Паччагьлугъар-3 19

Илʼяс пайгъамбар Изавелихьан гьергуб

1Ахавди чан хпир Изавеликна Илʼяс пайгъамбри гъапӀубдикан варибдикан ктибтнийи, ва дугъу турихъди Баалин вари пайгъамбрар йивну йикӀуваликанра. 2Изавели Илʼяс пайгъамбрихьна гьамци пуз чархачи#19:2 Чархачи: табшуругъ хьади гьаънайир. гьаънийи:

– Гъит, заанудари узуз ижми жаза туври, эгер закур гьаму вахтназ узу увкан уву пайгъамбрарикан гъапӀуб дарапӀиш.

3Илʼяс пайгъамбриз гучӀ гъабхьнийи ва, чан уьмур къутармиш апӀури, гьергнийи. Ягьудайиъ айи Беэр-Шевайиз хъуркьиган, дугъу гъараваш душваъ гъитнийи. 4Хъа учв буш чюлиз сад йигъандин рякъюн манзилназ гъушнийи. Думу душвахьна гъафнийи ва ялгъузди айи рукчикк деънийи ва, чаз аьжал ккун апӀури, ккарагнийи:

– Сарун чӀяаьн ву, РАББИ, йиз уьмур гъадабгъ, узу йиз архйиртӀан ужур дарза аьхир.

5Хъасин Илʼяс пайгъамбар гьадму рукчикк дахънийи ва гъаахнийи. Сабпну малайик дугъак куркӀнийи ва гъапнийи:

– Гъудужв ва ипӀин.

6Илʼяс пайгъамбар кьяляхъ илдицну гъилигнийи – ва магьа дугъан кӀулихъ аржлариин дубжнайи лаваш ва шид айи гажин хъайи. Дугъу уьл гъипӀнийи, шид гъубхънийи ва хъана дахънийи.

7РАББИЙИН малайик кьюбпи ражну гъафнийи, дугъак куркӀнийи ва гъапнийи:

– Гъудужв ва ипӀин, дархьиш рякъ увуз лапра гизаф гъагъиб хьибди.

8Думу гъудужвнийи, гъипӀнийи ва шид гъубхънийи. Гьадму хураг ипӀбиинди думу ягъчӀвур йигъан ва ягъчӀвур йишван рякъюъди гъушнийи, тап Заанурин дагъ Хуривдихъна#19:8 Заанурин дагъ Хурив: Му дагъдиин (дидиз Синай дагъра кӀуру) Заанури израилин халкьдиз Муса пайгъамбрихьна Къанун тувну. хъуркьайизкьан.

Илʼяс пайгъамбриз Рабби ашкар хьуб

9Душвахь думу хьараъ учӀвнийи ва гьадушваъ йишв адапӀнийи.

Ва магьа дугъаз РАББИЙИН гаф ашкар шулу:

– Уву мушваъ гьапӀрава, Илʼяс?

10Илʼяс пайгъамбри жаваб тувнийи:

– Узу РАББИЙИЗ, Заварин Кьувватарин Аьхюриз, юкӀв убгури гъуллугъ гъапӀунза. Израилари Увухъди вуйи йикьрар чӀур гъапӀну, Яв гъурбан апӀрушвар гъарагъну, хъа Яв пайгъамбрар турихъди йивну гъакӀну. Анжагъ сар узу гъузунза, ва дурари узура йивну йикӀуз чарйир агура.

11РАББИЙИ жаваб тувнийи:

– Гъарах ва дагъдиин РАББИЙИН улихь дийигъ. РАББИ багхьантина гъягъиди!

Ва магьа гъурхулу, кьудратлу микӀру дагълар гъутӀуркӀнийи ва РАББИЙИН улихь гъарзар тикйир гъапӀнийи, амма дидиъ гьеле РАББИ адайи. МикӀран кьяляхъ жилар гъутӀурччвнийи, амма дидиъра гьеле РАББИ адайи. 12Жилар тӀурччвбан кьяляхъ цӀа гъафнийи, дидиъра гьеле РАББИ адайи. ЦӀин кьяляхъ гъюдли фишфишарин сес гъабхьнийи. 13Думу гъеебхьиган, Илʼяс пайгъамбри валжгъихьди маш элебкнийи, гъудужвнийи ва хьаран гурзлиин дийигънийи. Ва дугъахьна сес гъафнийи ва дугъаз гъапнийи:

– Уву мушваъ гьапӀрава, Илʼяс?

14Илʼяс пайгъамбри жаваб тувнийи:

15РАББИЙИ дугъаз гъапнийи:

– Уву гъафи рякъюъди кьяляхъ хъадарк ва Дамаскдиз буш чюлиантина гъарах. Дина гъафиган, Хазаил, ччим кадатну, Арамдин паччагьди деркк. 16Гьацира, ччим кадатну, Нимшийин бай Егьу Израилин паччагьди, хъа Авел-Мехола шагьриан вуйи Шафатдин бай Элиш яв кьяляхъ пайгъамбарди деркк. 17Егьуйи Хазаилин туриккан чӀивиди ккадархьуз гъахьир гьарсар йивну йикӀиди, хъа Элишди Егьуйин туриккан чӀивиди ккадархьуз гъахьир гьарсар йивну йикӀиди. 18Хъа Узу Израилиъ Баалин улихь кьамкьариина ис дархьи ва дугъан бутариз макар дарапӀу ургуд агъзур инсан гъюрхюнза.

Элишдиз пайгъамбрин гъуллугъниина дих апӀуб

19Илʼяс пайгъамбар душвхьан гъушнийи. Ва дугъаз Шафатдин бай Элиш гъидихънийи. Дугъу, йицӀикьюд жут йицар ккитӀну, хутӀил хъапӀрайи, хъа учв йицӀикьюдпи жутнахъди гъягъюрайи. Илʼяс пайгъамбар дугъан багхьантина гъушнийи, ва дугъу чан валжагъ Элишдин илипнийи. 20Думуган Элиш, йицар дирчну, Илʼяс пайгъамбрин кьяляхъди гъажаргънийи.

– Адашдиз ва дадайиз баркаллагь пуз ва мак апӀуз узуз ихтияр тув, – гъапнийи дугъу, – хъасин увухъди гъидиза.

– Гъарах, кьяляхъ гъач. Узу уву дерккрадарза, – жаваб тувнийи Илʼяс пайгъамбри.

21Думуган Элиш кьяляхъ гъушнийи, дугъу жут йицар гъурккнийи. Дурцин гакӀвларин цӀа алапӀнийи, йикк гъубхьнийи ва инсанариз пай гъапӀнийи, ва инсанари думу гъипӀнийи. Дидин кьяляхъ Элиш Илʼяс пайгъамбрихъди гъягъюз рякъюъ учӀвнийи ва дугъан гъараваш гъахьнийи.

Currently Selected:

Паччагьлугъар-3 19: ТабГК

Highlight

Copy