Itiruye 35
35
Icwe Usir Ikyinn
1Musa kunn funn patag anyisu Isirela u ri te ba baa, “Ira ti Yaweh nda unju ti ni na nde ta re: 2Uwae usir itsongnjo ni nde wande, amaa, usir ti itsong ifaen si usir ti saen kyag na Yaweh. Ni nde-ni wande uwae usir wu be. Unde ti a nde wande atang, ni wen wu. 3Uwae usir wu, unde iki ā jwu urwa cwe-wu kununn-wu be.”
Rinyangwae Kufug Uwog ti Som Yaweh
(Itiruye 25:1-9)
4Musa ri te meme anyisu Isirela baa, “Ira ti Yaweh nda unju baa ani na nde ta re: 5Ni pu rinyangwae ba na Yaweh. Ko aye ti a site utob ana rinda ti nda, awu ā pu rinyangwae zinariya ti azurfa ti bronzi, 6ti itub ti rikàen-yi ru irum titisub, ti itub ti ru itibyaen, ti itibyaen, ti itub lilin, ti asing iwenten, 7ti apwa iwentam ti a fufwá, ti apwa ibye iki ti tutub, ti ituku akasiya, 8ti kindob ti a sa si fitila ti umung iken ti ku nung kuyang ti a sa naafa kindob itiyerkob ti ayi ti a ku twen iken ti ku nung kuyang atang te yi, 9ti atxom onis ti atxom ti tinyang ti tinyang ti a pu bae fa efod ti jifu efod ti kukog.
Isu Wande Uwog ti Som Yaweh
(Itiruye 39:32-43)
10“Meme ande ti site itsab iken ti ti nde tu ajwo uwae-ni ā ba nde meme wande ti Yaweh nda unju risu-yi. 11A u kyae uwog ti som Yaweh, kufug-wu ti iken ti a u pu burkyi kufug wu, ti iken ti ukwab-wu, ti ituku-yi ti a baen ren tso baen ren tso, ti uwong-yi, ti kufwá-yi, ti iken ti a pu afxen afwá-yi tsi si atang, 12ti akpati unju ti yer ti ikum ti a su wu te yi, ti kubur wu ti si uwog ayibrisi Rimam, ti kutupwa ti a pu takyi wu, 13ti tebur ti ikum-wu, ti meme isu-yi, ti buredi ti ku cwucwe ti ta kunn uwe Yaweh, 14ti iken ti a pu fitila tsitsa atang, ti isu-yi, ti kindob fitila wu, 15ti kuta ti a ku twen iken ti ku nung kuyang, ti ikum ti a u su wu te yi, ti kindob itiyerkob ti iken ti twen ti ku nung kuyang, ti kutupwa ti a pu sikyi ufu ti ku sang yi kufug Yaweh wu, 16ti kuta rinyangwae na ibye ti twen, ti iken ti kuu riye kuu riye na bronzi ti ikum-yi, ti meme isu-yi, ti kusan tiyang ti uwog ti tsi-wu, 17ti atupwa ti a pu fae pakob utab wu, ti atupwa ti a pu kyensi uwe utab wu ti afwá-wu, ti iken ti a pu afxen afwá yi tsisi atang, ti kutupwa ti a pu kyensi ufu utab-wu, 18ti usúm ana kufug Yaweh wu, ti usúm afwá ti fae pakob utab wu, ti iji-yi, 19ti atupwa ti a ndxob yi ti a nde wande te yi yi uwog ti sisaen, ti atupwa ti ku cwucwe ti Aruna ti anyisu-wu ā ku si kiye ti a ku nde wande kukwen.”
Anyisu Isirela Pu Rinyangwae Ba Na Yaweh
20Ama meme anyisu Isirela nwunn uwe Musa, u kafe ru. 21Unde titini ti ira yi sùb wu utob u kunn nwunn kusung-wu, pu rinyangwae ba na Yaweh, ikyaen wande na uwog ti som Yaweh, ti isu ti a u nde wande te yi atang, ti atupwa ti ku cwucwe. 22Ikyaen yine, meme arom ti anda ti site utob na rinda ti nda, pu iken kindab ti iken atóng ti itsi kujwo ti asuwa ti ukwae, ti itso iken zinariya ti txitxi ba. Unde titini pu rinyangwae zinariya ti tinyang ba na Yaweh. 23Unde titini ti site itub ti rikaen ti kang cwurr, ko itub ti ru tibyaen, ko itub tibyaen, ko atupwa lilin, ko asing iwenten ko apwa iwentam ti apwa ibye iki ti tutub, a pu yi ba. 24Unde titini ti ndetu ti wu u nda rinyangwae na azurfa ko bronzi, pu yi ba na Yaweh. Ama unde titini ti site ituku akasiya ti awu nung ti a na u ndetu wande te yi, pu ba ikyaen wande yi. 25Ama meme anda ti site itsab iken ti ndxob ajwo pu atupwa-ba ba. Ayi si atupwa ti a ndxob yi te itub ti rikàen-yi ru irum titisub, ti itub ti ru itibyaen, ti itub tibyaen, ti itub lilin. 26Meme anda ti ira yi sub ba utob, nwunn u nde wande ti ajwo-ba u txom asing iwenten. 27Ande ti uwe ba pu atxom onis ti atxom ti tinyang ti tinyang ikyaen ti a pu kob bae fa efod ti jifu efod ti kukog na kukwen. 28Aba ru ba te umung iken ti ku nung kuyang, ti kindob ti a sa si fitila, ti kindob itiyerkob, ti iken ti twen ti ku nung kuyang. 29Meme anyisu Isirela, arom ti anda ti utob-ba sub, pu rinyangwae ba ti utob-ba ikyaen wande yi ti Yaweh ri te Musa baa, a na nde.
30Ama Musa ri te anyisu Isirela baa, “Nung, Yaweh tsab pu wu Bezalel umbae Uri, ti si umbae Hur uwae rishi na Yawuda. 31Yaweh kumunn pu wu awu ti kusung Rimam, ti itindetu ti ben-ayib, ti itinungye ana meme iken ti ti nde tu ajwo, 32ikyaen ti awu u pu zinariya ti azurfa ti bronzi kyag iken ti tsotso ti tsotso te yi, 33ti awu u kwén atxom, u pab ituku. Awu site itsab meme wande iken ajwo ti tsotso. 34Yaweh ama nda pu wu Bezalel fa ti Oholiyab umbae Ahisamaki, uwae rishi na Dan ti a na kwén na ariki uwae-ba kujwo wande. 35Yaweh nda pu wu aba itsab wande itindetu iken ti tsotso ti tsotso, ana unde ti ku kyag iken, ana unde ti ku wae kusung iken, ana unde ti ku ndxob iken ti itub ti rikàen-yi ru irum titisub, ti itub ti ru itibyaen, ti itub tibyaen ti itub lilin. Aba site itindetu meme wande ajwo ti tsotso ti tsotso.
Currently Selected:
Itiruye 35: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
