ᓂᐢᑕᑦ ᑭᐦᒋ ᐅᑭᒫᐊᐧᐠ 3
3
1ᓵᓬᐊᒪᐣ ᒫᑲ ᑭ ᐃᓯᐦᒋᑫᐤ ᑭᑕ ᐋᐧᑯᒫᐟ ᐯᕒᐋᐊᐧ ᐃᒋᑊᐟ ᑭᐦᒋ ᐅᑭᒫᐊᐧ, ᐁᑯᓯ ᑭ ᐅᑎᓂᒣᐤ ᐯᕒᐋᐊᐧ ᐅᑖᓂᓯᔨᐊᐧ, ᐁᑯᓯ ᑭ ᐯᓯᐁᐧᐤ ᑌᐱᑕ ᐅᐟ ᐅᑌᓈᔨᕽ, ᐃᐢᑯ ᐁ ᐳᓂᑖᐟ ᑳ ᐅᓯᐦᑖᐟ ᐃᐧᔭ ᐅ ᐋᐧᐢᑳᐦᐃᑲᐣ, ᒥᓇ ᐅ ᐋᐧᐢᑳᐦᐃᑲᓂᔨᐤ ᑳ ᑎᐯᔨᐦᒋᑫᔨᐟ, ᒥᓇ ᐁ ᐋᐧᐢᑳ ᒣᓂᐢᑭᑲᑌᐠ ᒉᕒᐅᓴᓬᐊᒼ. 2ᐱᑯ ᐊᔨᓯᔨᓂᐊᐧᐠ ᑭ ᐸᑭᑎᓈᓱᐊᐧᐠ ᐃᐢᐹᔭᓄᕽ, ᒋᑫᒫ ᐁᑳ ᐋᐧᐢᑳᐦᐃᑲᐣ ᐁ ᐅᓯᐦᒋᑳᑌᐠ ᐅ ᐃᐧᔪᐃᐧᐣ ᐅᐦᒋ ᑳ ᑎᐯᔨᐦᒋᑫᐟ ᐃᐢᑯ ᐁᐊᐧᑯᓂᐃ ᑭᓯᑳᐊᐧ. 3ᓵᓬᐊᒪᐣ ᒫᑲ ᑭ ᓵᑭᐦᐁᐤ ᑳ ᑎᐯᔨᐦᒋᑫᔨᐟ, ᐁ ᐱᒥᑎᓴᐦᐊᒫᐧᐟ ᐅ ᑲᑫᐢᑫᐧᐃᐧᓂᔨᐊᐧ ᑌᐱᑕ ᐅᑖᐃᐧᔭ; ᐱᑯ ᑭ ᐸᑭᑎᓈᓱ ᒥᓇ ᑭ ᒪᒍᐢᑌᐊᒼ ᐃᐧᑭᒫᓯᑲᐣ ᐃᐢᐹᔭᓄᕽ.
4ᑭᐦᒋ ᐅᑭᒫᐤ ᒫᑲ ᑭ ᐃᑐᐦᑌᐤ ᑭᐱᔭᓂᕽ ᐁᑯᑕ ᑭᑕ ᐸᑭᑎᓈᓱᐟ; ᒋᑫᒫ ᐁᐊᐧᑯ ᐁ ᑭᐦᒋ ᐃᐢᐹᔭᓄᐊᐧᕽ; ᑭᐦᒋᒥᑖᐦᑐᒥᑕᓇᐤ ᒪᒍᐢᑌᐦᐊᒫᑫᐃᐧᓇ ᓵᓬᐊᒪᐣ ᑭ ᐸᑭᑎᓈᓱ ᐁᑯᑕ ᐸᑭᑎᓈᓱᐃᐧᓈᐱᐢᑯᕽ.
5ᐁᑯᑕ ᑭᐱᔭᓂᕽ ᑳ ᑎᐯᔨᐦᒋᑫᔨᐟ ᑭ ᓄᑯᐦᐃᓱᐢᑖᐠ ᓵᓬᐊᒪᐣ ᐸᐋᐧᒥᐃᐧᓂᕽ ᓂᐹᑎᐱᐢᐠ; ᑭᓭᒪᓂᑐ ᒫᑲ ᑭ ᐃᑌᐧᐤ, ᓇᑐᑕᒪᐃᐧᐣ ᑫᑲᐧᐩ ᑫ ᒥᔨᑖᐣ. 6ᓵᓬᐊᒪᐣ ᒫᑲ ᑭ ᐃᑌᐧᐤ, ᑭ ᑭ ᐋᐧᐸᐦᑕᐦᐋᐤ ᑭᐟ ᐊᑐᐢᑫᔮᑲᐣ ᑌᐱᐟ ᓄᑖᐃᐧ ᑭᐦᒋ ᑭᓭᐋᐧᑎᓯᐃᐧᓇ, ᐁ ᑭ ᐃᓯ ᐱᒧᐦᑌᐟ ᐁ ᐋᐧᐸᒪᐟ ᑖᐯᐧᐃᐧᓂᕽ ᒥᓇ ᑲᐧᔭᐢᑳᐧᑎᓯᐃᐧᓂᕽ, ᒥᓇ ᑲᐧᔭᐢᑯᑌᐦᐃᐃᐧᓂᕽ ᐁ ᐃᓯ ᐃᐧᒉᐃᐧᐢᐠ; ᒥᓇ ᑭ ᑭ ᑲᓇᐁᐧᔨᑕᒪᐋᐧᐤ ᐅᒪ ᑭᐦᒋ ᑭᓭᐋᐧᑐᑖᑫᐃᐧᐣ, ᐁ ᑭ ᒥᔭᐟ ᐅᑯᓯᓴ ᑭᑕ ᐊᐱᔨᐟ ᐅ ᑭᐦᒋ ᐅᑭᒫᐊᐧᐱᐃᐧᓂᕽ, ᑳ ᐃᑭᕽ ᐊᓄᐦᐨ ᑳ ᑭᓯᑳᐠ. 7ᐁᑲᐧ ᒫᑲ ᑌᐯᔨᐦᒋᑫᔭᐣ ᓂ ᑭᓭᒪᓂᑐᒼ, ᑭ ᑭ ᑭᐦᒋ ᐅᑭᒫᑳᐣ ᑭᐟ ᐊᑐᐢᑫᔮᑲᐣ ᐁ ᑖᐱᐢᑲᒪᐊᐧᐠ ᑌᐱᐟ ᓄᑖᐃᐧ; ᐱᑯ ᒫᑲ ᓂᐟ ᐊᐱᐢᑕᐋᐧᓯᓯᐃᐧᐣ ᓇᒪᐃᐧᔭ ᓂ ᑭᐢᑫᔨᑌᐣ ᑭᑕ ᐃᓯ ᐊᐧᔭᐃᐧᔮᐣ ᐊᐦᐳ ᑭᑕ ᐃᓯ ᐱᐦᑐᑫᔮᐣ. 8ᐁᑯᓯ ᑭᐟ ᐊᑐᐢᑫᔮᑲᐣ ᐃᐧᒉᐁᐧᐤ ᒣᑳᐧᐊᔨᕽ ᑭᐟ ᐊᔨᓯᔨᓂᒪ ᑳ ᑭ ᓇᐊᐧᓱᓇᒋᐠ, ᑭᐦᒋ ᒥᐦᒉᐟ ᐊᔨᓯᔨᓂᐊᐧᐠ ᐁᑳ ᑭᑕ ᑭ ᐊᑭᓇᐁᐧᔨᒥᐦᒋᐠ ᐊᐦᐳ ᐁᑳ ᑭᑕ ᑭ ᐊᑭᒥᐦᒋᐠ ᐁ ᐃᓯ ᐅᓵᒣᔭᑎᒋᐠ. 9ᓂᓯᑐᐦᑕᒧᐃᐧ ᒥᑌᐦ ᒫᑲ ᒥ ᑭᐟ ᐊᑐᐢᑫᔮᑲᐣ ᑭᑕ ᐅᔭᓱᐋᐧᑖᐟ ᑭᐟ ᐊᔨᓯᔨᓂᒪ, ᑭᑕ ᓂᓯᑕᐁᐧᔨᑕᒫᐣ ᑳ ᒥᔮᐧᓯᐠ ᒥᓇ ᑳ ᒫᔮᑕᕽ; ᒋᑫᒫ ᐊᐁᐧᓇ ᑫᐢᑭᑖᐟ ᑭᑕ ᐅᔭᓱᐋᐧᑖᐟ ᐅᐦᐃ ᑳ ᐃᓯ ᑭᐦᒑᔨᐃᐧᒋᐠ ᑭᐟ ᐊᔨᓯᔨᓂᒪᐠ?
10ᐅᒪ ᒫᑲ ᑳ ᐃᑌᐧᔨᐟ ᑭ ᒥᔪᔭᐁᐧᐃᐠ ᑳ ᑎᐯᔨᐦᒋᑫᐟ, ᓵᓬᐊᒪᓇ ᐅᒪ ᐁ ᓇᑐᑕᒥᔨᐟ. 11ᑭᓭᒪᓂᑐᐊᐧ ᒫᑲ ᑭ ᐃᑎᐠ, ᒋᑫᒫ ᐅᒪ ᐁ ᑭ ᓇᑐᑕᒪᐣ ᐁᑳ ᒫᑲ ᐁ ᓇᑐᑌᐢᑕᒫᓱᔭᐣ ᑭᓀᐧᐢ ᐱᒫᑎᓯᐃᐧᐣ; ᐊᐦᐳ ᐁᑳ ᐁ ᓇᑐᑌᐢᑕᒫᓱᔭᐣ ᐁᐧᔪᑎᓯᐃᐧᐣ, ᒥᓇ ᐁᑳ ᐁ ᓇᑐᑕᒪᐧᐟ ᐅ ᐱᒫᑎᓯᐃᐧᓂᐋᐤ ᑭ ᓄᑎᓈᑲᓇᐠ; ᒫᑲ ᐁ ᑭ ᓇᑐᑌᐢᑕᒫᓱᔭᐣ ᓂᓯᑐᐦᑕᒧᐃᐧᐣ ᑭᑕ ᓂᓯᑕᐃᐧᓇᒪᐣ ᐅᔭᓱᐋᐧᓯᐁᐧᐃᐧᐣ. 12ᒫᑎᑲ ᓂ ᑭ ᐃᑐᑌᐣ ᑳ ᑭ ᐃᑌᐧᔭᐣ; ᒋᐢᐟ ᑭ ᑭ ᒥᔨᑎᐣ ᐃᔨᓂᓯᐃᐧ ᒥᓇ ᓂᓯᑐᐦᑕᒧᐃᐧ ᒥᑌᐦ; ᐁᑯᓯ ᐁᑳ ᐃᐧᑳᐨ ᐊᐃᐧᔭᐠ ᐁ ᑭ ᐯ ᐊᔮᐟ ᑖᐱᐢᑯᐨ ᑭᔮ ᐊᐊᐧᓯᐢᐱ, ᒥᓇ ᒣᐧᐢᑕᐢ ᐃᔨᑯᕽ ᓇᒪᐃᐧᔭ ᐊᐃᐧᔭᐠ ᑭᑕ ᐃᐦᑖᐤ ᑭᑕ ᑎᐱᐃᐢᐠ. 13ᐁᑯᓯ ᒥᓇ ᑭ ᒥᔨᑎᐣ ᐊᓂᒪ ᐁᑳ ᑳ ᑭ ᓇᑐᑕᒪᐣ, ᐁᐧᔪᑎᓯᐃᐧᓇ ᒥᓇ ᑭᐢᑌᔨᑖᑯᓯᐃᐧᐣ, ᐁᑯᓯ ᐁ ᐃᐦᑕᓯᒋᐠ ᑭᐦᒋ ᐅᑭᒫᐊᐧᐠ ᓇᒪᐃᐧᔭ ᑭᑕ ᐃᐦᑖᐤ ᑖᐱᐢᑯᐨ ᑭᔭ, ᐃᔨᑯᕽ ᑫ ᐅ ᑭᓯᑳᒥᔭᐣ. 14ᑭᐢᐱᐣ ᒫᑲ ᐃᐧ ᐱᒧᑖᑕᒪᓂ ᓂᐟ ᐃᑖᑎᓯᐃᐧᓇ, ᑭᑕ ᑲᓀᐧᔨᑕᒫᐣ ᓂ ᑲᑫᐢᑫᐧᐃᐧᓇ ᒥᓇ ᓂᐟ ᐃᑕᓱᐁᐧᐃᐧᓇ, ᑖᐱᐢᑯᐨ ᑯᑖᐃᐧ ᑌᐱᐟ ᑳ ᑭ ᐃᓯ ᐱᒧᐦᑌᐟ, ᐁᑲᐧ ᓂ ᑲ ᑭᓈᐧᑖᐣ ᑭ ᑭᓯᑳᒪ. 15ᓵᓬᐊᒪᐣ ᒫᑲ ᑭ ᑯᐢᑯᐢᑳᐤ ᐁᑯᓯ ᐳᑎ ᐸᐋᐧᒥᐃᐧᐣ; ᑭ ᐯ ᐃᑐᐦᑌᐤ ᒫᑲ ᒉᕒᐅᓴᓬᐊᒥᕽ, ᐁᑯᓯ ᑭ ᐅᐦᑎᐢᑲᐃᐧᑳᐸᐃᐧᐢᑕᒼ ᐅ ᑭᐢᑭᓇᐋᐧᒋᐅᐃᐧᓂᐊᐧᑎᔨᐤ ᑳ ᑎᐯᔨᐦᒋᑫᔨᐟ, ᒥᓇ ᑭ ᐸᑭᑎᓈᓱ ᒪᒍᐢᑌᐦᐊᒫᑫᐃᐧᓇ, ᒥᓇ ᑭ ᐸᑭᑎᓈᓱ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ ᒥᓇ ᑭ ᐃᐧᑯᒣᐤ ᑲᐦᑭᔭᐤ ᐅᐟ ᐊᑐᐢᑫᔮᑲᓇ.
16ᑭ ᐯ ᐃᑐᐦᑌᔨᐊᐧ ᒫᑲ ᓂᓱ ᐃᐢᑫᐧᐊᐧ ᐁ ᐱᓯᑳᐧᑎᐢᑫᐧᐃᐧᔨᐟ, ᐁ ᐯ ᓈᑖᒋᐠ ᑭᐦᒋ ᐅᑭᒫᐊᐧ, ᐁᑯᓯ ᑭ ᐅᐦᑎᐢᑲᐃᐧᑳᐸᐃᐧᐢᑕᐁᐧᐊᐧᐠ. 17ᐊᓇ ᒫᑲ ᐯᔭᐠ ᐃᐢᑫᐧᐤ ᑭ ᐃᑌᐧᐤ, ᓂᐟ ᐅᑭᒫᒼ, ᓂᔭ ᒥᓇ ᐊᐊᐧ ᐃᐢᑫᐧᐤ ᐯᔭᐠ ᐋᐧᐢᑳᐦᐃᑲᐣ ᓂ ᐃᐧᑭᓈᐣ; ᓂ ᑭ ᐊᔮᐋᐧᐤ ᒫᑲ ᐊᐋᐧᓯᐢ ᐁ ᐃᐧᒋᐊᔮᒪᐠ ᐋᐧᐢᑳᐦᐃᑲᓂᕽ. 18ᑭ ᐊᔨᑭᐣ ᒫᑲ ᐁ ᑭ ᓂᐢᑐ ᑭᓯᑳᐠ ᐊᓂᒪ ᐁ ᑭ ᐅᐟ ᐊᐋᐧᓯᒥᓯᔮᐣ ᐊᐊᐧ ᐃᐢᑫᐧᐤ ᐃᐧᐢᑕ ᑭ ᐅᐟ ᐊᐋᐧᓯᒥᓯᐤ; ᐁᑯᓯ ᓂ ᓂᓱᐊᔮᓈᐣ; ᓇᒪᐃᐧᔭ ᐊᐃᐧᔭᐠ ᑯᑕᐠ ᓂ ᐃᐧᒋᐊᔮᒥᑯᓈᐣ ᐋᐧᐢᑳᐦᐃᑲᓂᕽ, ᐱᑯ ᐁ ᐃᓯ ᓂᓱ ᐃᐧᑭᔮᕽ. 19ᐊᐊᐧ ᒫᑲ ᐃᐢᑫᐧᐤ ᐅᐟ ᐊᐋᐧᓯᒥᓴ ᑭ ᓂᐱᔨᐊᐧ ᐁ ᑎᐱᐢᑳᔨᐠ; ᒋᑫᒫ ᐁ ᐹᑕᑯᐢᑲᐋᐧᐟ. 20ᐁᑯᓯ ᑭ ᐊᐧᓂᐢᑳᐤ ᐁ ᐋᐱᑖᑎᐱᐢᑳᔨᐠ, ᑭ ᐅᑎᓀᐤ ᒫᑲ ᓂᑯᓯᓴ ᐁ ᐃᐧᐯᒥᒪᐠ, ᒣᑳᐧᐨ ᑭᐟ ᐊᑐᐢᑫᔮᑲᓂᐢᑫᐧᒼ ᐁ ᓂᐹᐟ, ᐁᑯᓯ ᑭ ᐱᒥᓯᒣᐤ ᐋᐧᐢᑭᑲᓂᕽ, ᑭ ᐱᒥᓯᒣᐤ ᒫᑲ ᐁ ᓂᐱᔨᐟ ᐅᐟ ᐊᐋᐧᓯᒥᓴ ᓂᔭ ᓈᐢᑭᑲᓂᕽ. 21ᐃᐢᐱ ᒫᑲ ᐁᐧᓂᐢᑳᔮᐣ ᐁ ᑫᑭᓭᐹᔮᐠ ᑭᑕ ᓄᔭᐠ ᓂᐟ ᐊᐋᐧᓯᒥᐢ, ᐳᑎ ᑭ ᓂᐱᐤ; ᒫᑲ ᐁ ᑭ ᒫᒥᑐᓀᔨᑕᒫᐣ ᐁ ᑫᑭᓭᐹᔮᐠ, ᐳᑎ ᓇᒪᔨᔦᐤ ᓂᔭ ᓂᑯᓯᐢ ᑳ ᑭ ᓂᐦᑖᐃᐧᑭᐊᐠ. 22ᐊᓇ ᒫᑲ ᑯᑕᐠ ᐃᐢᑫᐧᐤ ᑭ ᐃᑌᐧᐤ, ᓇᒪᐃᐧᔭ, ᒫᑲ ᑳ ᐱᒫᑎᓯᐟ ᐁᐊᐧᑯ ᓂᑯᓯᐢ, ᐁᑯᓯ ᑳ ᓂᐱᐟ ᐁᐊᐧᑯ ᑭᔭ ᑭᑯᓯᐢ. ᐊᐊᐧ ᒫᑲ ᑭ ᐃᑌᐧᐤ, ᓇᒪᐃᐧᔭ; ᒫᑲ ᐊᓇ ᑳ ᓂᐱᐟ ᐁᐊᐧᑯ ᑭᔭ ᑭᑯᓯᐢ, ᐁᑯᓯ ᑳ ᐱᒫᑎᓯᐟ ᐁᐊᐧᑯ ᓂᔭ ᓂᑯᓯᐢ. ᐁᑯᓯ ᐅᒪ ᑭ ᐃᓯ ᐱᑭᐢᑫᐧᐊᐧᐠ ᐁ ᐅᐦᑎᐢᑲᐃᐧᐢᑲᐋᐧᒋᐠ ᑭᐦᒋ ᐅᑭᒫᐊᐧ.
23ᐁᑲᐧ ᑭ ᐃᑌᐧᐤ ᑭᐦᒋ ᐅᑭᒫᐤ, ᐊᓇ ᐯᔭᐠ ᐃᑌᐧᐤ, ᐁᐊᐧᑯ ᐊᐊᐧ ᓂᑯᓯᐢ ᑳ ᐱᒫᑎᓯᐟ, ᐁᑯᓯ ᑭᑯᓯᐢ ᐁᐊᐧᑯ ᑳ ᓂᐱᐟ; ᐁᑲᐧ ᑯᑕᐠ ᐃᑌᐧᐤ, ᓇᒪᐃᐧᔭ, ᒫᑲ ᑭᑯᓯᐢ ᐁᐊᐧᑯ ᑳ ᓂᐱᐟ, ᐁᑯᓯ ᓂᑯᓯᐢ ᐁᐊᐧᑯ ᑳ ᐱᒫᑎᓯᐟ. 24ᑭᐦᒋ ᐅᑭᒫᐤ ᒫᑲ ᑭ ᐃᑌᐧᐤ, ᓈᑕᒪᐃᐧᐠ ᐃᓴᐁᐧᑯᒫᐣ. ᑭ ᐯᑐᐁᐧᐊᐧᐠ ᒫᑲ ᐃᓴᐁᐧᑯᒫᐣ ᑭᐦᒋ ᐅᑭᒫᐊᐧ. 25ᑭᐦᒋ ᐅᑭᒫᐤ ᒫᑲ ᑭ ᐃᑌᐧᐤ, ᓂᓱᐃᕽ ᑳ ᐱᒫᑎᓯᐟ ᐊᐋᐧᓯᐢ, ᐁᑯᓯ ᐋᐱᑕᐤ ᒥᔨᕽ ᐊᓇ ᐯᔭᐠ, ᒥᓇ ᐋᐱᑕᐤ ᐊᓇ ᑯᑕᐠ. 26ᐁᑲᐧ ᑭ ᐱᑭᐢᑫᐧᐤ ᐊᓇ ᐃᐢᑫᐧᐤ ᐁᐧᑕᐋᓯᒥᓯᐟ ᑳ ᐱᒫᑌᓯᔨᐟ ᐊᐋᐧᓯᓴ, ᑭ ᐃᑌᐤ ᑭᐦᒋ ᐅᑭᒫᐊᐧ ᒋᑫᒫ ᑭ ᒧᓯᑖᐤ ᐁ ᑭᓭᐋᐧᑐᑕᐋᐧᐟ, ᐅᑯᓯᓴ, ᑭ ᐃᑌᐧᐤ ᒫᑲ, ᐋ ᓂᐟ ᐅᑭᒫᒼ ᑭᔮᒼ ᒥᔨᕽ ᑳ ᐱᒫᑎᓯᔨᐟ ᐊᐋᐧᓯᓴ, ᐁᑳᐃᐧᔭ ᒫᑲ ᓂᐸᐃᕽ. ᒫᑲ ᐊᓇ ᑯᑕᐠ ᑭ ᐃᑌᐧᐤ, ᑭᔮᒼ ᓇᒪᐃᐧᔭ ᐊᐃᐧᔭᐠ ᑭᑕ ᐊᔮᐁᐧᐤ ᓂᔭ ᐊᐦᐳ ᑭᔭ; ᓂᓱᐃᕽ. 27ᐁᑲᐧ ᑭᐦᒋ ᐅᑭᒫᐤ ᑭ ᓇᐢᑫᐧᐊᐧᓯᒣᐤ ᒥᓇ ᑭ ᐃᑌᐧᐤ, ᒥᔨᕽ ᐊᓇ ᑳ ᐱᒫᑎᓯᔨᐟ ᐊᐋᐧᓯᓴ, ᒥᓇ ᐁᑳᐃᐧᔭ ᓂᐸᐃᕽ; ᐁᐊᐧᑯ ᐊᓇ ᐁᐧᑕᐋᐧᓯᒥᓯᐟ. 28ᑲᐦᑭᔭᐤ ᒫᑲ ᐃᐢᕒᐁᐃᓬ ᑭ ᐯᐦᑕᒪᐧᐠ ᐁ ᐋᑐᑖᑲᐧᕽ ᐅᔭᓱᐋᐧᓯᐁᐧᐃᐧᐣ ᑭᐦᒋ ᐅᑭᒫᐤ ᑳ ᑭ ᐃᑕᓱᐋᐧᓯᐁᐧᔨᐟ; ᐁᑯᓯ ᑭ ᑯᓯᑫᐧᔨᒣᐊᐧᐠ ᑭᐦᒋ ᐅᑭᒫᐊᐧ; ᒋᑫᒫ ᐋᐧᐸᐦᑕᒪᐧᐠ ᐅᐟ ᐃᔨᓂᓯᐃᐧᓂᔨᐤ ᑭᓭᒪᓂᑐᐊᐧ ᐁ ᑭᑭᐢᑳᑯᔨᐟ, ᑭᑕ ᐅᔭᓱᐋᐧᓯᐁᐧᔨᐟ.
Currently Selected:
ᓂᐢᑕᑦ ᑭᐦᒋ ᐅᑭᒫᐊᐧᐠ 3: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
