ᓂᐢᑕᒼ ᓵᒼᔪᐃᓬ 22
22
1 #
ᓂᑲᒧᓇ 57; 142 ᑌᐱᐟ ᒫᑲ ᑭ ᓯᐯᐧᑌᐤ ᐁᑯᑕ ᐅᐦᒋ, ᐁ ᑭ ᐃᑖᒧᐟ ᐊᑕᓬᐊᒼ ᐋᐧᑎᕽ; ᐃᐢᐱ ᒫᑲ ᐅᒋᐋᐧᒪ ᒥᓇ ᑲᐦᑭᔭᐤ ᐅᑖᐃᐧᔭ ᐃᐧᑭᔨᕽ ᐱᔦᑕᒥᔨᐟ ᑭ ᓈᑎᐠ ᐁᑯᑕ. 2ᑲᐦᑭᔭᐤ ᒫᑲ ᐊᐃᐧᔭᐠ ᑳ ᐊᐧᐋᐧᓀᔨᑕᕽ, ᒥᓇ ᑲᐦᑭᔭᐤ ᐊᐃᐧᔭᐠ ᑳ ᒪᓯᓇᐦᐃᑫᐟ, ᒥᓇ ᑲᐦᑭᔭᐤ ᐊᐃᐧᔭᐠ ᑳ ᓇᔦᑖᐁᐧᔨᑕᕽ, ᑭ ᒫᒪᐃᐧ ᒫᐊᐧᒋᐦᐃᑐᔨᐊᐧ ᐁ ᓈᑎᑯᐟ; ᐁᑯᓯ ᒫᑲ ᑭ ᑎᐯᔨᒣᐤ; ᑭ ᐃᐧᒉᐃᐧᐠ ᒫᑲ ᓈᐣᑕᐤ ᓀᐋᐧᐤ ᒥᑖᐦᑐᒥᑕᓇᐤ ᓈᐯᐊᐧ.
3ᑌᐱᐟ ᒫᑲ ᑭ ᐃᑐᐦᑌᐤ ᒥᐢᐸᐃᕽ ᒧᐋᑊ ᐊᐢᑭᕽ; ᑭ ᐃᑌᐤ ᒫᑲ ᒧᐋᑊ ᑭᐦᒋ ᐅᑭᒫᐊᐧ, ᑭᔮᒼ ᓄᑖᐃᐧ ᒥᓇ ᓂᑳᐃᐧ ᑭ ᐸᑯᓭᔨᒥᑎᐣ, ᑭᑕ ᐯ ᐃᑐᐦᑌᐊᐧᐠ ᒥᓇ ᑭ ᑲ ᐃᐧᒋᐊᔮᒥᑲᐧᐠ, ᐃᐢᑯ ᐃᔨᑯᕽ ᑭᐢᑫᔨᑕᒫᓂ ᑭᓭᒪᓂᑐ ᐋᐧ ᐃᑐᑕᒪᐃᐧᑫᐧ. 4ᑭ ᐯᓯᐁᐧᐤ ᒫᑲ ᐃᑕ ᐁ ᐊᔮᔨᐟ ᒧᐋᑊ ᑭᐦᒋ ᐅᑭᒫᐊᐧ; ᐁᑯᓯ ᑭ ᐃᐧᒋᐊᔮᒣᔨᐊᐧ ᒥᓴᑳᒣ ᐃᔨᑯᕽ ᑌᐱᐟ ᑳ ᐊᔮᐟ ᐊᓂᑕ ᐊᐧᑎᕽ.
5ᐊᓇ ᒫᑲ ᐅᑭᐢᑭᐁᐧᐦᐃᑫᐤ ᑳᐟ ᑭ ᐃᑌᐤ ᑌᐱᑕ, ᐁᑳᐃᐧᔭ ᐋᐧᑎᕽ ᐃᑕᓯ ᐊᔮ; ᓯᐯᐧᐦᑌ. ᐃᑐᐦᑌ ᒍᑕ ᐊᐢᑭᕽ. ᐁᑲᐧ ᑌᐱᐟ ᑭ ᓯᐯᐧᑌᐤ, ᑭ ᑕᑯᓯᐣ ᒫᑲ ᐊᓂᑕ ᓴᑳᐢᑳᐧᕽ ᐦᐃᕒᐁᐟ.
6ᐁᑲᐧ ᓵᓬ ᐯᐦᑕᒼ ᐁ ᒥᐢᑳᒥᐦᐟ ᑌᐱᑕ, ᒥᓇ ᐊᓂᐦᐃ ᐊᔨᓯᔨᓂᐊᐧ ᑳ ᐃᐧᒉᐃᐧᑯᔨᐟ ᓵᓬ ᒫᑲ ᑭ ᐊᔭᐱᐤ ᐊᓂᑕ ᑭᐱᔭ, ᓯᐹᔮᑎᐠ ᐊᓂᐦᐃ ᑖᒪᕒᐃᐢᐠ ᒥᐢᑎᑲᐧ ᕒᐁᒪᐃᕽ, ᐁ ᑕᐦᑯᓇᕽ ᐅ ᑕᐦᑲᒋᑲᐣ, ᑲᐦᑭᔭᐤ ᒫᑲ ᐅᐟ ᐊᑐᐢᑫᔮᑲᓇ ᐁ ᐋᐧᐢᑳᑳᐸᐃᐧᐢᑖᑯᐟ. 7ᓵᓬ ᒫᑲ ᑭ ᐃᑌᐤ ᐅᐟ ᐊᑐᐢᑫᔮᑲᓇ ᑳ ᐋᐧᐢᑳᑳᐸᐃᐧᐢᑖᑯᐟ, ᓇᑐᐦᑕᒧᐠ ᐁᑲᐧ ᑭᔭᐋᐧᐤ ᐯᐣᒋᒪᐃᑕᐠ; ᑭ ᑲ ᒥᔨᑯᐋᐧᐤ ᒋ ᒉᓯ ᐅᑯᓯᓴ ᑲᐦᑭᔭᐤ ᐁ ᐃᑕᓯᔦᐠ ᑭᐢᑎᑳᓇ ᒥᓇ ᓱᒥᓂᑭᐢᑎᑳᓇ, ᑲᐦᑭᔭᐤ ᒋ ᑭ ᑲ ᐅᔭᑭᒥᑯᐋᐧᐤ ᑭᑕ ᓯᒫᑲᓂᓯᐃᐧᑭᒫᑲᑕᐋᐧᔦᑯᐠ ᑭᐦᒋᒥᑖᐦᑐᒥᑕᓇᐤ ᒥᓇ ᑭᑕ ᓯᒫᑲᓂᓯᐃᐧᑭᒫᑲᑕᐋᐧᔦᑯᐠ ᒫᒥᑖᐦᑐᒥᑕᓇᐤ; 8ᑲᐦᑭᔭᐤ ᑳ ᐃᑕᓯᔦᐠ ᑳ ᑭᒧᒋᑲᑕᐃᐧᔦᐠ, ᐁᑯᓯ ᐁᑳ ᐊᐃᐧᔭᐠ ᐁ ᐃᐦᑖᐟ ᑭᑕ ᑭᐢᑫᔨᑕᒧᐃᐟ ᓂᑯᓯᓴ ᐁ ᐃᐧᒋᐦᐃᓯᒋᑫᒫᔨᐟ ᐊᓂᐦᐃ ᒉᓯ ᐅᑯᓯᓴ, ᐁᑯᓯ ᓇᒪ ᐊᐃᐧᔭᐠ ᐃᐦᑖᐤ ᑭᔭᐋᐧᐤ ᐁ ᒥᑖᑕᒪᐃᐧᐟ ᐊᐦᐳ ᑭᑕ ᑭᐢᑫᔨᑕᒧᐃᐟ ᓂᑯᓯᓴ ᐁ ᓯᑭᐢᑲᐋᐧᔭᐟ ᓂᐟ ᐊᑐᐢᑫᔮᑲᓇ ᑭᑕ ᒫᔨᑐᑕᐃᐧᔨᐟ, ᑭᑕ ᐊᐢᑲᒫᒋᑫᔨᐟ, ᑳ ᐃᑭᕽ ᐊᓄᐦᐨ ᑳ ᑭᓯᑳᐠ?
9 #
1 ᓵᒼᔪᐃᓬ 21:7-9; ᓂᑲᒧᓇ 52 ᐁᑲᐧ ᑭ ᓇᐢᑫᐧᐊᐧᓯᒥᐠ ᑖᐃᐠ ᐊᓇ ᐃᑕᒪᐃᐟ ᐁ ᐃᐧᒋᑳᐸᐃᐧᐢᑕᐋᐧᐟ ᐊᓂᐦᐃ ᐅᐟ ᐊᑐᐢᑫᔮᑲᓂᔨᐊᐧ ᓵᓬ, ᒥᓇ ᑭ ᐃᑌᐧᐤ, ᓂ ᑭ ᐋᐧᐸᒫᐤ ᐅᑯᓯᓴ ᒉᓯ ᐁ ᑕᑯᓯᕽ ᐊᓂᑕ ᓈᑊ, ᐁ ᓈᑖᐟ ᐊᐦᐃᒥᓬᐃᑲ ᐅᑯᓯᓴ ᐊᐦᐊᐃᑕᑊ. 10ᑭ ᑲᑫᐧᒋᒣᔨᐊᐧ ᒫᑲ ᑳ ᑎᐯᔨᐦᒋᑫᔨᐟ ᐃᐧᔭ ᐅᐦᒋ, ᒥᓇ ᑭ ᒥᔨᐠ ᓂᒫᐃᐧᐣ, ᒥᓇ ᑭ ᒥᔨᐠ ᐅᐟ ᐃᓴᐁᐧᑯᒫᓂᔨᐤ ᑲᓬᐋᔭᑕ ᐊᓂᐦᐃ ᐱᓬᐃᐢᑎᓇ.
11ᐁᑲᐧ ᑭᐦᒋ ᐅᑭᒫᐤ ᑭ ᐃᓯᑎᓴᐦᐅᐁᐧᐤ ᑭᑕ ᓇᑐᒫᐟ ᐊᐦᐃᒥᓬᐃᐠ ᐊᓇ ᐊᔭᒥᐦᐁᐃᐧᔨᓂᐤ ᐅᑭᓯᓴ ᐊᐦᐊᐃᑕᑊ, ᒥᓇ ᑲᐦᑭᔭᐤ ᐅᑖᐃᐧᔭ ᐅ ᐋᐧᐢᑳᐦᐃᑲᓂᔨᕽ ᑳ ᐊᔮᔨᐟ, ᐊᔭᒥᐦᐁᐃᐧᔨᓂᐊᐧᐠ ᐊᓂᑕ ᓈᑊ ᑳ ᐊᔮᒋᐠ; ᐁᑯᓯ ᑲᐦᑭᔭᐤ ᑭ ᐯ ᓈᑌᐊᐧᐠ ᑭᐦᒋ ᐅᑭᒫᐊᐧ. 12ᓵᓬ ᒫᑲ ᑭ ᐃᑌᐧᐤ, ᓇᑐᐦᑕ ᐁᑲᐧ ᑭᔭ ᐅᑯᓯᓴ ᐊᐦᐊᐃᑕᑊ, ᑭ ᓇᐢᑫᐧᐊᐧᓯᒥᐠ ᒫᑲ, ᐅᑕ ᓂᐟ ᐊᔮᐣ ᓂᐟ ᐅᑭᒫᒼ. 13ᓵᓬ ᒫᑲ ᑭ ᐃᑌᐤ, ᑖᓀᐦᑭ ᑳ ᑭᒧᒋᑲᐃᐧᔦᐠ, ᑭᔭ ᒥᓇ ᐅᑯᓯᓴ ᒉᓯ, ᐊᓂᒪ ᑳ ᑭ ᒥᔭᐟ ᐸᐦᑫᐧᓯᑲᓇ, ᒥᓇ ᐃᓴᐁᐧᐢᐠ, ᒥᓇ ᐁ ᑭ ᑲᑫᐧᒋᒪᐟ ᑭᓭᒪᓂᑐ ᐁᐊᐧᑯ ᐅᐦᒋ, ᑭᑕ ᐸᓯᑯᐢᑕᐃᐧᐟ ᑭᑕ ᐊᐢᑲᒫᒋᑫᐟ, ᑳ ᐃᑭᕽ ᐊᓄᐦᐨ ᑳ ᑭᓯᑳᐠ? 14ᐁᑲᐧ ᐊᐦᐃᒥᓬᐃᐠ ᑭ ᓇᐢᑫᐧᐊᐧᓯᒣᐤ ᑭᐦᒋ ᐅᑭᒫᐊᐧ, ᒥᓇ ᑭ ᐃᑌᐧᐤ, ᐊᐁᐧᓇ ᒫᑲ ᐁ ᐃᐦᑕᓯᒋᐠ ᑭᐟ ᐊᑐᐢᑫᔮᑲᓇᐠ ᐁᓯ ᐊᔮᑳᐧᒥᓯᐟ ᑖᐱᐢᑯᐨ ᑌᐱᐟ, ᐁᐊᐧᑯ ᑭᐦᒋ ᐅᑭᒫᐤ ᐅᑎᑲᐧᑎᒪ, ᑳ ᐱᑐᑲᐊᐟ ᑯᔭᓱᐁᐧᐃᐧᓂᕽ, ᒥᓇ ᑳ ᑭᐦᒉᔨᑖᑯᓯᐟ ᑭ ᐋᐧᐢᑳᐦᐃᑲᓂᕽ? 15ᓂ ᑭ ᒫᒋ ᑲᑫᐧᒋᒫᐤ ᒋ ᑭᓭᒪᓂᑐ ᐁᐊᐧᑯ ᐅᐦᒋ ᐊᓄᐦᐨ ᑳ ᑭᓯᑳᐠ? ᓇᒪᐃᐧᔭ ᐁᐊᐧᑯ ᓂ ᑲ ᓭᓯᑫᐢᑳᑯᐣ; ᐁᑳᐃᐧᔭ ᓭᐦᑫ ᑭᐦᒋ ᐅᑭᒫᐤ ᑭᑕ ᐊᑖᒥᒣᐤ ᐅᐟ ᐊᑐᐢᑫᔮᑲᓇ, ᐊᐦᐳ ᑲᐦᑭᔭᐤ ᐅ ᐋᐧᐢᑳᐦᐃᑲᓂᕽ ᓄᑖᐃᐧ; ᒋᑫᒫ ᑭᐟ ᐊᑐᐢᑫᔮᑲᐣ ᓇᒪᐃᐧᔭ ᑫᑲᐧᐩ ᑭᐢᑫᔨᑕᒼ ᐁᐊᐧᑯᒪ, ᓄᐦᑕᐤ ᐊᐦᐳ ᐊᐊᐧᓯᒣ. 16ᑭᐦᒋ ᐅᑭᒫᐤ ᒫᑲ ᑭ ᐃᑌᐧᐤ, ᑫᐦᒋᓈ ᑭ ᑲ ᓂᐱᐣ ᐊᐦᐃᒥᓬᐃᐠ, ᑭᔭ ᒥᓇ ᑲᐦᑭᔭᐤ ᑯᑖᐃᐧ ᐅ ᐋᐧᐢᑳᐦᐃᑲᓂᕽ.
17ᑭᐦᒋ ᐅᑭᒫᐤ ᒫᑲ ᑭ ᐃᑌᐤ ᐊᓂᐦᐃ ᐅᑲᓇᐁᐧᔨᒥᐁᐧᐊᐧ ᑳ ᓂᐸᐃᐧᐢᑖᑯᐟ, ᓇᑕᐃᐧ, ᓂᐸᐦᐃᑯᐠ ᑳ ᑎᐯᔨᐦᒋᑫᐟ ᐅᐟ ᐊᔭᒥᐦᐁᐃᐧᔨᓂᒪ; ᒋᑫᒫ ᐃᐧᐢᑕᐋᐧᐤ ᐃᐧᒋᐁᐊᐧᐠ ᑌᐱᑕ, ᒥᓇ ᒋᑫᒫ ᑭ ᑭᐢᑫᔨᑕᒪᐧᐠ ᐁ ᑕᐸᓯᔨᐟ, ᐁᑯᓯ ᓇᒪᐃᐧᔭ ᓄᐦ ᑭᐢᑫᔨᑕᒧᐃᑲᐧᐠ. ᒫᑲ ᐅᐟ ᐊᑐᐢᑫᔮᑲᓇ ᑭᐦᒋ ᐅᑭᒫᐤ ᓇᒪᐃᐧᔭ ᐃᐧ ᐃᓯᓂᐢᑫᔨᐊᐧᐠ ᑭᑕ ᓂᐸᐦᐋᒋᐠ ᑳ ᑎᐯᔨᐦᒋᑫᔨᐟ ᐅᐟ ᐊᔭᒥᐦᐁᐃᐧᔨᓂᒥᔨᐊᐧ. 18ᑭᐦᒋ ᐅᑭᒫᐤ ᒫᑲ ᑭ ᐃᑌᐤ ᑖᐃᑲ, ᑭᔭ ᓇᑕᐃᐧ ᓇᐸᐃᐠ ᐊᔭᒥᐦᐁᐃᐧᔨᓂᐊᐧᐠ. ᑖᐃᐠ ᒫᑲ ᐊᓇ ᐃᑕᒪᐃᐟ ᑭ ᐃᑐᐦᑌᐤ, ᐁᑯᓯ ᑭ ᐅᑎᐦᑎᓀᐤ ᐊᔭᒥᐦᐁᐃᐧᔨᓂᐊᐧ, ᑭ ᓂᐸᐁᐤ ᒫᑲ ᐁᐊᐧᑳᐧᓂᒪ ᐁ ᑭᓯᑳᐠ ᐊᔨᓈᓀᒥᑕᓇᐤ ᓂᔮᓇᐣ ᐊᔨᐋᐧᐠ ᐊᔨᓯᔨᓂᐊᐧ ᑳ ᑭᑭᐢᑲᒥᔨᐟ ᐋᐧᐱᐢᑫᑭᓄᐃᐧ ᐁᐦᐸᐟ. 19ᓈᑊ ᒫᑲ ᐅᐟ ᐅᑌᓇᐃᐧᐋᐧᐤ ᐊᔭᒥᐦᐁᐃᐧᔨᓂᐊᐧᐠ, ᑭ ᐸᑲᒪᐊᒼ ᐁ ᐃᓯ ᑭᓈᐱᑕᑳᐠ ᐃᓴᐁᐧᐢᐠ ᐅᐦᒋ, ᓈᐯᐊᐧ ᒥᓇ ᐃᐢᑫᐧᐊᐧ, ᐊᐋᐧᓯᓴ ᒥᓇ ᑳ ᒣᑲᐧᓄᐦᑐᔨᐟ, ᒧᐢᑐᓴᐧ ᒥᓇ ᓱᓱᒥᐢᑕᑎᒪᐧ ᒥᓇ ᒫᔭᑎᐦᑲᐧ, ᐁ ᐃᓯ ᑭᓈᐱᑕᑳᐠ ᐃᓴᐁᐧᐢᐠ.
20ᐯᔭᐠ ᒫᑲ ᐅᑯᓯᓴ ᐊᐦᐃᒥᓬᐃᐠ ᐅᑯᓯᓴ ᐊᐦᐊᐃᑕᑊ, ᐊᐹᔭᑕᕒ ᐁ ᐃᓯᔨᐦᑳᓱᐟ ᑭ ᐸᐢᐱᐤ, ᒥᓇ ᑭ ᓈᑖᒧᑐᑕᐁᐧᐤ ᑌᐱᑕ. 21ᐊᐹᔭᑕᕒ ᒫᑲ ᑭ ᐃᐧᐦᑕᒪᐁᐧᐤ ᑌᐱᑕ ᓵᓬ ᐁ ᑭ ᓂᐸᐦᐋᔨᐟ ᑳ ᑎᐯᔨᐦᒋᑫᔨᐟ ᐅᐟ ᐊᔭᒥᐦᐁᐃᐧᔨᓂᒥᔨᐊᐧ. 22ᐁᑲᐧ ᑌᐱᐟ ᑭ ᐃᑌᐤ ᐊᐹᔭᑕᕒᐊ, ᓂ ᑭ ᑭᐢᑫᔨᑌᐣ ᐁᐊᐧᑳᐧᓂᒪ ᐁ ᑭᓯᑳᐠ, ᑖᐃᐠ ᐊᓇ ᐃᑕᒪᐃᐟ ᐁᑯᑕ ᐁ ᐊᔮᐟ, ᑫᐦᒋᓈ ᑭᑕ ᐃᐧᐦᑕᒪᐋᐧᐟ ᓵᓬᐊ; ᓂᔭ ᒫᑲ ᑳ ᒥᓯᐊᑭᐠ ᑲᐦᑭᔭᐤ ᐊᔨᓯᔨᓂᐊᐧᐠ ᑯᑖᐃᐧ ᐅ ᐋᐧᐢᑳᐦᐃᑲᓂᕽ. 23ᐃᐧᒋᐊᔮᒥᐣ ᑭᔮᒼ, ᐁᑳᐃᐧᔭ ᐊᐢᑖᓯ; ᒋᑫᒫ ᐊᓇ ᑳ ᓇᑐᓇᕽ ᓂᔭ ᓂ ᐱᒫᑎᓯᐃᐧᐣ ᑭᔭ ᑭ ᐱᒫᑎᓯᐃᐧᐣ ᓇᑐᓇᒼ; ᒫᑲ ᐃᐧᒋᐊᔮᒥᔭᓂ ᑭ ᑲ ᑲᓇᐁᐧᔨᑖᑯᓯᐣ.
Currently Selected:
ᓂᐢᑕᒼ ᓵᒼᔪᐃᓬ 22: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
