Рим 13

Месигьдин терефкрар гьюкмихъ хъябяхъну ккунду

1Гьарсар заан гьюкмиз мютӀюгъ духьну ккунду, фицики Аллагьдихьан дару гьюкум адар; гьаму ражари айи гьюкумра Аллагьди дебккнайиб ву. 2Гьаддиз, фуж гьюкмиз къаршуди гъудужвураш, гьадму Аллагьди дебккнайибдиз къаршу гъедергурайи гьисаб ву. Гьаци апӀрудари чпиина тахсир хура. 3Ужʼвал апӀрудариз гьюкумдрарихьан гучӀ адар, хъа – писвал апӀрудариз. Эгер гьюкумдрарихьан увуз гучӀ апӀуз ккундарш, ужʼвал апӀури гъуз ва дурарин терефнаан яв тяриф ебхьидивуз. 4Гьюкумдар увуз ужʼвал хьпан бадали лихурайи Аллагьдин лукӀ ву. Хъа эгер уву писвал апӀуруш, гучӀ апӀин, фицики увуз жаза гьадабтӀуб гьадгъан гьюкмиъ гьавайиди айиб адар. Писвал апӀруриз жаза адабтӀури, Аллагьдин хъял алдабгъури, дугъу Аллагьдиз гъуллугъ апӀура. 5Гьаци вуйиган, дугъаз мютӀюгъ духьну ккунду, неинки хъпебехъиш, жаза адабтӀур кӀури, хъа – жвуван намус бадалира.

6Гьаци вуйивализ дилигну, учву налогарра тувай; гьюкумдрари, Аллагьдин гъуллугъчйири, чпин вари вахт гьюкум гъабхбиинди гьапӀра. 7Гьардиз лайикь вуйиб тувай: шлиз – налогар, шлиз – харжар, шлиз – гучӀ, шлиз – гьюрмат.

8Саризра буржлуди мугъузанай; гъит, учвук анжагъ саб буржтӀан дарибшри, думура – чиб-чпихьна улупру масанвалин бурж, фицики, шли чан багахь хьайир ккун гъапӀиш, гьадгъу Къанун тамам апӀура. 9Табшуругъариз лигай: «кьяппавал мапӀан», «миликӀан», «мигьитӀибкӀан», «жараринуб ккун мапӀан», ва жара табшуругъариъра улупурайиб саб ву: «Багахь хьайир, жвуваз жвувси, ккун апӀин». 10Масанвали багахь хьайириз писвал хурдар. Гьаддиз масанвал Къанун тамам гъапӀу гьисаб ву.

11Гьаму вахт фициб вуш, аьгъяди, гьаци апӀури гъузай. Сарун учву нивкӀʼан хъиргру вахт дуфна, фицики ухьу уьрхру вахт, ихь сифте хъугъу йигъак гъилигган, гьамус багахь дубхьна. 12Йишв ккудубкӀура. Йигъ сарун багахь хьа. Мици вуйиган, вари мучӀу ляхнарихьан ярхла хьидихьа, ва аквназ лайикь вуйибдихъди яракьламиш хьидихьа. 13Гъачай, йигъандин аквназ барабар вуйиси, намуслуди яшамиш шулхьа. Пиянискаваларикк ва сатӀи кьяппаваларикк кӀул ккивдархьа. Аьйиб апӀруб ва гьяясузуб апӀидархьа, гьюжатар апӀидархьа ва сар-сариин бахил хьидархьа. 14Ихь Агъа Иса Месигьди учву уьрхричву, ичв бедендин гъайгъушин тямягьяриз миилтӀибкӀанай.

Currently Selected:

Рим 13: ТабГК

Highlight

Copy