Рим 12
12
Ичв уьмрар Аллагьдиз бахш апӀинай
1Гьаддиз учвуз ккарагураза, гъардшар, Аллагьдин ужʼвал бадали ичв жанар, Гьадгъаз хуш шлу марцци, чӀиви гъурбнарси, дерккай. Му Аллагьдиз фагьумлу вуйи гъуллугъ хьибди. 2Гъит, му дюнʼяйин гьюкмари учвʼин агъавал дарапӀри. Аллагьдин ужуб, рази ктаъру ва гьубкӀу ният фу вуш, аьгъю хьпан бадали, ичв фагьум цӀийи алапӀури, дигиш йихьай.
3Аллагьди узуз вакилвал багъиш дапӀнайиган, узу учвуз варидариз кӀураза: учву ичв вуйидартӀан артухъ заанди мидисанай, учвуз гьарсариз Аллагьди туву хъугъувализ дилигну, фурс ктарди гъузай. 4Ихь беден гизаф паярикан вушра, вари паяри саб ляхин апӀурадар. 5Гьаци ухьура вари Месигьдихъди саб беден вуди, дидин паяр вухьа. 6Аллагьди Чан ужувлантина гьарсариз чан хусуси багъиш гъурубкьунхьуз. Шлиз пайгъамбарвалин багъиш аш, гъит дугъу думу, чан хъугъувализ дилигну, ишлетмиш апӀри. 7Шлиз жарадарин гъуллугънаъ шлу багъиш аш, гъит учв гьадму гъуллугъназ бахш ишри. Шлиз мялимвалин багъиш аш, гъит учв мялимвализ бахш ишри. 8Шлиз ккарцуз шлу багъиш аш, гъит дугъу жарадар ккарцри. Шлиз жумартвалиинди пай апӀуз шлу багъиш аш, гъит дугъу гьаци, кӀвакк ккадарди, пай апӀри. Шлиз жарадарин зиин аьхювал апӀуз шлу багъиш аш, гъит аьхювал апӀри вари юкӀв хъипну ва намуслуди. Шлиз ужʼвал апӀуз шлу багъиш аш, гъит думу шадвалиинди апӀри.
9Гъит, ичв масанвал кӀваантӀан вуйиб ибшри. Писвал ккун мапӀанай, ужувлахъ хъачӀарккай. 10Чвйирси чиб-чпи ккун апӀинай. Гьарсари жвувазтӀан чиб-чпиз артухъ гьюрмат апӀинай. 11ТӀагъру дарди, юкӀв хъади лихури, рюгь гьевеслуди Агъайин гъуллугънаъ йихьай. 12Умудвалиъ шадди, бедбахтвалариъ сабурлуди, ккарагбариъ мюгькамди гъузай. 13Аллагьдин адмийириз читинвалариъ кюмек апӀинай. Хялар кьабул апӀури гъузай.
14Учвухъ хъергнайидариз ужувлар ккун апӀинай. Ужувлар ккун апӀинай, люкьнар – ваъ. 15Шадлударихъди шад йихьай. Ишурайидарихъди ишай. 16Чиб-чпихъди албагну яшамиш йихьай. Фурс мукубчӀванай. Аьжузарихъди дуствал апӀуз нач мапӀанай. Жвувкан заанди фикир мапӀанай.
17Писвализ писвалиинди жаваб мутуванай. Варидариз ужʼвал апӀури гъузай. 18Учвхьан шлубкьан варидарихъди мясляаьтниинди яшамиш йихьай. 19Аьзиз дустар, хъял алдабгъбахъ махьанай, хъял алдабгъуб Аллагьдин ихтиярнаъ гъибтай. Фицики Гирами китабариъ дибикӀна:
«Хъял алдабгъувал Йиз ляхин ву.
Узу жаза тувдиза» – кӀура Агъайи.
20Гьамдин ерина,
«эгер яв душмандиз гашди аш,
уьл тув дугъаз.
Эгер думу дахаргну аш,
шид тув.
Эгер уву гьамци апӀури гъашиш,
думу начʼвалиан йикӀиди».
21Писвал увʼин гъалиб хьуз мигъитан, думу ужʼвали ккапӀ.
Currently Selected:
Рим 12: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
