Паччагьлугъар-3 20
20
Бен-Гьадад дявдиз гьязур хьуб
1Арамдин паччагь Бен-Гьададди кьушум уч гъапӀнийи. Дугъахъди сумчӀурна кьюр паччагь, чпин гьяйвнарра, гьяйвнар ккитӀнайи дявдин фургънарра хьади, хъайи. Дугъу, дявдиз удучӀвну, Самария кьялаъ тӀапӀнийи. 2Бен-Гьададди Израилин паччагь Ахавдихьна шагьриз гьамци пуз чан вакилар гьаънийи: 3«Гьамци кӀура Бен-Гьададди: „Яв арс ва гъизил – йиздар ву ва яв хпарикан ва веледарикан ужударсдар – йиздар ву“».
4Израилин паччагьди жаваб тувнийи:
– Уву кӀуруганси ву, йиз агъа паччагь, узу ва узухъ хъайиб вари явдар ву.
5Вакилар хъана Ахав паччагьдихьна гъафнийи ва гъапнийи:
– Гьамци кӀура Бен-Гьададди: «Узу увухьна яв арс ва гъизил, яв хпар ва бицӀидар тӀалаб апӀуз гьаънийза. 6Хъа закур гьаму вахтназди яв гъала ва яв багахь гъуллугъ апӀурайидарин хулар ахтармиш апӀуз гъаравашар гьаъдиза. Дурари чпиз кьабул гъабхьиб вари бисиди ва чпихьди гъабхиди».
7Израилин паччагьди Израилин вари гьюрматлу яшлуйириз дих гъапӀнийи ва дурариз гъапнийи:
– Лигай, гьаму касди писвал абгура! Дугъу йиз хпар ва бицӀидар, йиз арс ва гъизил чаз хуз гьаиган, узу ваъ гъапундарза.
8Вари гьюрматлу яшлуйири ва вари халкьди паччагьдиз гъапнийи:
– Дугъахъ мехъебехъан ва дугъу кӀуруб мапӀан.
9Думуган паччагьди Бен-Гьададдин вакилариз жаваб тувнийи:
– Йиз агъа паччагьдиз йипай: «Уву сабпи ражну яв гъаравашдикан тӀалаб апӀруб узу апӀурза, хъа му тамам апӀуз шулдарзухьан».
Вакилар гъушнийи ва гьаму жаваб Бен-Гьададдихьна гъурубкьнийи. 10Думуган Бен-Гьададди Ахавдиз гьамци пуз гьаънийи:
– Эгер Самарияйикан йиз инсанариз гьарсариз саб карк тувуз рюкъ гьубкӀну гъубзиш, гъит заанудари узуз ижми жаза туври!
11Израилин паччагьди жаваб тувнийи:
– Йипай дугъаз: «Дявдин палат алабхьурайи эскер гъалибвалин кьяляхъ палат илдибтурайирси шад духьну ккундар».
12Бен-Гьадад му гафарихъ, дугъуна паччгьари чпин чадрарикк убхъурайиган, хъпехънийи, ва дугъу чан инсанариз амур гъапӀнийи:
– Дявдиз гьязур йихьай!
Ва дурар шагьриин алархьуз гьязур гъахьнийи.
Арамарин сабпи магълубвал
13Гьадму вахтнан арайиъ Израилин паччагь Ахавдихьна пайгъамбар гъафнийи ва дугъаз хабар дебккнийи:
– Гьамци кӀура РАББИЙИ: «Гьаму зурба кьушум рябкъюравуз? Гъи думу Узу яв хилиз тувидиза, ва увуз Узу РАББИ вуйивал аьгъю хьибдивуз».
14– Хъа шли думу ляхин апӀиди? – гьерхнийи Ахавди.
Пайгъамбри жаваб тувнийи:
– Гьамци кӀура РАББИЙИ: «Вилаятарин регьбрарин жигьил гъаравашари».
– Хъа шли ккебгъиди дяви? – гьерхнийи дугъу.
– Уву, – жаваб тувнийи пайгъамбри.
15Думуган Ахавди вилаятарин регьбрарин жигьил гъаравашариз дих гъапӀнийи, кьюдваржна сумчӀурна кьюр касдиз. Хъасин дугъу имбу вари израилар уч гъапӀнийи – уьмуми гьисабниинди ургуд агъзур кас. 16Дурар дявдиз лисунган, Бен-Гьададди ва дугъахъди йикьрариъ айи сумчӀурна кьюр паччагьди чпин чадрарикк бегьемди дубхънайиган, удучӀвнийи. 17Регьбрарин жигьил гъаравашар улихь гьучӀвнайи.
Бен-Гьададди гюзчйир гьаънайи, ва дурари дугъаз хабар дебккнийи:
– Самарияйиан инсанар удучӀвура.
18Дугъу гъапнийи:
– Дурар ислягьвалиинди дуфнашра, дявдиинди дуфнашра, чӀивиди дисай.
19Вилаятарин регьбрарин жигьил гъаравашар ва дурарин кьяляхъди гъюрайи израилин кьушум шагьриан удучӀвнайи. 20Дурарикан гьарсари чаз къаршуди айир йивну гъакӀнийи, ва арамар гьергнийи, хъа израилар дурарихъ хъергнийи, амма Арамдин паччагь Бен-Гьадад жара атлуйирихъди сатӀиди гьяйвнариинди къутармиш гъахьнийи. 21Израилин паччагь улихь гъушнийи, гьяйвнар ва гьяйвнар ккитӀнайи дявдин фургънар терг гъапӀнийи ва арамариз гъагъи зарарар тувнийи.
Арамарин кьюбпи магълубвал
22Израилин паччагьдихьна пайгъамбар гъафнийи ва дугъаз гъапнийи:
– Яв йишв мюгькам апӀин ва, уву фу дапӀну ккундуш, лиг, гьаз гъапиш гъюру хьадукра Арамдин паччагь хъана увʼин алархьиди.
23Гьадму вахтна Арамдин паччагьдин багахь гъуллугъ апӀурайидари дугъаз насигьятар тувуйи:
– Дурарин Заанур – му дагъларин Заанур ву, гьаддиз дурар ухьухъди кьадарсуз гужлидар ву. Хъа эгер ухьу дурарихъди дюзендиин дяви гъапӀиш, ухьу дурартӀан мумкинсузди гужлидар хьиди. 24Гьамци апӀин: кьушмариъ вари паччгьар чпин йишварилан алдаъ ва дурар жара кьушмин аьхюдарихъди дигиш апӀин. 25Хъана яв талаф гъабхьибсиб кьушум уч апӀин – ухьу Израилихъди дяви апӀбан бадали, гьяйвнин ерина гьяйван, гьяйвнар ккитӀнайи дявдин фургънин ерина гьяйвнар ккитӀнайи дявдин фургъун. Думуган ухьу дурарихъди дюзендиъ дяви апӀидихьа ва дурартӀан мумкинсузди гужлидар хьидихьа.
Паччагь дурарихъди рази гъахьнийи, ва дугъу гьаци гъапӀнийи.
26Хъасин хьадукра Бен-Гьададди арамар уч гъапӀнийи ва Израилихъди дяви апӀуз Афекдихъна гъушнийи. 27Израиларра уч гъапӀиган ва дурариз сурсатар ва дявдин тадарукар тувиган, дурар арамариз гъаншарди удучӀвнийи. Израилар арамарин улихь цӀигьарин кьюб бицӀи лижси бина йивну дийигънайи, хъа арамарин кьушми вари дере абцӀнайи.
28Заанурин инсан Израилин паччагьдихьна гъафнийи ва дугъаз гъапнийи:
– Гьамци кӀура РАББИЙИ: «Арамари кӀураки, РАББИ дагъларин Заанур ву, хъа дюзенарин Заанур дар. Гьаддиз Узу гьадму зурба кьушум яв хилиз тувидиза ва учвуз Узу РАББИ вуйивал аьгъю хьибдичвуз».
29Дурар ургуд йигъан сар сариз къаршуди дийигънийи. Ва ургудпи йигъан дяви ккебгънийи. Израилари сад йигъандин арайиъ арамарин варж агъзур пияда эскрар талаф гъапӀнийи. 30Имбудар Афек шагьризди гьергнийи, душваъ дурарикан къанна ургуд агъзур эскриинди цал алабхънийи. Бен-Гьададра шагьриз гьергнийи ва саб хулаъ жин гъахьнийи.
Ахавди Бен-Гьададдиз рягьим апӀуб
31Бен-Гьададдин багахь гъуллугъ апӀурайидари дугъаз гъапнийи:
– Хъебехъ, учуз Израилин паччгьар рягьимлудар вуйиваликан гъеебхьунчуз. Учуз Израилин паччагьдихьна йирси ва гъячӀяргъю палтарикди ва гардандиъ тӀурнар ади гъягъюз ихтияр тув. Белки, дугъу яв уьмриз рягьим апӀур.
32Ва гъячӀяргъю палтарикди ва гардандиъ тӀурнар ади дурар Израилин паччагьдихьна гъафнийи ва гъапнийи:
– Яв гъараваш Бен-Гьададди кӀура: «Ккун апӀурза, узу чӀивиди гъит».
Паччагьди жаваб тувнийи:
– Думу чӀивиди имийинхъа? Думу йиз чве ву.
33Вакилариз думу гафариъ рягьимлу лишан гъябкънийи ва гьялакди думу гафнан тереф гъибиснийи:
– Ав, Бен-Гьадад яв чве ву! – гъапнийи дурари.
– Гъарахай, думу хъади гъачай, – гъапнийи паччагьди.
Бен-Гьадад чахьна гъафиган, Ахавди думу чан гьяйвнар ккитӀнайи дявдин фургъниъ итнийи.
34– Йиз адашди яв адашдихьан гъидису шагьрар кьяляхъ апӀидиза, – гъапнийи Бен-Гьададди. – Увхьан Дамаскдиъ, йиз адашдихьан Самарияйиъси, базрар арццуз шулвухьан.
Ахавди жаваб тувнийи:
– Дицисдар шартӀариинди узу уву деетурза.
Ахавди дугъахъди йикьрар гъийитӀнийи ва думу деетнийи.
Пайгъамбри Ахавдиз тягьна йивуб
35РАББИЙИН гафниинди сар пайгъамбри чан дустраз гъапнийи:
– Ккун апӀурза, узуз йив.
Хъа думу рази гъахьундайи.
36Думуган пайгъамбри гъапнийи:
– Уву РАББИЙИХЪ хъпехъундарва, гьаддиз уву, узхьан гъушубси, асланди йикӀиди.
Ва думу кас пайгъамбрихьан гъушубси, дугъаз гъаншарди аслан ккутӀубччвнийи ва думу гъячӀяргънийи. 37Пайгъамбри жара инсан гъагнийи ва гъапнийи:
– Ккун апӀурза, узуз йив.
Дугъу пайгъамбриз гъивнийи ва зийнар гъапӀнийи. 38Думуган пайгъамбар гъушнийи ва рякъюхъ, паччагьдиз ккилигури, дийигънийи. Дугъу кӀулʼин илипруб чан улариъ ипнайи. 39Паччагь багхьантина гъягъруган, дугъу паччагьдиз чӀигъар гъапӀнийи:
– Узу, яв гъараваш, дявдин яцӀаъ гъахьнийи, ва узухьна йисир хъади эскер гъафнийи ва гъапнийи: «Гьаму гъаравликк гъит. Эгер думу гъудургиш, дугъан уьмрихъанди яв уьмур дивдива, ясана талант#20:39 Талант: тахминан 34 килограмм. арснан тувдива». 40Хъа узу гагь мушвахь, гагь тушвахь машгъулди имиди, йисир гьергнийи.
– Гьациб хьибди увуз жаза, – гъапнийи Израилин паччагьди, – Уву думу яв мелзналан гъапунва.
41Думуган пайгъамбри уларилан кӀулʼин илипруб чкиди уьлчӀюбгънийи, ва Израилин паччагьдиз думу пайгъамбрарикан сар вуйивал аьгъю гъабхьнийи. 42Пайгъамбри паччагьдиз гъапнийи:
– Гьамци кӀура РАББИЙИ: «Узу нянайикк ккаънайи инсан деетунва. Гьаддиз дугъан уьмрихъанди яв уьмур дивдива, хъа дугъан халкьдихъанди – яв халкь».
43Хъял кубчӀвну ва маш чӀур дапӀну, Израилин паччагь Самарияйин гъалайиз кьяляхъ хътаркнийи.
Currently Selected:
Паччагьлугъар-3 20: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
