Рим 11
11
Аллагьдиз Чан халкь кӀваълан гьархнадар
1Хъа магьа узу гьерхраза: «Аллагьди Чан халкь Чахьан гьадаънадарин?» ИкибаштӀан, ваъ! Узура Ибрагьимдин насил, Вениаминдин тухмиан вуйи израилжви вуза. 2Аллагьди Чаз улихьмиди аьгъю Чан халкь Чахьан гьадаънадар! Гирами китабариъ Илʼясдикан фу дупнаш, аьгъдарди анчвуз? Илʼясди Аллагьдиз израил халкьдилан аьрз апӀуру:
3«Я Агъа, дурари Яв пайгъамбрар
гъийихнийи ва,
Увуз гъурбнар хру Яв йишвар ккидирчнийи;
анжагъ узу сар сагъди имиза,
аммаки, дурариз узура йивну йикӀуз ккунди а».
4Аллагьди дугъаз фициб жаваб тувнийи?
«Узу Узуз
Ваалдин улихь кӀул ис дарапӀу ургуд агъзур кас
гъюрхюнза».
5Гьаму вахтарира Аллагьди Чан ужувлиинди кадагънайи саб бицӀи гъварч адмийир а. 6Аллагьдин ужувлиинди дубхьнайиб, инсандин ляхнариз дилигну, дубхьнадар. Гьаци дайиш, ужʼвал ужʼвалси гъубзидайи.
7Гьамус фу шула? Израилин халкьдиз чпи абгурайиб гъибихъундар. Анжагъ кадагънайидаризтӀан гъибихъундар, имбударин инсанвал гъудубгну. 8Гирами китабариъ дупнайиси:
«Аллагьди дурар дерин нивкӀуъ аънийи».
«Дурариз дярябкъбан бадали,
Аллагьди дурарин улар хъяркьнийи,
дурариз деребхьбан бадали,
ибариъ итӀишвнийи,
ва гьамци гъийин йигъазкьан ими».
9Давудри гъапнийи:
«Гъит, дурариз,
чпин шадлугъар
чпиз ккиву рукьарна чулар ишри.
Гъит, дурар хъахъну алдакри ва жазайикк ккахъри.
10Гъит, дурариз дярябкъбан бадали,
дурарин уларихь мучӀушин гьабхъри.
Гъит, дурарин юкьвар гьаргандиз
кьяни ишри».
11Узу кӀураза: «Жугьдар, хъахъну, гъудужвуз даршлуси, алдакнинхъа?» ИкибаштӀан, ваъ! Гьадрарин алдакувалиланмина имбу халкьариз, жугьдар бахил хьпан бадали, уьрхювал гъабхьну. 12Дурарин алдакували вари дюнʼяйиз ужʼвал хуруган ва дурариз кам гъахьиган, имбу миллетариз зурба ужувлар шлуган, хъа эгер вари жугьдар Аллагьдихьна хътакиш, имбу дюнʼяйиз фукьан зурба ужувлар шул!
13Гьамус узу, жара миллетар, учвухьна илтӀикӀураза. Узу Аллагь аьгъдру миллетарихьна гьаънайи вакил вуза. Узу йиз гъуллугъ заан вуди гьисаб апӀураза. 14Йиз халкь бахил дапӀну, сакьюдаркьана уьрхидиза кӀури, миж кайиз. 15Аллагь жугьдарихьан гьидицган, дюнʼяйин жара халкьариз мясляаьт гъабхнуш, хъа Аллагьди жугьдар кьабул гъапӀган, фу шул? Дийихнайидар чӀиви апӀдаринхъа?
16Эгер яв уьлин сабпи парча Аллагьдиз бахш гъапӀиш, имбу вари уьлерра гирами хьидияв. Эгер гьарин ччивар гирамидар вуш, дидин кюлерра гирами ву.
17Гъяни гьарин кюлер кудуршвнади, дурариин чӀурудар фици улурхьнуш, гьадму жюрейиинди учву, жара миллетар, чӀуру чӀвумуччварси гьамус гъяни гьарин ччиварин кьувватнак кеъначва. 18Гьаци вуйиган, кюлерин зиин фурс мапӀан, гьаз гъапиш, ччивариз уьмур туврайир уву дарва, хъа ччивари увуз уьмур тувра. 19Уву пидива: «гьатму кюлер узу улурхьбан бадали ктуршвну». 20Думу гьякь вуяв. Дурар чпин хътругърувалиан ктуршвну. Хъа уву дурарин йишвʼин хъугъувалиан алва. Гьаддиз фурс мапӀан, хъа гучӀ кади гъуз. 21Аллагьди багъри кюлер гьяйиф гъапӀундарш, увура гьяйиф апӀидар.
22Гьаци вуйиган, увуз Аллагьдин ужʼвалра, хъялра рябкъюравуз. Дугъан хъял Чахьан гьудучӀвдарихьна шулу. Хъа увухьна вуйи ужʼвал, эгер уву Дугъан ужувлакк гъузруш, рябкъюравуз. Гъудрузиш, гьаркан увура кадабтӀиди. 23Хъа эгер жугьдар чпин хътругърувалиъ утӀукьну гъудрузиш, дурар хъана гьарик кюрхьди, даршуз, Аллагь му кюлер тазабаштӀан кюрхьюз кьудратлу ву. 24Хъа эгер уву чӀуру гьаркан кадабтӀнайи циркил, багъри дарди, гъяни гьарик кубхьнуш, хъа кюлериз чпин багъри гьарʼин улурхьуз фукьан рягьят шул!
25Гъардшар, узуз учву му сирнан гъавриъ адарди гъитуз, учву ичв аьгъювалиин гизаф умуд кивну гъудрузбан бадали, ккундарзуз. Израилин саб пай агьлар, чпин утӀукьну гъузувалиъ арсну, жара миллетар вари тамамди Аллагьдихьна илтӀикӀайизкьан, гъузди. 26Хъасин, Израилин вари халкь уьрхиди. Гирами китабариъ дибикӀнайиси:
«Сион дагъдилан Уьрхрур гъиди.
Дугъу Якьубдин тухмиан вари чӀуруб идипиди,
27ва Узу дурарилан гунгьар алдагъган,
дурарихъди йикьрар йитӀидиза».
28Ужувлан хабар кьабул дарапӀбиинди жугьдарикан Аллагьдин душмнар шула. Жара миллетар ичв хайирназ ву. Мидиз дилигди, жугьдар Аллагьдин кадагънайи халкьди гъузди, Аллагьдиз дурар ккунду, фицики Дугъу дурарин абйириз гаф тувнийи. 29Фицики Аллагьди Чав дих дапӀнайи халкь ва Чав тувнайи гаф уьрхиди. 30Саб фила-вуш учву Аллагь гьясбикк апӀдайчва. Хъа гьамус, Дугъахъ жугьдар хъпебехъган, Дугъу учвуз ужʼвал улупура. 31Аллагьди учвуз Чан ужʼвал улупуз, хъасин думу дурариинра алабхъбан бадали гьаму ражари жугьдар Дугъахъ хъпехъурадар. 32Аллагьди вари халкьариз, хъасин чпилан хил алдабгъбан бадали, хъпебехъри гъузуз шлу вахтар улупнийи.
33Фукьан дарин Аллагьдин фагьмин ва зигьмин деринвал ва булвал! Фукьан дарин Дугъан ниятар ктитуз даршлувал! Фукьан дарин Дугъан рякъярин гъавриъ ахъуз даршлувал!
34«Агъайин фагьум шли аьгъю апӀиди,
Дугъаз насигьятар шли тувди?»
35«Шли фу тувну Аллагьдиз,
Дугъу думу кьяляхъ апӀуз буржлу вуйиб?»
36Вари Аллагьди халкь гъапӀну, аьхир, ва гьадму вари яшайиш анжагъ Гьадгъуланмина ва Гьадгъаз шула. Аьсрариан аьсрариз ад Гьадгъаз ву. Амин!
Currently Selected:
Рим 11: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
