Паччагьлугъар-3 18

Илʼяс пайгъамбар Израилиз кьяляхъ хътаркуб

1Хайлин вахтналан, къурагьвалин шубудпи йисан, Илʼяс пайгъамбрихьна РАББИЙИН гаф гъафнийи:

– Гъарах ва Ахавдин улихь дийигъ, ва Узу жилиина мархь гьапӀидиза.

2Илʼяс пайгъамбар Ахавдин улихь дийигъуз гъушнийи.

Самарияйиъ пис гашʼвал абхънайи. 3Ахавди гъалайиъ буйругъар тувру Авдийиз чахьна дих гъапӀнийи.

(Авдий РАББИЙИЗ гизаф гьюрмат апӀрур ва вафалур вуйи. 4Изавели РАББИЙИН пайгъамбрар терг апӀруган, Авдийи варж пайгъамбар кьюб хьараъ жин гъапӀнийи, гьарсаб хьараъ хьу-хьцӀур, ва дурар ипӀрубдихъдина шутухъди тямин апӀуйи.)

5Ахавди Авдийиз гъапнийи:

– Уьлкейиъ айи вари булагъарихьна ва гъярарихьна гъарах. Белки, ихь гьяйвнариз ва гъятрариз ипӀуз укӀ айишв бихъур ухьуз, ва дурар йивну йихуб алалабхъур ухьʼин.

6Дурари илдицбан бадали уьлке кьюб йишваз пай гъапӀнийи, ва Ахав саб терефназди, хъа Авдий жара терефназди гъушнийи. 7Авдий рякъюъ айиган, дугъаз Илʼяс пайгъамбар алахънийи. Авдийиз думу аьгъю гъахьнийи, ва дугъу жилиина икрам гъапӀнийи ва гъапнийи:

– Уву вува, йиз агъа Илʼяс?

8– Узу вуза, – жаваб тувнийи дугъу. – Гъарах, яв эйсийиз йип: «Илʼяс гьамушваъ а».

9Авдийи гъапнийи:

– Уву яв гъараваш йикӀбан жазайиккна Ахавдин хлиз тувуз, узкан фу гунагь ктубчӀвну? 10РАББИЙИИНДИ, яв Заануриинди, ху апӀурза, Ахавди, йиз агъайи, уву агуз инсанар гьадрау я уьлке, я халкь адар. Вари паччагьлугъариъ ва вари халкьарин арайиъ уву адар гъапнийи. Гьаддиз уву агуз дархьувалин гьякьнаан ху апӀуз гъитуйи. 11Хъа гьамус, гъарах, эйсийиз, «Илʼяс гьамушваъ а» йип, кӀурава. 12Узу увхьан гьудучӀвидиза, хъа РАББИЙИН Рюгьну уву наана гъахуруш, аьгъдарзуз. Узу душну Ахавдиз пидиза, хъа дугъаз уву дихъидар, ва дугъу узу йивну йикӀиди. Хъа узу, яв гъаравашди, живан вахтнахъанмина РАББИЙИЗ гьюрмат апӀураза. 13Изавели РАББИЙИН пайгъамбрар йивну йикӀруган, узу фу гъапӀнуш, увуз, йиз агъайиз, ктибтундайкӀан яраб? Узу РАББИЙИН варж пайгъамбар кьюб хьараъ жин гъапӀнийза, гьарсаб хьараъ хьу-хьцӀурди, ва дурар ипӀрубдихъдина шутухъди тямин апӀуйза. 14Хъа уву гьамус узуз Ахавдихьна, йиз эйсийихьна, гъарах ва «Илʼяс гьамушвахь хьа» йип кӀурава. Дугъу узу йивну йикӀиди аьхир!

15Илʼяс пайгъамбри гъапнийи:

– Узу гъуллугъ апӀурайи РАББИЙИИНДИ, Заварин Кьувватарин Аьхюриинди, ху апӀурза, узу Ахавдихьна гъи мумкинсузди гъягъидиза.

Илʼяс пайгъамбар ва Баалин пайгъамбрар Кармил дагъдиин

16Авдий Ахавдихьна гюрюшдиз гъушнийи ва дугъаз вари кидибтнийи. Думуган Ахав Илʼяс пайгъамбриз гъаншарди удучӀвнийи. 17Илʼяс пайгъамбар гъяркъиган, Ахавди дугъаз гъапнийи:

– Израилиин бала алапӀур уву вува?

18Илʼяс пайгъамбри жаваб тувнийи:

– Израилиин бала алапӀур узу дарза, хъа уву ва яв адашдин тухум ву. Учву РАББИЙИН буйругъар гъитунчва ва Баалин бутарихъди гъушунчва. 19Инсанар гьаъ ва вари Израилин халкь узухьна Кармил дагъдиина уч апӀин. Изавелин суфрайихъ уьл ипӀурайи Баалин юкьудваржна хьуцӀур пайгъамбар ва Ашерайин#18:19 Ашера: Ашера Ханаандин бегьерлуварин бут вуйи. Думу мурхьулси улупуйи. юкьудварж пайгъамбар хъади гъач.

20Ахавди вари израилариз хабар дебккуз гьаънийи ва Кармил дагъдиина пайгъамбрар уч гъапӀнийи. 21Думуган Илʼяс пайгъамбар халкьдихьна удучӀвнийи ва гъапнийи:

– Кьюб кусрийиин деъну гъузуз хъана фукьан чалашмиш хьидичва? Эгер РАББИ Заанур вуш, Дугъахъди гъарахай, хъа эгер Баал Заанур вуш – дугъахъди гъарахай.

Халкьди дугъаз жаваб вуди гафкьан гъапӀундайи. 22Думуган Илʼяс пайгъамбри дурариз гъапнийи:

– РАББИЙИН пайгъамбрарикан гъузнайир сар узу вуза, хъа Баалин пайгъамбрар юкьудваржна хьуцӀур кас ву. 23Гъит, учухьна гъурбан апӀуз кьюб йиц хури. Хъасин гъит дурари чпиз саб йиц кадабгъри, думу тикйир апӀри ва гакӀвлариин илипри, амма гакӀвларик цӀа кидрипри. Узу тмуну йиц гьязур апӀидиза, гакӀлариин илипидиза, амма гакӀвларик цӀа кипидарза. 24Ва думуган ичв заануриз ккарагай, хъа узу РАББИЙИЗ ккарагидиза. Фуну Заанури цӀа кичӀибгбиинди жаваб тувиш, гьадму гьякьикьи Заанур ву.

Ва вари халкьди гъапнийи:

– Уву кӀурайиб ужуб гаф ву.

25Илʼяс пайгъамбри Баалин пайгъамбрариз гъапнийи:

– Кьюб йицкан саб кадабгъай ва, учву мукьан гизаф вуди хьпаз лигну, садпидар вуди думу гьязур апӀинай. Ичв заануриз ккарагай, амма цӀа микичӀибганай.

26Дурари чпихьна туву йиц гъибиснийи ва думу гьязур гъапӀнийи. Дурар Баалин ччвурнахъ гвачӀниантӀан лисуз ккарагнийи.

– Баал, учуз жаваб тув! – чӀигъар апӀуйи дурари.

Амма сес-дикӀ адайи, сарира жаваб тувурдайи. Дурар, чпи гьязур гъапӀу гъурбан апӀрушвхъан хълицури, ергуйи. 27Лисундин вахтна Илʼяс пайгъамбар дурариин аьлхъюз хъюгънийи:

– Ягъалди чӀигъар апӀинай! Думу заанур ву аьхир! Белки, думу фикрарик кахънашул, чӀат душнашул, ясана сефериъ ашул. Хъа, белки, думу даахнашул ва думу хъиргуб лазим вушул.

28Дурари хъана ягъалди чӀигъар апӀуйи ва, чпин аьдат вуйиганси, ифи гъябгъяйизкьан чиб-чпи турари ва жидйири гьадатӀуйи. 29Лисундин вахтра улдубчӀвнийи, хъа дурари хябяхъдин гъурбан апӀру вахтназкьан гьарйир апӀурайи. Амма сес-дикӀ адайи, сарира жаваб тувурдайи. 30Думуган Илʼяс пайгъамбри халкьдиз гъапнийи:

– Йиз багахьна гъачай.

Дурар багахьна гъафнийи, ва дугъу дарабгънайи РАББИЙИН гъурбан апӀрушв рас гъапӀнийи. 31Илʼяс пайгъамбри йицӀикьюб гъван гъадагънийи, Якьубдилан тина гъахьи тухмарин кьадаркьан. Думу Якьубдихьна РАББИЙИН «Яв ччвур Израил хьибди» гаф гъафнийи. 32Думу гъванарикан дугъу РАББИЙИЗ гъурбан апӀрушв дюзмиш гъапӀнийи ва дидин юкьуб тереф кьюб шишал дяхин убшру кьадарнан арх гъеебккнийи. 33Дугъу гакӀвлар албагнийи, йиц паяриз гъубкнийи ва гакӀвлариин дивнийи. 34Хъасин дугъу гъапнийи:

– Юкьуб гвар шту ацӀай ва думу шид вариубгбан гъурбниинра, гакӀвлариинра улубзай.

– Текрар апӀинай, – гъапнийи дугъу.

Ва дурари текрар гъапӀнийи.

– Гьаци шубубпи ражнура апӀинай, – гъапнийи дугъу.

Ва дурари шубубпи ражнура гьаци гъапӀнийи.

35Гъурбан апӀрушвлан шид улдубзурайи ва гьятта архра абцӀнийи. 36Гъурбан апӀру вахт улубкьиган, Илʼяс пайгъамбар дина гъафнийи, ва дугъу гъапнийи:

– РАББИ, Ибрагьимдин, Исакьдин ва Израилин Заанур, Уву Израилиъ Заанур, хъа узу яв гъараваш вуйивал ва гьаму ляхин узу Яв гафниинди апӀувал гъит гъи ашкар ибшри! 37Гьаму халкьдиз Уву, РАББИ, Заанур вуйивал ва Уву дурарин юкӀвар Увухьна илтӀикӀурайивал аьгъю хьпан бадали, узуз жаваб тув, РАББИ, узуз жаваб тув.

38Думуган завʼан РАББИЙИН цӀа абхънийи ва вариубгбан гъурбан, гакӀвлар, гъванар ва руг гъургнийи, архнаъ айи шидра кмиди имдарди гъабхьнийи. 39Гьадму ляхин дябкъну, вари халкь маш исизди жилиин дабхънийи ва чӀигъар гъапӀнийи:

– РАББИ Заанур ву! РАББИ Заанур ву!

40Илʼяс пайгъамбри дурариз амур гъапӀнийи:

– Баалин пайгъамбрар дисай! Лигай гьа, сарра жин хьуз мигъитанай!

Дурари думу пайгъамбрар гъидиснийи, хъа Илʼяс пайгъамбри дурар Кишон гъярихъна гъурхнийи ва вари йивну гъийихнийи.

Къурагьвалин аьхир

41Илʼяс пайгъамбри Ахавдиз гъапнийи:

– Гъарах, ипӀин ва убхъ, гьаз гъапиш магьа тӀурфнин сес.

42Ва Ахав ипӀуз ва убхъуз гъушнийи, хъа Илʼяс пайгъамбар Кармил дагъдин кӀакӀниина улдучӀвнийи. Душвʼин жилиина ис алахънийи ва чан кӀул кьамкьаригъ гъивнийи.

43– Гъарах, гьюлин терефназди лиг, – гъапнийи дугъу гъаравашдиз.

Думу гъушнийи ва гъилигнийи.

– ФукӀа адар, – гъапнийи дугъу.

Илʼяс пайгъамбри гъараваш ургуб ражну гъаънийи. 44Ургубпи ражну гъаравашди гъапнийи:

– Гьюллан хлин гагьтӀан аьхюб дару диф гъитӀибккура.

Илʼяс пайгъамбри гъапнийи:

– Гъарах ва Ахавдиз йип: «Фургъникк гьяйвнар ккитӀ ва уву мархьликк ккадрахъуз гъарах».

45Гьадму вахтна зав дифари кӀару гъапӀнийи, микӀ хъивнийи, гужли тӀурфан ккебгънийи, ва Ахав Изреел шагьриз фургъниъди гъушнийи. 46Хъа Илʼяс пайгъамбриъ РАББИЙИН кьувват убчӀвнийи, ва, валжагъ юкьвнан чӀуликк ккапӀну, Изреелиз ярхи рякъди думу Ахавдин улихьди гъажаргънийи.

Currently Selected:

Паччагьлугъар-3 18: ТабГК

Highlight

Copy