Acts 20

Macedonia ēkwa Achaia isi

1ē‑kī-pōni-māyahkamikisicik ayisiyiniwak, Paul kī‑māmawopihēw kahkiyaw otayamihāwa, ēkwa kī‑sīhkiskawēw ēkāya kita-pōmēyit. ē‑kī-atamiskawāt kī‑sipwēyācihow ē‑itohtēt Macedonia askīhk. 2ē‑ati-pimohtēhot ēkota askīhk, kī‑pā-pīkiskwātēw ayisiyiniwa kita-āhkamēyimoyit otāpwēhtamowiniyihk. ēkota ohci Achaia askīhk kī‑itohtēw. 3ēkotē nisto pīsim kī‑ayāw. ē‑mēkwā-wawēyīt kita-itohtēt Syria, kī‑pēhtam Jewa ēsa ē‑wī-kakwē-nipahikot. ēkosi nitawāc kāwi kī‑itohtēw Macedonia. 4Sopater, okosisa Pyrrhus, Berea ohci, kī‑wīcēwik, ēkwa Aristarchus ēkwa Secundus Thessalonica ohci, ēkwa Gaius Derbe ohci, ēkwa Timothy, asici Tychicus ēkwa Trophimus Asia askīhk ohci. 5ōki kī‑nīkāni-sipwēhtēwak ē‑nitawi-pēhikoyāhkok Troas ōtēnāhk. 6nikī-pōsinān nāpihkwānihk Philippi ohci, āsay ē‑kī-wīhkohkēhk ēkāya ohpihcicikan kā‑āpatahk pahkwēsikanihk kā‑itamihk. niyānan kīsikāw ē‑kī-ispayik nikī-otihtānānak Troasihk, ēkotē tēpakohp kīsikāw nikī-ayānān.

Paul kiyokēw Troasihk iskwēyāc

7ē‑nistami-kīsikāk kā‑wī-ispayik nikī-māmawo-mīcisonān. Paul kī‑pīkiskwātēw ayisiyiniwa kinwēs piyisk ē‑āpihtā-tipiskāyik, wiya ē‑wī-sipwēhtēt wāpaniyiki. 8mihcēt wāsaskotēnikana kī‑āpacihtāwak ispimihk ita kā‑māmawopiyāhk. 9pēyak oskinīkiw Eutychus kī‑apiw wāsēnamānihk, ēkwa kinwēs ē‑pīkiskwēyit Paula, kī‑nōhtēkwasiw piyisk kī‑kawihkwasiw nistwāw ē‑ispimiwiyik ōma wāskāhikan, ēkotē ohci kā‑nīhcipayit, nētē ē‑pahkisīt mohcihk. kī‑ohpinēwak ayisiyiniwak ēcika ōma ē‑nipahisiniyit. 10Paul kī‑nīhtaciwēw ēkwa kī‑nawakīstawēw ē‑micimināt. ōmisi itwēw, “ēkāya nānitaw itēyihtamok, kēyāpic awa pimātisiw!” 11ēkwa kāwi kī‑āmaciwēw ēkwa kī‑pahkwēnēw pahkwēsikana ē‑mīcisocik. isko ē‑wāpahk kī‑pīkiskwātēw ēkwa kī‑ati-sipwēhtēw. 12ōhi oskinīkiwa kī‑kīwēhtahēwak, ēkwa kī‑miywēyihtamwak ē‑pimātisiyit.

Troas isko Miletus

13nikī-pōsinān nāpihkwānihk Assos otēnahk isi, ēkotē ē‑wī-pōsihāyāhk Paul. nikī-itikonān ēkosi kita-tōtamāhk, ayisk ē‑wī-itohtēt ēkotē kita-mosci-pimohtēhot. 14ispī ē‑nakiskākoyāhk ēkota Assos ōtēnāhk, nikī-pōsihānān nāpihkwānihk ēkota ohci Mitylene ōtēnāhk. 15ēkota ohci nāpihkwānihk nānitaw Chios ōtēnāhk ē‑wāpahk. ēkwa kīhtwām ē‑wāpahk nikī-takocimānān Samosihk, ēkota ohci ē‑sipwēcimēyāhk nikī-takwāsinān Miletusihk ē‑wāpahk. 16Paul kī‑kīsēyihtam ēkāya kita-kapāt Ephesusihk. kīspin ēkosi ka‑kī-ispayiyik kī‑nōhtē-takohtēw Jerusalemihk anima kīsikāw Pentecost kā‑itahkik ohci. kī‑kakwēciyāhow ēkāya ē‑nōhtē-kipihcīt kinwēs Asia askiy.

Paul iskwēyāc pīkiskwātēw onīkānīwa Ephesusihk

17Paul kī‑itisahamawēw pīkiskwēwin Miletus ohci onīkānīwa otayamihāwa Ephesus kā‑ayāyit, kita-pē-itohtēyit. 18ispī ē‑takohtēyit ōmisi itēw, “kikiskēyihtēnāwāw tānisi ē‑kī-isi-pimātisiyān misakāmē kā‑wīcēwitakok nistam ohci kā‑takohtēyān Asia askīhk. 19nikī-atoskawāw kā‑tipēyihcikēt pēci-nāway tapahtēyimowinihk ēkwa āskaw ē‑oyohcikawāpiyān. nikī-āyimihikwak Jewak ē‑kakwē-nipahicik āskaw. 20kikiskēyihtēnāwāw namwāc nitohci-kātān kīkway kita-wīcihikoyēk, ē‑kakēskihkēmoyān mīna ē‑kiskinohamākēyān ita ayisiyiniwak ē‑ayācik ēkwa kīkiwāhk. 21nikī-asomāwak Jewak mīna pītosiyiniwak piko kita-pakitinahkik omāyi-tōtamowiniwāwa ēkwa kita-kwēskīstawācik kisē-manitowa mīna ka‑tāpwēwakēyimāyēk Jesus kitipēyihcikēminaw.

22“ēkwa ka‑nanahihtawak kā‑kanātisit ahcāhk kita-itohtēyān Jerusalemihk, namwāc nikiskēyihtēn tānisi kita-tōtākawiyān. 23nikiskēyihtēn tahto kihci-ōtēnāhk itohtēyāni kā‑kanātisit ahcāhk nitasomik kita-kipahokawiyān ēkwa kita-macipayiyān. 24māka namōya nimikoskācihikon. namōya nikakwē-pimācihison. nayēstaw piko ē‑nitawēyihtamān kita-kīsihtāyān nitatoskēwin, kā‑kī-miyit kā‑tipēyihcikēt Jesus kita-tōtamwak kita-wīhtamwak omiywācimowin kisē-manitow ē‑kisēwātisit.

25“kikī-kiyokātināwāw kahkiyaw, ē‑kakēskimitakok otipēyihcikēwin ohci kisē-manitow. nikiskēyihtēn ēkwa kiyawāw namōya kīhtwām kika-wāpamināwāw. 26ēkosi kikihci-itināwāw anohc kā‑kīsikāk kīspin awiyak wanihow, namōya niya nitōcikan. 27ayisk namwāc nitohci-kostēn kita-wīhtamātakok anima kisē-manitow kā‑nitawēyihtahk kita-kiskēyihtamēk. 28kā‑kanātisit ahcāhk kitōtinikowāw kita-nīkānīyēk. kanawēyimisok ēkwa kitēyimihkok aniki kā‑tāpwēwakēyihtahkik, tāpiskōc kā‑isi-kitēyimāt awiyak omāyatihkoma, ayisk kā‑tipēyihcikēt anihi otiyinīma kī‑mēkiw okosisa omihkomiyiwa wiyawāw ohci. 29nikiskēyihtēn ispī sipwēhtēyāni ta‑pē-itohtēwak ātiht nāpēwak ē‑āyimisicik tāpiskōc mahihkanak. kita-kitimākihtāsowak. 30kita-otihcipayiw kētahtawē ātiht nāpēwak kiyawāw ohci kita-kiyāskicik kita-paskētahācik otayamihāwa ta‑pimitisahokocik. 31aswēyihtamok, ēkwa kanokiskisik nisto askiy āskaw ē‑ohcikawāpiyān ē‑kīsikāk ēkwa ē‑tipiskāk pā‑piskihc kikī-kiskinohamātināwāw.

32“ēkwa ninātāmototawāw kisē-manitow kika-kanawēyimikoyēk ēkwa kita-ohci-wīcihikowisiyēk otitwēwinihk okisēwātisowinihk ohci. kika-miyikowāw sawēyimikowin kisē-manitow kā‑kanawēyihtamawāt otiyinīma. 33namwāc nitohci-nitawēyihtēn awiyak kita-miyit sōniyāsa ahpō ayiwinisa. 34kikiskēyihtēnāwāw ē‑kī-atoskēyān kita-ohcīstamāsoyān kahkiyaw kīkway kā‑nitawēyihtamān asici aniki kā‑wīcihicik ē‑miyakik kīkway ē‑nitawēyihtahkik. 35kikī-wāpahtihitināwāw misiwē isi piko kita-atoskēyēk sōhki, ēkota ohci kita-wīcihāyahkok aniki kā‑kitimākisicik. kanokiskisik kā‑kī-itwēt kā‑tipēyihcikēt Jesus, ‘nawac kika-miywēyihtēn kita-mēkiyan kīkway ispīhci kita-miyikawiyan.’”

36ē‑kīsi-pīkiskwēt Paul kī‑ocihcihkwanapiw asici anihi kahkiyaw ēkota kā‑ayāyit ē‑ayamihēstawāt kisē-manitowa. 37kahkiyaw ōki kī‑mātowak Paula ē‑ākwaskitinācik mīna ē‑ocēmācik. 38mitoni kī‑mihtātamwak wiya ē‑kī-itikocik ēkāya kīhtwām kita-wāpamācik. ēkwa nāpihkwānihk kī‑isi-wīcēwēwak.

Currently Selected:

Acts 20: PCSBR

Highlight

Compare

Copy