ᓂᐢᑕᒼ ᓵᒼᔪᐃᓬ 4
4
1ᐅᐟ ᐃᑌᐧᐃᐧᐣ ᒫᑲ ᓵᒼᔪᐃᓬ ᑭᐦ ᐅᑎᐦᑎᑲᐧᐠ ᑲᐦᑭᔭᐤ ᐃᐢᕒᐁᐃᓬ. ᐁᑲᐧ ᒫᑲ ᐃᐢᕒᐁᐃᓬ ᑭᐦ ᓇᑐᐸᔨᐢᑕᐁᐧᐊᐧᐠ ᐱᓬᐃᐢᑎᓇ, ᑭᐦ ᑲᐯᓯᐊᐧᐠ ᒫᑲ ᒋᑭ ᐁᐱᓂᓴᕒᐃᕽ; ᐱᓬᐃᐢᑎᓇᐠ ᒫᑲ ᑭᐦ ᑲᐯᓯᐊᐧᐠ ᐋᐦᐯᑭᕽ. 2ᐁᑯᓯ ᐱᓬᐃᐢᑎᓇᐠ ᑭ ᐊᐧᐁᐧᔨᑲᑕᐁᐧᐊᐧᐠ ᐃᐢᕒᐁᐃᓬᐊ, ᐃᐢᐱ ᒫᑲ ᓂᔪᑎᓂᑐᒋᐠ, ᐃᐢᕒᐁᐃᓬ ᑭᐦ ᓵᑯᒋᐦᐃᑲᐧᐠ ᐱᓬᐃᐢᑎᓇᐠ, ᑭᐦ ᓂᐸᐃᑲᐧᐠ ᒫᑲ ᐃᑕ ᐊᓂᒪ ᑳ ᑭ ᓄᑎᓂᑐᒋᐠ ᓈᐣᑕᐤ ᓀᐋᐧᐤ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ.
3ᐃᐢᐱ ᒫᑲ ᐊᔨᓯᔨᓂᐊᐧᐠ ᑌᑯᓯᑭᐠ ᐅ ᑲᐯᓯᐃᐧᓂᐊᐧᕽ, ᑳ ᓂᑳᓀᔨᐦᑖᑯᓯᒋᐠ ᐃᐢᕒᐁᐃᓬ ᑭ ᐃᑌᐧᐊᐧᐠ, ᑖᓀᕽ ᐅᒪ ᑳ ᑎᐯᔨᐦᒋᑫᐟ ᑳ ᐃᐦᑐᑖᑯᔭᕽ ᑭᑕ ᓵᑯᒋᐦᐃᑯᔭᑯᐠ ᐱᓬᐃᐢᑎᓇᐠ? ᒫᐦᑎ ᓈᑕᑖᐣ ᐅ ᑭᐢᑭᓇᐋᒋᐅᐃᐧᓂᐊᐧᐟ ᑳ ᑎᐯᔨᐦᒋᑫᐟ ᓴᐃᓬᐆᐃᕽ ᐅᐦᒋ, ᐁᐊᐧᑯ, ᐃᐢᐱ ᑕᑯᓯᓄᒪᑲᐦᑭ ᑭᑕ ᐱᒫᒋᐦᐃᑯᔭᕽ ᐅ ᒋᐦᒋᐋᐧᕽ ᐅᐦᒋ ᑭ ᓄᑎᓈᑲᓂᓇᐊᐧᐠ. 4#ᐁᐠᓴᑕᐢ 25:22ᐁᑯᓯ ᐊᔨᓯᔨᓂᐊᐧᐠ ᑭ ᐃᑎᓴᐁᐧᐊᐧᐠ ᐊᐃᐧᔭ ᓴᐃᓬᐆᐃᕽ ᑭᑕ ᐯᑖᔨᐟ ᐁᑯᑕ ᐅᐦᒋ ᐊᓂᒪ ᐅ ᑭᐢᑭᓇᐋᐧᒋᐅᐃᐧᓂᐅᐊᐧᑎᔨᐤ ᑳ ᑎᐯᔨᐦᒋᑫᔨᐟ ᒫᒪᐁᐧᔭᐢ ᓯᔪᑳᑎᓯᔨᐟ ᑳ ᐊᔮᐟ ᑕᐢᑕᐋᐧᔨᕽ ᐊᓂᐦᐃ ᒉᕒᐊᐱᒼ; ᐊᓂᐦᐃ ᒫᑲ ᐁ ᓂᓯᔨᐟ ᐃᓬᐋᐩ ᐅᑯᓯᓴ ᐦᐋᑊᓇᐩ ᒥᓇ ᐱᓂᐋᐢ ᐁᑯᑕ ᑭ ᐊᔮᐊᐧᐠ ᐁ ᐃᐧᒉᑕᑭᐠ ᐊᓂᒪ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑭᓭᒪᓂᑐᐊᐧ. 5ᐃᐢᐱ ᒫᑲ ᐊᓂᒪ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑳ ᑎᐯᔨᐦᒋᑫᐟ ᑌᑯᓯᓄᒪᑲᕽ ᑲᐯᓯᐃᐧᓂᕽ, ᑲᐦᑭᔭᐤ ᐃᐢᕒᐁᐃᓬ ᑭ ᑭᐦᒋ ᓵᐦᑯᐁᐧᐊᐧᐠ, ᒥᓯᐁᐧ ᐁ ᑌᐱᑖᑯᓯᒋᐠ. 6ᐊᓂᑭ ᒫᑲ ᐱᓬᐃᐢᑎᓇᐠ ᐃᐢᐱ ᐱᔦᐦᑕᐦᑭᐠ ᐁ ᓵᑯᐁᐧᐃᐧᐦᐟ, ᑭ ᐃᑌᐧᐊᐧᐠ, ᑖᓀᕽ ᐅᒪ ᑳ ᐃᓯ ᑭᐦᒋ ᓵᐦᑯᐁᐧᕽ ᐅ ᑲᐯᓯᐃᐧᓂᐋᐧᕽ ᐦᐃᐸᕒᐅᐊᐠ? ᐁᑯᓯ ᑭᐦ ᑭᐢᑫᔨᑕᒧᐋᐊᐧᐠ ᐊᓂᒪ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑳ ᑎᐯᔨᐦᒋᑫᐟ ᐁ ᑭᐦ ᑕᑯᓯᓄᒪᑲᓂᔨᐠ ᑲᐯᓯᐃᐧᓂᕽ. 7ᑭᐦ ᓭᑭᓯᐊᐧᐠ ᒫᑲ ᐱᓬᐃᐢᑎᓇᐠ, ᒋᑫᒫ ᑭ ᐃᑌᐧᐊᐧᐠ ᑭᓭᒪᓂᑐ ᑕᑯᓯᐣ ᑲᐯᓯᐃᐧᓂᕽ. ᑭ ᐃᑌᐧᐊᐧᐠ ᒫᑲ, ᑭ ᓂᓯᐊᐧᓈᑎᓯᓈᓇᐤ ᐊᓂ! ᒋᑫᒫ ᓇᒪᐃᐧᐦᑳᐨ ᐁᑯᓯ ᑭᐦ ᐯ ᐃᐦᑭᐣ. 8ᑭ ᓂᓯᐊᐧᓈᑎᓯᓈᓇᐤ ᐊᓂ! ᐊᐁᐧᓇᓇ ᑫ ᑭᐦ ᐸᐢᐱᐦᐃᑯᔭᕽ ᐅ ᒋᐦᒋᐊᐧᕽ ᐅᐦᒋ ᐅᑭ ᑭᐦᒋ ᒪᓂᑐᐊᐧᐠ? ᐁᐊᐧᑲᐧᓂ ᐅᑭ ᒪᓂᑐᐊᐧᐠ ᑳ ᑭᐦ ᓂᐸᐦᐋᒋᐠ ᐃᒋᑊᐟ ᐊᔨᓯᔨᓂᐊᐧ ᓇᓈᑐᕽ ᐃᑖᐢᐱᓀᐃᐧᓇ ᐅᐦᒋ ᐊᓂᑕ ᐱᑲᐧᑕᐢᑭᕽ. 9ᐃᐧᐦ ᒪᐢᑲᐃᐧᓯᐠ, ᒥᓇ ᓈᐯᐦᑳᓱᐠ, ᑭᔭᐋᐤ ᐱᓬᐃᐢᑎᓂᑎᐠ, ᐁᑳ ᑭᑕ ᑎᐯᔨᒥᑯᔦᑯᐠ ᐦᐃᐸᕒᐅᐊᐧᐠ, ᑖᐱᐢᑯᐨ ᑭᔭᐋᐧᐤ ᑳ ᑭᐦ ᐃᓯ ᑎᐯᔨᒫᔦᑯᐠ: ᓈᐯᐦᑳᓱᐠ ᒥᓇ ᓄᑎᓂᑫᐠ.
10ᐁᑯᓯ ᑭ ᓄᑎᓂᑫᐊᐧᐠ ᐱᓬᐃᐢᑎᓇᐠ, ᐃᐢᕒᐁᐃᓬ ᒫᑲ ᑭ ᓵᑯᐋᐊᐧᐠ, ᐁᑯᓯ ᑲᐦᑭᔭᐤ ᐊᐃᐧᔭᐠ ᐁ ᐃᐦᑕᓯᒋᐠ ᐃᐧᑭᕽ ᑭ ᐃᑕᒧ; ᒥᓴᐦᑲᒥᐠ ᒫᑲ ᑭ ᓂᐸᐦᐋᐊᐧᐠ; ᒋᑫᒫ ᑭ ᐸᐦᑭᓯᓇᐧᐠ ᐊᓂᑭ ᐃᐧᔭᐋᐧᐤ ᐃᐢᕒᐁᐃᓬ ᓂᐢᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᐅᒧᐢᑐᑌᐊᐧᐠ. 11ᐅ ᑭᐢᑭᓇᐋᐧᒋᐦᐅᐃᐧᓂᐊᐧᐟ ᒫᑲ ᑭᓭᒪᓂᑐ ᑭ ᐅᑎᓇᒫᐧᐣ; ᐁᑯᓯ ᐁ ᐃᓯ ᓂᓯᔨᐟ ᐅᑯᓯᓴ ᐃᓬᐋᐩ, ᐦᐋᑊᓇᐩ ᒥᓇ ᐱᓂᔮᐢ, ᑭ ᓂᐸᐦᐋᐊᐧᐠ.
12ᑭ ᓯᐯᐧᐸᐦᑖᐤ ᒫᑲ ᐯᔭᐠ ᐯᐣᒋᒪᐣ ᐅᐦᒋ ᓈᐯᐤ, ᐅ ᓇᑐᐸᔨᐊᐧᐠ ᐅᐦᒋ, ᑭ ᑕᑯᐸᐦᑖᐤ ᓴᐃᓬᐆᐃᕽ ᐁᐊᐧᑳᐧᓂᒪ ᐁ ᑭᓯᑳᐠ ᐁ ᔮᔨᑭᐸᔨᔨᑭ ᐅ ᑭᑭᐢᑳᒋᑲᓇ ᒥᓇ ᐁ ᐊᓯᐢᑭᐃᐧᐢᑎᑳᐧᓀᐟ. 13ᐃᐢᐱ ᒫᑲ ᑌᑯᓯᕽ, ᐳᑎ, ᐃᓬᐋᐩ ᑭ ᐊᐱᐤ ᐅᐟ ᐊᐱᐃᐧᓂᕽ ᒋᑭ ᒣᐢᑲᓈᕽ ᐁ ᐊᓴᐋᐧᐱᐟ: ᒋᑫᒫ ᑭ ᓵᑯᑌᐦᐁᐢᑕᒪᐋᑕᒣᐧᐤ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑭᓭᒪᓂᑐᐊᐧ. ᐃᐢᐱ ᒫᑲ ᐊᓇ ᓈᐯᐤ ᑳᐦ ᐱᐦᑐᑫᐟ ᐅᑌᓈᕽ, ᒥᓇ ᑳᐦ ᐋᑑᑕᕽ, ᑲᐦᑭᔭᐤ ᐅᑌᓈᕽ ᑭ ᒫᑐᐊᐧᐠ. 14ᐁᑯᓯ ᐃᐢᐱ ᐃᓬᐋᐩ ᐱᔦᐦᑕᕽ ᐁ ᒫᑐᐃᐧᐦᐟ ᑭ ᐃᑌᐧᐤ, ᑖᓀᕽ ᐅᒪ ᑳ ᒪᑌᐧ ᐃᑎᐦᑖᑲᐧᕽ? ᐁᑯᓯ ᐊᓇ ᓈᐯᐤ ᑭ ᑲᑫᐧᔮᐦᐅ, ᐁ ᑭ ᐯ ᓇᑕᐃᐧ ᐃᐧᐦᑕᒪᐋᐧᐟ ᐃᓬᐋᔭ. 15ᐃᓬᐋᐩ ᒫᑲ ᑫᑳᐟ ᒥᑖᐦᑐᒥᑕᓇᐤ ᐊᔨᓈᓀᐤ ᐊᔨᐋᐧᐠ ᑭ ᐃᑕᐦᑐᐱᐳᓀᐧᐤ, ᐁᑯᓯ ᐅᐢᑭᓯᑲᐧ ᐋᐢᑕᒥᕽ ᑭ ᐃᓯ ᐊᔮᔨᐊᐧ ᓇᒪᐃᐧᔭ ᒫᑲ ᓇᐦᐋᐱᐤ. 16ᐊᓂᐦᐃ ᒫᑲ ᓈᐯᐊᐧ ᑭ ᐃᑎᐠ ᐃᓬᐋᐩ, ᓂᔭ ᐅᒪ ᑳ ᐯ ᓇᑲᒋᐸᐊᑭᐠ ᐅᓇᑐᐸᔨᐊᐧᐠ, ᐁᑯᓯ ᓂ ᑭ ᓇᑲᑖᒧᑐᑕᐋᐧᐊᐧᐠ ᐊᓄᐦᐨ ᑳ ᑭᓯᑳᐠ ᐅᓇᑐᐸᔨᐊᐧᐠ. ᐁᑯᓯ ᑭ ᐃᑌᐤ, ᑖᓂᓯ ᐁᑕᐦᑲᒥᑲᕽ ᐁᑯᑌ, ᓂᑯᓯᐢ? 17ᐊᓂᐦᐃ ᒫᑲ ᑳ ᐯᑖᒋᒧᔨᐟ ᑭ ᓇᐢᑫᐧᐊᐧᓯᒥᐠ ᑭ ᐃᑎᐠ, ᐃᐢᕒᐁᐃᓬ ᑕᐸᓯᐋᐧᒧᑳᑎᑲᐧᐠ ᐱᓬᐃᐢᑎᓇ, ᒥᑐᓂ ᒫᑲ ᒥᐦᒉᐟ ᓂᐸᐦᐋᐊᐧᐠ ᐊᔨᓯᔨᓂᐊᐧᐠ, ᒥᓇ ᑭᑯᓯᓴᐠ ᐁ ᐃᓯ ᓂᓯᒋᐠ ᐦᐋᑊᓇᐩ ᒥᓇ ᐱᓂᔮᐢ ᓂᐱᐊᐧᐠ, ᐁᑯᓯ ᒥᓇ ᐅ ᑭᐢᑭᓇᐋᐧᒋᐅᐃᐧᓂᐊᐟ ᑭᓭᒪᓂᑐ ᐅᑌᓇᒫᐧᐣ. 18ᑭᐦ ᐊᔨᐦᑭᐣ ᒫᑲ ᐃᐢᐱ ᐁ ᒥᐢᑯᑕᒥᔨᐟ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑭᓭᒪᓂᑐᐊᐧ, ᑭ ᓵᓯᑭᒋ ᐸᐦᑭᓯᐣ ᐅ ᑌᐦᑕᐱᐃᐧᓂᕽ ᐅᐦᒋ ᒋᑭ ᑭᐦᒋ ᐃᐢᑲᐧᑌᒥᕽ, ᑭ ᑲᐢᑭᑫᐧᓯᐣ ᒫᑲ, ᒥᓇ ᑭ ᓂᐱᐤ; ᒋᑫᒫ ᑭᓭᔨᓂᐃᐧᐤ ᒥᓇ ᑯᓯᑲᐧᑎᐤ. ᑭ ᐅᔭᓱᐋᐧᑌᐤ ᒫᑲ ᐃᐢᕒᐁᐃᓬᐊ ᓀᒥᑕᓇᐤ ᑕᐦᑐ ᐊᐢᑭ.
19ᐊᓂᐦᐃ ᒫᑲ ᐅᐢᑎᒪ ᐱᓂᔮᓴ ᐃᐧᐃᐧᔨᐊᐧ, ᒣᑳᐧᐨ ᑭᑭᐢᑲᐁᐧᐤ ᐊᐋᐧᓯᓴ, ᑫᑳᐟ ᑭᑕ ᓄᑯᓯᔨᐟ; ᐃᐢᐱ ᒫᑲ ᐱᔦᐦᑕᕽ ᐋᒋᒧᐃᐧᐣ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑭᓭᒪᓂᑐᐊᐧ ᐁ ᐅᑎᓂᑳᑌᔨᐠ, ᐁᑯᓯ ᒥᓇ ᐅᓯᓴ ᒥᓇ ᐅᓈᐯᒪ ᐁ ᓂᐱᔨᐟ, ᑭ ᐸᑕᐱᐤ ᒥᓇ ᑭ ᐊᑎ ᐋᐧᐸᒫᐊᐧᓱ; ᒋᑫᒫ ᓭᒫᐠ ᑭᐦ ᐊᑎ ᐃᐧᓴᑫᔨᑕᒼ. 20ᓈᐣᑕᐤ ᒫᑲ ᐃᔨᑯᕽ ᐁ ᐊᑎ ᐳᓂ ᐱᒫᑎᓯᐟ ᐃᐢᑫᐧᐊᐧ ᑳ ᓂᐸᐃᐧᐢᑖᑯᐟ ᑭ ᐃᑎᐠ, ᐁᑳᐃᐧᔭ ᓭᑭᓯ; ᒋᑫᒫ ᑭ ᓂᐦᑖᐃᐧᑭᐦᐋᐤ ᑫ ᐅᑯᓯᓯᔭᐣ. ᒫᑲ ᓇᒪᐋᐧᐨ ᓇᐢᑫᐧᐊᐧᓯᐁᐤ, ᐊᐦᐳ ᓇᒪᐋᐧᐨ ᓈᑲᑐᑫᐤ. 21ᐃᑲᐹᐟ ᒫᑲ ᑭ ᐃᓯᔨᐦᑳᑌᐤ ᐊᓂᐦᐃ ᐊᐋᐧᓯᓴ, ᐁ ᐃᑌᐧᐟ, ᑭᐦᒑᔨᐃᐧᐃᐧᐣ ᓇᑲᑎᐠ ᐃᐢᕒᐁᐃᓬ; ᒋᑫᒫ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑭᓭᒪᓂᑐ ᐅᑎᓇᒫᐧᐣ; ᐁᑯᓯ ᒥᓇ ᐅᓯᓴ ᐅᐦᒋ ᒥᓇ ᐅᓈᐯᒪ. 22ᐅᒥᓯ ᒫᑲ ᑭᐦ ᐃᑌᐧᐤ, ᑭᐦᒑᔨᐃᐧᐃᐧᐣ ᓇᑲᑎᐠ ᐃᐢᕒᐁᐃᓬ ᒋᑫᒫ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑭᓭᒪᓂᑐ ᐅᑎᓇᒫᐧᐣ.
Currently Selected:
ᓂᐢᑕᒼ ᓵᒼᔪᐃᓬ 4: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
