Itiruye 34

Icwe ti Apu-Ifaen

(Itishem Icwe 10:1-5)

1Yaweh ri te Musa baa, “Kwén afxae atxom ifaen pangma ti kucang ti afu pu byinn mbub né, ame ama u bae meme ira ti ame bae kucang si atang. 2Nwunn ti kiskinn fifae ti tso ka tu m yi utáen rikwèn Sinai. 3Unde iki ā putsa-wu afu, ko ā kyang fer ubaen rikwen wu be. Ande ā pu asinn ka kub-ba irum atang be.” 4Ama Musa kwen afxae atxom ifaen yi pangma ti kucang. Awu pu yi nwunn ti kiskinn u tso utaen rikwen Sinai pangma ti Yaweh ri te wu.

5Ama Yaweh si ba uwae kutakujwujwu ba tsi te Musa atang, u kunn tso rinyi-wu Yaweh ti Musa. 6Yaweh yafe wu, u kunn tso baa, “Ame ti si Yaweh, Rimam na ayibrisi ti rinyangwae, ti ku tso-m rinae ti kufe be. Ame si Rimam ti site ure ti tsi kukunn, u si Rimam ti kubenti. 7Ame site ure ti tsi kukunn risu kumbub ande yang-ba, ama ku yata na ba riraen-ba, ti risu ti kpag-ba, ti ikentitibi-ba ti tsitsi meme. Amaa, ande ti a raen ira, ame ku saeru-m ikentitibi-ba be. Ame ku pwen ba ti anyisu-ba rikwen ka sang ti utso ti ita te ti inje.”

8Ama ti ritsen, Musa si ku riben u fen Rimam. 9Awu jwam itijwam baa, “Asiti ame a tu kutxuwe ti tinyang uwog-fu Itsekuru, ame ku jwam fu Itsekuru, te ti ru tetso, ko ti ati si ande ti ku kpag risu ku fxen-ti ira be. Yata na ti riraen-ti ti ikentitibi-ti, ama paembe ti ti ati u si ande-fu.”

10Yaweh ri baa, “Nung! Ame ku yer unju ayib meme ande-fu. Ame u nde iken ti ku fur ayib ti a nde ji-ba ayi uwae uten iki ko utense khika be. Patag ande ti ani naesi kutampwa-ba u sae wande-m, ikyaen ti, ayi u si iken ti ku kyen ikyenricwu ikyaen-ni. 11Ye su icwe ti ame sa ku na ni yaka ne. Fxen, ame u rwae ruye ande ti Amor ti Kanana ti Hiti ti Perizi ti Hivi ti ande ti Jebusi. 12Ni nung nyinyang, ti ni sang-ni unju ti yer te ande ti uten wu ti ani ku ru yi atang ne be. Ikyaen ti, ayi u ba si kutxae uwog-ni. 13Ni byinn mbub kuta apxin-ba, ti apxin ti a mbye tsi uwog ti ku cwucwe-ba. Ni yer ituku Ashera-ba ti ku cwucwe si.

14“Ni fen-ni apxin iki be, ikyaen ti, rinyi-m si Yaweh Rimam ti site kitsinn. 15Ikyaen yine, ni sī-ni unju te ande ba ti riben atang be, be kiye ti aba a ku fen apxin-ba, u ku wen ibye na yi, aba u yae ni kaa ci iken apxin-ba yi ama. 16Ama asiti ani a pu anyisu-ba ti anda baen anyisu-ni ti arom, aba a ku nde apxin-ba, a u shir anyisu-ni ti arom putsa apxin-ba yi ama.

17“Yag-fu iken iki ti fu pu mbye apxin atang be.

18“Ni nde Ukwab Buredi ti Yisiti si-yi atang be ko kusang titini. Uwae usir itsongfaen, ni ci buredi ti si-yi te yisiti be, pangma ti ame ri te ni. Ani u ci ukwab wune uwae ishaen Abib, ikyaen imi uwae ishaen Abib ti ani nwunn uwae uten Ejib.

19“Meme umbae ti a tawe mbae si ana-m. Patag imbae asinn-ni titawe tishir, ko indag ko iwen, si ana-m. 20Ani u nyaembe imbae ikyinnsu ti tawe-ni, ti imbae iwentam. Asiti ani a u nyaembe tu-ni ayi be, ni byinn mber ukwae-yi. Meme anyisu-ni ti arom ti tawe ti a mbae na ni, ni nyaembe ba. Unde iki ā ba-wu uwe-m te ajwo ukaen be.

21“Uwae usir itsongnjo, ani u nde wande, ama usir ti itsongfaen si usir ti ani u nde-ni wande atang be, ko kiye ritom ti kiye itibunn wuci meme.

22“Ni nde Ukwab Isen Wuci ti ani bunn titawe, ti Ukwab Wuci ti ani bunn ricwunnkyi uwae kusang.

23“Atsepu ita uwae kusang, meme anyisu-ni ti arom u ba kang uwe Yaweh, Rimam na Isirela. 24Ame u rwae ruye ambukwen ande uwe-ni, u nda uten-ni ko ku fufa. Unde iki u kwab-wu ti wu fxaembe riben-ni kiye ti ani a ku ru yi uwog Yaweh, Rimam-ni, atsepu ita uwae kusang be.

25“Ni twen-ni iken ti twen na m ti wuci ti yisiti si atang be. Ibye ti a yer wen na Rimam yi Ukwab Itiyafe ā tsi fam-yi ucwe be. 26Ni pu isen wuci-ni uwae risaen ufang ba kusog Yaweh, Rimam-ni.

“Afu a yerwen imbae iwenten, to-fu ibye wu te akang abyaen iya-wu be.”

27Ama Yaweh ri te Musa baa, “Bae ira yine. Ayi si risu ira yine ti ame u yer unju te fu ti Isirela.” 28Musa nde usir mae ifaen ti utitang mae ifaen uwog Yaweh. Awu ci-wu be u ngwa-wu be, ama u bae meme ira unju ti yer wune ti si icwe rijwe, si yi afxae atxom ifaen yi.

29Ti Musa sī utaen rikwen Sinai ba ti afxae atxom unju ti yer ifaen yine, uwe-wu ku jijaen ikyaen ira ti awu ku ri te Yaweh, awu nung-wu be. 30Ti Aruna ti meme anyisu Isirela sae kutxuwe Musa ku jijaen, ikyenricwu ye ba ti aba u ko fer wu. 31Amaa, Musa kunn ba ira, ama Aruna ti ande ndufu meme ru ba tu wu. Ama Musa tsag ira te ba. 32Isim ayine, meme Isirela ko ba fer Musa, ama awu nda ba patag icwe ti Yaweh nda wu utaen rikwen Sinai. 33Ama isim ti Musa ri tag pu wu ira te ba, awu pu kutupwa burkyi kutxuwe-wu. 34Amaa, ko kiye titini ti Musa a ku ru yi uwog Yaweh ti awu kaa ri ira te wu, awu ku funn pu kutupwa wu ru, se kiye ti awu a ruye pu wu. Kiye ti awu a ruye pu wu, awu ku ri te anyisu Isirela patag ira ti a ri te wu ti wu na ri, 35ama aba ku nung kutxuwe-wu ku jijaen. Ama Musa ku pu kutupwa kukyi uwe-wu, se kiye ti awu a ku ru ti wu kaa ri ira te Yaweh.

Currently Selected:

Itiruye 34: kubNT

Highlight

Copy

Compare