sēnt mātyo 7
7
1ēkāwiya oyasowāsiwēk, kita ēkā kistawāw oyasowātikawiyēk. 2#mārk 4:24kēkway itasowēwin kē itasowāsiwēyēk, ēkosi kistawāw kē itasowātikawiyēk; mina kēkway tipahikan kē isi tipahikēyēk, ēkosi kistawāw kē isi tipahamākawiyēk. 3tānēki mina kā wāpahtamwat kiciwām kā pisinit, ēkā māka ē māmitonēyitaman kā pimitāskwamok tipiyawē kiskisikohk? 4ahpo tānisi kē ki isi itat kiciwām, māhti ni ka otinēn kā pisiniyan; māka, cist, pimitāskwamon kiya kiskisikohk? 5kiya otayamihēkāsosk, nikān wēpina kā pimitāskwamok kiya kiskisikohk; ēkwa māka kē nahāpiyan kita otinamwat kā pisinit kiciwām.
6ēkāwiya miyihkok kēnātaniyik atimwak, mina ēkāwiya wēpinamāhkok ki wāwēsihowiniwāwa aniki kokosak, māskoc wiya kita tatakoskātamwak sipā o sitiwāhk, mina kita pē kwēskiwak kita pisipitikoyēkok.
7natotamāk, ki ka miyikawināwāw māka; nanātonikēk, ki ka miskēnāwāw māka; pāpāwahikēk ki ka pāskitēnamākawināwāw māka; 8cikēmā tahto awiyak kā natotamāt otinam; mina ana kā nanātonikēt miskam; mina ana kā pāpāwahikēt kita pāskitēnamawāw. 9ahpo kēko ayisiyiniw kiyawāw kispin okosisa pakwēsikana natotamākot, asiniya ci kita miyēw? 10ahpo kinosēwa natotamākot, kinēpikwa ci kita miyēw? 11kispin māka kiyawāw ē āta macāyiwiyēk, kēskēyitamowēkwē kē isi miyo miyayēkwāw kit awāsimisiwāwak, tāniyikohk māka wiya awasimē, kotāwiwāw kihci kisikohk kā ayāt kē miyāt miyo kēkwaya anihi kā natotamākot? 12#lok 6:31ēwako māka ohci kahkiyaw kēkwaya kē isi natawēyitamawāyēkwāw ayisiyiniwak kita totākoyēkok, mwēhci ēkosi kistawāw totāhkok; cikēmā ēwako oma oyasowēwin mina okiskiwēhikēwiyiniwak.
13pihtokēk anima kā sākāwāk iskwātēm; cikēmā ayakaskāw iskwātēm, mina ayakaskatamon mēskanaw, nisiwanātisiwinihk kā itamok, mihcētiwak māka ēkota ē pihtokēcik: 14cikēmā sākāwāw iskwātēm, mina sākawamon mēskanaw pimātisiwinihk kā itamok, cakawāsisiwak māka kā miskahkik.
15ayākwāmisistākok kiyāskiwi okiskiwēhikēwak, kā pē nātikoyēkok ē māyatihkowiyātahkik, māka piciyaw ē okāsikimi mahihkaniwicik. 16otitātisiwiniwāwa ki ka ohci kiskēyimāwāwak. ayisiyiniwak ci mawiswātēwak sōmina okāwiminakasiyātikohk ohci, ahpo minisa macānaskihk ohci? 17ēkosi mwēhci kā tahto miyowātikowit mistik miyo minisiwiw; māka wiya macāhtik maci minisiwiw. 18namawiya miwāhtik kita ki maci minisiwiw, mina namawiya macātik kita ki miyo minisiwiw. 19#mātyo 3:10; lok 3:9tahto mistik ēkā kā miyo minisiwit kiskatawāw, ē macostēhot māka. 20#mātyo 12:33kē isi minisiwicik ki ka ohci kiskēyimāwāwak.
21namawiya tahto aniki kā isicik, tēpēyihcikēyan, tēpēyihcikēyan, kita pihtokēwak kihci kisikowi otēnawiwinihk; māka ana kā totahk ētēyitamiyit notāwiya kihci kisikohk kā ayāyit. 22mihcēt ni ka itikwak ēwako kisikāki, tēpēyihcikēyan, tēpēyihcikēyan, nama ci ni ki kiskiwēhikānān ki wiyowinihk? mina ki wiyowinihk ni ki ohci wayawi wēpinānānak maci ahcāhkwak? mina ki wiyowinihk ni ki ohci totēnān mihcēt māmaskāci atoskēwina? 23#nikamona 6:8ēkwa māka kē itakik, namawikāc ki ki kiskēyimitināwāw; awasitik kiyawāw kā atoskātamēk macitotamowin.
24ēwako māka ohci awiyak pēhtahki ohi nit itwēwina, mina itotahki, kē isi āwēak iyinisiwi ayisiyiniw, kā ki ositāt o wāskāhikan takōc kistāpiskohk: 25ki kimiwan māka, mina ki yiskipēw, ki yotin māka, mina ki pakamipayiw ēkota wāskāhikanihk; namawiya māka ki pahkihtin; cikēmā ē ki osihtāniwik tahkoc kistāpiskohk. 26mina tahto awiyak pēhtahki ohi nit itwēwina, ēkā māka ē totahk, kita isi āwēāw kā kakēpātisit ayisiyiniw kā wāskāhikanikēt yēkawiskāhk; 27ki kimiwan māka, mina ki yiskipēw, ki yotin māka, mina ki pakamipayiw ēkota wāskāhikanihk; ki pahkihtin māka; mistahi māka ki nisiwanācihcikēpayiw.
28 #
mārk 1:22; lok 4:32 ēkosi ki ihkin, ispi cisas kā poni ayitwēt ohi itwēwina. ayisiyiniwak ki māmaskāsitamwēwak o kiskinohamākēwiniyiw; 29cikēmā ki isi kiskinohamāwēw tāpiskoc ē ayāt kaskihēwisiwin, namawiya tāpiskoc masinahikēwiyiniwak.
This Bible text is a transliteration of a corrected edition of the 1908 Western Cree Bible; it is in the public domain.