ē nēsowisiyahk, ē tipipayik iyikohk Christ ki nipostamawēw ēkā kā manitowātisiyit. 7cikēmā akāwāc ē kwayaskitātisiyit ayisiyiniwa awiyak kita nipostamawēw: māskoc ē miywātisiyit ayisiyiniwa kikihk nāntaw awiyak kita tēpēyimo kita nipostamawāt. 8māka kisēmanito nokotāw ē isi sākihikoyahk, anima, ē mēkwā maciitiyahk, Christ ki ki nipostamākonaw. 9tāniyikohk māka awasimē, ēkwa ē kwayaskitātisiwakimikawiyahk o mihko ohci, ki ka mitākwēnamākawinānaw o kisiwāsiwin kisēmanito wiya ohci. 10cikēmā kispin, mēkwāc ē pakwātāyahk, ki ki ototēmiikawinānaw kisēmanito okosisa o nipowiniyiw ohci, tāniyikohk wāwis, ē ototēmiikawiyahk, ki ka pimāciikawinānaw o pimātisiwin ohci; 11namawiya māka ēwako piko, māka ki māmatākosistawānaw kisēmanito wiya ohci kā tipēyimikoyahk cisas Christ, ēwako ohci kā ki miyikawiyahk ēkwa oma ototēmiikowin.
12 #
cēnisis 3:6
ēkosi māka, pēyak ayisiyiniw ē ki ohci pihtokēmakahk maciitiwin ota askihk, mina nipiwin maciitiwin ohci; ēkosi māka nipiwin kā isi tikakoskākot kahkiyaw ayisiyiniw, wiya kahkiyaw ē ki waniitit: 13cikēmā isko oyasowēwin maciitiwin ki ayāw askihk: māka maciitiwin namawiya awiyak akwātamawāw ēkā ē ihtakwahk oyasowēwin. 14ēyiwēhk māka nipiwin ki tipēyimiwēmakan ātam ohci piyis mosis, ahpo aniki ē tipēyimikocik ēkā kā ki ohci wanitotahkik mwēhci tāpiskoc ātam o wanitotamowin, ēwako kā ki kiskinaātiskamawāt anihi kē takosiniyit. 15māka namawiya tāpiskoc wanitotamowin, ēkosi isi anima mohci mēkiwin cikēmā o wanitotamowin pēyak mihcēt kā ki ohci nipicik, wāwis ayiwāk o kisēwātisiwin kisēmanito, mina anima mēkiwin o kisēwātisiwin ohci pēyak ayisiyiniw, cisas Christ, ki wēyoci ayāwak mihcēt. 16namawiya māka tāpiskoc pēyak ohci kā wanitotahk, isi ayāw mēkiwin: cikēmā pēyak ohci oyasowēwin ki ihtakwan kita nānipomiwēk, māka wiya mohci mēkiwin mihcēt wanitotamowina ohci ki ihtakwan kwayaskitātisiwakicikāsowinihk isi. 17cikēmā kispin o waniitiwin ohci pēyak, nipiwin ki tipēyimiwēmakan ana pēyak ohci; wāwis aniki kā miyikowisicik ē isi wēyotahk kisēwatisiwin mina anima mēkiwin kwayaskitātisiwin kita kihcāyiwiwak pimātisiwinihk aniki pēyak ohci, cisas Christ oti.
18ēkosi māka tāpiskoc pēyak wānitotamowin oyasowēwin kā ki otihtikot kahkiyaw ayisiyiniw kita nānipomikot; ēkosi isi mina, pēyak isihcikēwin kwayaskitātisiwinihk mohci mēkiwin ki otihtik kahkiyaw ayisiyiniw kita kwayaskitātisiwakimiht pimātisiwinihk. 19cikēmā tāpiskoc pēyak ayisiyiniw ot ānwētamowin ohci omihcētiwat owanitotamowak kā ki isiihcik, ēkosi isi mina o nanaitamowin ana pēyak ohci omihcētiwak kita kwayaskitātisiāwak. 20ēkosi oyasowēwin ki tako pihtokēmakan, waniitiwin kita wēyoci ayāk; māka ita maciitiwin ē wēyoci ayāk, kisēwātisiwin ki ayiwāki wēyoci ayāw: 21ēkosi, maciitiwin kā ki isi tipēyimiwēmakahk nipiwinihk, ēkosi isi kisēwātisiwin kita tipēyimiwēmakahk kwayaskitātisiwinihk piyis kākikē pimātisiwinihk wiya ohci cisas Christ kā tipēyimikoyahk.
This Bible text is a transliteration of a corrected edition of the 1908 Western Cree Bible; it is in the public domain.