Acts 22

1“pēhtamok! nāpētik, niciwāmitik ēkwa ohtāwīmātik, ninātamāson ēkāya kita-misihoyān!” 2ispī ē‑pēhtawācik ē‑Jewiyinīmoyit, kwayask natohtēwēwak, ēkwa Paul māci-pīkiskwēw.

3“niya ōma Jew ē‑kī-nihtāwikiyān Tarsus, Cilicia askīhk, māka ōta ē‑kī-tasi-ohpikihikawiyān Jerusalemihk ē‑kī-kiskinohamawit Gamaliel. kwayask nikī-kiskinohamākawin owiyasiwēwiniwāwa kimosōmipaninawak, ēkwa sōskwāc kwayask ē‑kī-pimitisahwak kisē-manitow tāpiskōc kiyawāw ōta anohc kā‑ayāyēk. 4nikī-kwātakihāwak otayamihāwa kā‑pimitisahwāyit kā‑tipēyihcikēyit ēkwa ātiht ē‑nipicik ōki otāpwēhtamowak, niya nitōcikan. nikī-otināwak nāpēwak, iskwēwak ēkwa nikipahwāwak. 5māwaci-kihci-ayamihēwiyiniw ēkwa māmawi Jewak onīkānīwak kika-kī-wīhtamākowāwak ē‑tāpwēyān. masinahikanisa nikī-kahtitinēn kita-miyimak Jewa Damascusihk kā‑ayāyit; ēkosi ēkotē nikī-itohtān kita-otinakik ayisiyiniwak ēkwa kita-pēsiwakik ē‑tahkopisocik pīwāpiskwēyāpiya ohci, Jerusalemihk kita-kitimahācik simākanisak.

Paul ātotam okwēskātisiwin

(Acts 9.1-19; 26.12-18)

6“ē‑mēkwā-pimohtēhoyān cīki Damascusihk, nānitaw ē‑āpihtā-kīsikāk, kētahtawē kīsikohk ohci kā‑kīkāyāstēk wāsakām ita kā‑nīpawiyān. 7nikī-pahkisinin ēkwa nipēhtawāw awiyak ē‑mātwē-pīkiskwēt, ‘Saul, Saul! tānēhki kā‑kakwātakihiyan?’ 8‘awīna ōma kiya, kā‑tipēyihcikēyan?’ nititwān. ‘niya ōma Jesus Nazarethihk ohci,’ kā‑itwēt. ‘kikakwātakihin.’ 9aniki nāpēwak kā‑wīcēwicik wāpahtamwak ōma kā‑wāstēpayik, māka namōya pēhtawēwak anihi kā‑pīkiskwāsiyit. 10ēkwa nititāw, ‘kā‑tipēyihcikēyan, tānisi māka ka‑tōtamān?’ ōmisi kā‑itwēt, ‘pasikō, itohtē Damascusihk. ēkotē kika-wīhtamākawin kahkiyaw kīkway tānisi kisē-manitow itasowēw kita-tōtaman.’ 11iyikohk ē‑kīkāwāstēk namōya niwāpin, ēkosi niwīcēwākanak ē‑sakāpēkinicik Damascusihk isi.

12“ēkotē pēyak nāpēw ayāw Ananias ē‑isiyihkāsot, mitoni kwayask ē‑ayamihēwātisit. kī‑pimitisaham wiyasiwēwin ēkwa Jewak kī‑takahkēyimēwak ēkota ōtēnāhk. 13nikī-pē-nitawāpamik. ē‑nīpawīstawit nipīkiskwātik, ‘niciwā, Saul! kīhtwām kika-wāpin,’ itwēw. sēmāk niwāpin, ēkwa nikitāpamāw. 14ōmisi itwēw, ‘kimosōmipaninawak omanitōmiwāwa kinawasōnik kita-kiskēyihtamwāt otitēyihtamowin. kinawasōnik kita-wāpamimat ana kā‑kwayaskwātisit ēkwa kita-pēhtawat ē‑pīkiskwēt. 15kika-pīkiskwēstamawāw. kika-wīhtamawāwak ayisiyiniwak ōma kā‑wāpahtaman mīna kā‑pēhtaman. 16ēkwa tānēhki kā‑pēhoyan? niyā, nitawi-sīkahāhtākosi, kita-kāsiyāpāwēki ki‑maci-tōtamowin ē‑kākīsimostawat kā‑tipēyihcikēt.’

Paul tēpwātāw ka‑kakēskimāt pītosiyiniwak

17“kāwi nikī-itohtān Jerusalemihk, ēkwa ē‑mēkwā-ayamihāyān kihci-ayamihēwikamikohk tāpiskōc ē‑otisāpahtamān. 18ē‑wāpamak kā‑tipēyihcikēt, ōmisi ē‑isit, ‘kakwēciyāhok, sipwēhtē ōta ohci, ayisiyiniwak namōya kita-tāpwēhtamwak ācimiyani.’ 19‘kā‑tipēyihcikēyan!’ nititāw. ‘kiskēyihtamwak aniki ē‑kī-pīhtikwēyān ayamihēwikamikwa ē‑kī-kipahwakik kā‑tāpowakēyimiskik, ēkwa mīna ē‑kī-pakamahwakik. 20ēkwa ispī ana kā‑pīkiskwēstamāsk, Stephen, ē‑nipahiht, ēkota nikī-ayan ē‑kī-wīcihiwēyān ē‑kanawēyihtamān oskotākāwāwa aniki kā‑nipahtākēcik.’ 21‘niyā,’ nikī-itik kā‑tipēyihcikēt, ‘kika-itisahotin wāhyaw itē pītosiyiniwak kā‑ayācik.’”

22ayisiyiniwak kī‑natohtawēwak Paula isko ē‑itwēt ōma iskwēyāc, kī‑māci-tēpwēwak ē‑kisīwēcik, “nipahihk, namōya tēpakēyihtākosiw kita-pimātisit.” 23kī‑tācikwēwak ē‑ohpiniwēpinahkik oskotākāwāwa ēkwa asiskiy ē‑ohpwēwēpinahkik. 24kihci-simākanisiwikimāw kī‑sīhkimēw otoskinīkīma kita-itohtahācik Paula simākanisiwikamikohk, ēkotē kita-pasastēhwācik, kah‑kakwē-kiskēyihtahkik tānēhki ohci ayisiyiniwa kā‑tēpwātikot. 25ēkwa ē‑kī-tahkopitiht Paul ta‑pasastēhōt, ēkota ē‑nīpawiyit simākanisiwikimāwa Paul itēw, “itastēw cī wiyasiwēwinihk kita-pasastēhoht awiyak ē‑akisot Rome okimānāhk ēkwa ēkāya nīkān kita-wiyasiwātiht omāyi-tōtamowin ohci?”

26ispī ē‑pēhtahk awa simākanisiwikimāw, kakwēcimēw kihci-simākanisiwikimāwa, “tānēhki ōma kā‑tōtaman? ē‑akisot awa nāpēw Rome okimānāhk!”

27ēkosi kihci-simākanisiwikimāw nitawi-kakwēcimēw Paula, “wīhtamawin, ē‑akisoyan cī ōma Rome askīhk?”

“ēha,” itēw Paul.

28“mistahi nikī-tipahikān kita-akisoyān,” itik simākanisiwikimāwa.

“niya wiya ē‑kī-nihtāwikiyān Rome tipēyihcikēwinihk kā‑ohci-akisoyān,” itēw Paul.

29aniki nāpēwak kā‑kī-wī-pakamahwācik kī‑asēhtēwak. simākanisiwikimāw wīsta kostam ayisk kī‑tahkopitēw Paula ēkwa Rome ē-akisot.

Paul ohtiskawikāpawīstawēw Jewak onīkānīwak

30ana simākanisiwikimāw kī‑nōhtē-kiskēyihtam tānēhki Jewak kā‑kisiwāhikocik Paula. ēkosi ē‑wāpahk kī‑āpihkonēw Paula ēkwa kī‑itasowēw kihci-ayamihēwiyiniwa ēkwa Jewak onīkānīwa kita-māmawopicik. ēkwa kī‑pēsiwēw Paula ēkota kita-ohtiskawikāpawīstawāt.

Currently Selected:

Acts 22: PCSBR

Highlight

Compare

Copy