ᓂᐢᑕᒼ ᓵᒼᔪᐃᓬ 3
3
1ᐊᓇ ᒫᑲ ᐊᐋᐧᓯᐢ ᓵᒼᔪᐃᓬ ᑭ ᐊᑐᐢᑲᐁᐧᐤ ᑳ ᑎᐯᔨᐦᒋᑫᔨᐟ ᐁ ᑭᑖᐸᒥᑯᐟ ᐃᓬᐋᔭ. ᑳ ᑎᐯᔨᐦᒋᑫᐟ ᒫᑲ ᐅᐟ ᐊᔭᒥᐃᐧᐣ ᐊᑳᐋᐧᐨ ᑭ ᐃᐦᑕᑲᐧᐣ ᐁᑯᐢᐱ ᐁ ᑲᑭᓯᑳᐠ, ᑭ ᓇᒪᑕᑲᐧᐣ ᒧᓯᓭ ᐃᓯᓇᒧᐃᐧᐣ. 2ᑭᐦ ᐊᔨᑭᐣ ᒫᑲ ᐁᑯᐢᐱ, ᐃᓬᐋᐩ ᐁ ᑭ ᓇᐃᓯᕽ ᐃᑕ ᒫᓇ ᐁ ᐊᔮᐟ, ᐁᑯᓯ ᐁ ᐊᑎ ᐊᐧᓂᑎᐱᐢᑭᓇᒫᐟ ᐁᑳ ᐁ ᐊᑎ ᓇᐦᐋᐱᐟ; 3ᒥᓇ ᒪᐧᔦᐢ ᐋᐢᑕᐁᐧᔨᐠ ᐅ ᐊᐧᓴᐢᑯᑌᓂᑲᐣ ᑭᓭᒪᓂᑐ ᐁᑯᑕ ᐊᓂᒪ ᐅ ᑭᐦᒋ ᐊᔭᒥᐦᐁᐃᐧᑲᒥᑯᕽ ᑳ ᑎᐯᔨᐦᒋᑫᐟ, ᐃᑕ ᑭᓭᒪᓂᑐ ᐅ ᑭᐢᑭᓇᐋᐃᒋᐅᐃᐧᓂᐊᐧᐟ ᐁ ᐊᔮᔨᐠ, ᓵᓴᐩ ᒫᑲ ᓵᒼᔪᐃᓬ ᐁ ᑭᐦ ᑲᐃᐧᓯᒧᐟ; 4ᑳ ᑎᐯᔨᐦᒋᑫᔨᐟ ᑭ ᑌᐹᐧᑎᐠ ᓵᒼᔪᐃᓬ; ᐁᑯᓯ ᑭ ᓇᐢᑫᐧᐊᐧᓯᐦᐁᐤ, ᐅᑕ ᓂᐟ ᐊᔮᐣ. 5ᑭ ᐃᐢᐸᑖᐤ ᒫᑲ ᐃᑕ ᐁ ᐊᔮᔨᐟ ᐃᓬᐋᔭ, ᒥᓇ ᑭ ᐃᑌᐤ, ᐅᑕ ᓂᐟ ᐊᔮᐣ ᒋᑫᒫ ᑭ ᑭ ᑌᐹᐧᓯᐣ. ᑭ ᐃᑎᐠ ᒫᑲ, ᓇᒪᐃᐧᔭ ᑯᐦ ᑌᐹᐧᑎᑎᐣ; ᓇᑕᐃᐧ ᓇᐃᓯᓂ ᒥᓇ, ᐁᑯᓯ ᑭ ᓇᑕᐃᐧ ᓇᐃᓯᐣ. 6ᐁᑯᓯ ᑳ ᑎᐯᔨᐦᒋᑫᔨᐟ ᒥᓇ ᑭᐦ ᑌᐸᐧᑎᐠ, ᓵᒼᔪᐃᓬ. ᓵᒼᔪᐃᓬ ᒫᑲ ᑭᐦ ᐊᐧᓂᐢᑳᐤ ᒥᓇ ᑭᐦ ᓈᑌᐤ ᐃᓬᐋᔭ, ᐁᑯᓯ ᑭᐦ ᐃᑌᐤ, ᐅᑕ ᓂᐟ ᐊᔮᐣ, ᒋᑫᒫ ᑭ ᑭᐦ ᑌᐹᐧᓯᐣ. ᑭᐦ ᓇᐢᑫᐧᐊᐧᓯᒥᐠ ᒫᑲ, ᓇᒪᐃᐧᔭ ᑯᐦ ᑌᐹᐧᑎᑎᐣ ᓂᑯᓭ; ᓇᐃᓯᓂ ᒥᓇ. 7ᓵᒼᔪᐃᓬ ᒫᑲ ᓇᒣᐢᑲᐧ ᑭᐢᑫᔨᒣᐤ ᑳ ᑎᐯᔨᐦᒋᑫᔨᐟ, ᐊᐦᐳ ᓇᒣᐢᑲᐧ ᑳ ᑎᐯᔨᐦᒋᑫᔨᐟ ᐅᐟ ᐊᔭᒥᐃᐧᓂᔨᐤ ᑭ ᑭᐢᑫᔨᑕᒧᐦᐋᐤ. 8ᑳ ᑎᐯᔨᐦᒋᑫᔨᐟ ᒫᑲ ᑭ ᑌᐹᐧᑎᐠ ᓵᒼᔪᐃᓬ ᐁᑲᐧ ᓂᐢᑖᐧᐤ. ᐁᑯᓯ ᑭ ᐊᐧᓂᐢᑳᐤ ᑭ ᓈᑌᐤ ᐃᓬᐋᔭ, ᒥᓇ ᑭ ᐃᑌᐤ, ᐅᑕ ᓂᐟ ᐊᔮᐣ ᒋᑫᒫ ᑭ ᑭ ᑌᐹᐧᓯᐣ. ᐃᓬᐋᐩ ᒫᑲ ᑭ ᓂᓯᑕᐁᐧᔨᑕᒼ ᑳ ᑎᐯᔨᐦᒋᑫᔨᐟ ᐁ ᑭᐦ ᑌᐹᐧᑖᔨᐟ ᐊᓂᐦᐃ ᐊᐋᐧᓯᓴ. 9ᐁᐊᐧᑯ ᐅᐦᒋ ᐃᓬᐋᐩ ᑭ ᐃᑌᐤ ᓵᒼᔪᐃᓬᐊ, ᓇᑕᐃᐧ ᓇᐃᓯᓂ; ᑭᑕ ᐃᐦᑭᐣ ᒫᑲ, ᑭᐢᐱᐣ ᑌᐹᐧᑎᐢᑭ, ᐅᒥᓯ ᑭ ᑲ ᐃᑖᐧᐣ, ᐱᑭᐢᑫᐧ ᑌᐯᔨᐦᒋᑫᔭᐣ; ᒋᑫᒫ ᑭᐟ ᐊᑐᐢᑫᔮᑲᐣ ᓇᑐᐦᑕᒼ. ᐁᑯᓯ ᓵᒼᔪᐃᓬ ᑭ ᓇᑕᐃᐧ ᓇᐃᓯᐣ ᐃᑕ ᒫᓇ ᐁ ᐊᔮᐟ.
10ᐁᑯᓯ ᑳ ᑎᐯᔨᐦᒋᑫᐟ ᑭ ᐯ ᓇᑕᐃᐧ ᓂᐸᐃᐧᐤ, ᑭ ᑌᐯᐧᐤ ᑖᐱᐢᑯᐨ ᓵᓴᐩ ᑳ ᑭᐦ ᐃᑐᑕᕽ, ᓵᒼᔪᐃᓬ, ᓵᒼᔪᐃᓬ. ᐁᑲᐧ ᓵᒼᔪᐃᓬ ᑭᐦ ᓇᐢᑫᐧᐊᐧᓯᐁᐤ, ᐱᑭᐢᑫᐧ, ᒋᑫᒫ ᑭᐟ ᐊᑐᐢᑫᔮᑲᐣ ᓇᑐᐦᑕᒼ. 11ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐤ ᓵᒼᔪᐃᓬᐊ, ᒋᐢᐟ, ᓂ ᑲ ᐃᐦᑐᑌᐣ ᑫᑲᐧᐩ ᐃᐢᕒᐁᐃᓬᐃᕽ, ᑕᐦᑐ ᑫ ᐯᐦᑕᑭᐠ ᐁᐊᐧᑫᐧᔨᐤ ᑲᑕ ᒍᐁᐧᐢᑭᐦᑌᐊᐧᐠ. 12ᐁᑯᐢᐱ ᑭᓯᑳᑭ ᓂ ᑲ ᑭᓯᑕᒪᐋᐧᐤ ᐃᓬᐋᐩ ᑲᐦᑭᔭᐤ ᐊᓂᐦᐃ ᑲ ᑭ ᐊᔨᑌᐧᐊᐧᐠ ᐃᐧᑭ ᐅᐦᒋ; ᒥᒋᒫᐨ ᐅᐦᒋ ᒥᓴᑳᒣ ᑭᓯᐸᓄᕽ ᐃᐢᑯ. 13ᒋᑫᒫ ᓂ ᑭ ᐃᐧᐦᑕᒪᐋᐤ ᑭᑕ ᐅᔭᓱᐋᐧᑕᒪᐧᐠ ᐃᐧᑭ ᑳᑭᑫ ᐊᓂᒪ ᒪᒋᐦᑎᐃᐧᐣ ᐅᐦᒋ ᑳ ᑭᐢᑫᔨᑕᕽ; ᐅᑯᓯᓴ ᐁ ᑭᐦ ᒥᐢᑕᐦᐃ ᒪᒋᑐᑕᒥᔨᐟ ᐁᑳ ᒫᑲ ᐁ ᑭᐱᐦᒋᐋᐟ. 14ᐁᐊᐧᑯ ᐅᐦᒋ ᓂ ᑭᐦ ᑭᐦᒋᐃᑖᐊᐧᐠ ᐃᓬᐋᐩ ᐃᐧᑭᕽ, ᐊᓂᒪ ᒪᒋᐦᑎᐃᐧᐣ ᐃᓬᐋᐩ ᐃᐧᑭᕽ ᓇᒪᐃᐧᔭ ᑭᑕ ᑭ ᑭᒋᐢᑎᓂᑳᑌᐤ ᒪᒍᐢᑌᐦᐊᒫᑫᐃᐧᐣ ᐊᐦᐳ ᐸᑭᑎᓈᓱᐃᐧᐣ ᐅᐦᒋ ᑳᑭᑫ.
15ᓵᒼᔪᐃᓬ ᒫᑲ ᑭ ᐱᒥᓯᐣ ᐱᔨᐢ ᐁ ᑫᑭᓭᐹᔮᔨᐠ, ᐁᑯᓯ ᐁ ᑭᐦ ᔪᐦᑌᓇᕽ ᐃᐢᑳᐧᑌᒪ ᐅ ᐋᐧᐢᑳᐦᐃᑲᓂᔨᕽ ᑳ ᑎᐯᔨᐦᒋᑫᔨᐟ. ᑭ ᐊᐢᑖᓯᐤ ᒫᑲ ᓵᒼᔪᐃᓬ ᑭᑕ ᑭᐢᑫᔨᑕᒧᐋᐟ ᐃᓬᐋᔭ ᑳ ᑭᐦ ᐃᓯᓇᕽ. 16ᐁᑲᐧ ᐃᓬᐋᐩ ᑭ ᓇᑐᒣᐤ ᓵᒼᔪᐃᓬᐊ, ᐁ ᑭ ᐃᑖᐟ ᒫᑲ, ᓵᒼᔪᐃᓬ, ᓂᑯᓭ. ᑭ ᓇᐢᑫᐧᐊᐧᓯᐦᐃᐠ ᒫᑲ, ᐅᑕ ᓂᐟ ᐊᔮᐣ. 17ᐁᑯᓯ ᑭ ᐃᑌᐤ, ᑫᑲᐧᐩ ᐅᒪ ᑳ ᑎᐯᔨᐦᒋᑫᐟ ᑳ ᑭ ᐃᑎᐢᐠ? ᑭ ᐸᑯᓭᔨᒥᑎᐣ ᐁᑳᐃᐧᔭ ᑳᑕᒪᐃᐧᐣ: ᑭᓭᒪᓂᑐ ᐁᑯᓯ ᑭ ᑲ ᐃᐧ ᐃᐦᑐᑖᐠ, ᐊᐦᐳ ᐊᔨᐋᐧᐠ, ᑭᐢᐱᐣ ᑳᑕᒪᐃᐧᔭᓀ ᓈᐣᑕᐤ ᑫᑲᐧᐩ ᑲᐦᑭᔭᐤ ᐊᓂᐦᐃ ᑳ ᑭ ᐊᔨᑎᐢᐠ. 18ᑭ ᐃᐧᐦᑕᒫᐠ ᒫᑲ ᓵᒼᔪᐃᓬᐊ ᑲᐦᑭᔭᐤ ᒥᑐᓂ, ᒥᓇ ᓇᒪ ᑫᑲᐧᐩ ᑳᑕᒫᐠ. ᐁᑯᓯ ᐃᑌᐧᐤ, ᑳ ᑎᐯᔨᐦᒋᑫᐟ ᒫᓇ ᒫᑲ: ᑭᔮᒼ ᐁ ᐃᓯ ᒥᔮᐧᐱᓯᒥᑯᐟ ᑭᑕ ᐃᐦᑐᑕᒼ.
19ᓵᒼᔪᐃᓬ ᒫᑲ ᑭᐦ ᐅᐦᐱᑭᐤ, ᑳ ᑎᐯᔨᐦᒋᑫᔨᐟ ᐁ ᐃᐧᒉᐃᐧᑯᐟ, ᐁᑯᓯ ᐁᑳ ᑫᑲᐧᐩ ᐅᐟ ᐃᑌᐧᐃᐧᓇ ᐁ ᐊᓯᐊᐧᓂᔨᑭ. 20ᑲᐦᑭᔭᐤ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑖᐣ ᐅᐦᒋ ᐱᕒᓯᐸ ᐃᐢᑯ, ᑭᐦ ᑭᐢᑫᔨᑕᒪᐧᐠ ᓵᒼᔪᐃᓬ ᐁ ᐃᑕᔨᐦᐟ ᑭᑕ ᐅᑭᐢᑭᐁᐧᐦᐃᑫᐃᔨᓂᒥᐟ ᑳ ᑎᐯᔨᐦᒋᑫᐟ. 21ᒥᓇ ᒫᑲ ᑳ ᑎᐯᔨᐦᒋᑫᐟ ᑭ ᓄᑯᐦᐃᓱ ᓴᐃᓬᐆᐃᕽ: ᒋᑫᒫ ᑳ ᑎᐯᔨᐦᒋᑫᐟ ᑭ ᓄᑯᐦᐃᓱᐢᑕᐁᐧᐤ ᓵᒼᔪᐃᓬᐊ ᐁᑯᑕ ᓴᐃᓬᐆᐃᕽ ᐅᐟ ᐊᔭᒥᐃᐧᐣ ᐅᐦᒋ ᑳ ᑎᐯᔨᐦᒋᑫᐟ.
Currently Selected:
ᓂᐢᑕᒼ ᓵᒼᔪᐃᓬ 3: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
