Itiruye 33
33
Yaweh Ri te Isirela ti A na Nwunn Sinai
1Yaweh ri te Musa baa, “Afu ti ande ba ti afu pu ruye uten Ejib, ni nwunn ti ni ya uwog wune ta, ti ni ru yi uten ti ame yer unju te Ibrahim ti Ishaku ti Yakubu baa, ame na u sa wu na utso-ba. 2Ame u tom atom-m ti wu tae ni ru, u rwae shag ande ti Kanana ti Amor ti Hiti ti Perizi ti Hivi ti ande ti Jebusi. 3Ru-fu yi riben ti ku pang furr ti akang ibyaen ti kindob iwog. Amaa, ame u te ni ru-m tetso be, be ame u twenji ni fengo, ikyaen ti, ani si ande ti kpag risu ku fxen-ni ira be.”
4Kiye ti ande ba fxen baa, Yaweh na u ru-wu te ba be, aba byir utob ama u pu iken indab tso-ba ijwe-ba be. 5Ikyaen ti, Yaweh ri te pu wu Musa baa, “Ri te anyisu Isirela baa, ‘Ani si ande ti kpag risu ku fxen-ni ira be. Asiti ame a te ni ru, uwae kiye pang ame u twenji ni. Tine, ni nwaen iken kindab-ni yi ti m nung iken ti ame u nde te ni.’ ” 6Bag ti kiye wu yi imbyi rikwen Horeb atang, anyisu Isirela pu iken kindab tso-ba ijwe-ba cwucwo be.
Kufug Uwog ti Som Yaweh
7Uwae kiye wu, Musa ku sub kob kufug iki ti awu ku kunn wu baa, kufug uwog ti som Yaweh, ka sim kob iyen, rwen ri ra ti uwog ti anyisu Isirela ku sim afug-ba atang. Ama unde titini ti a ku sha ti wu kaa tong unju uwog Yaweh, awu u ru yi atang. 8Ko kiye titini ti Musa a ku ru yi kufug itifen Rimam atang, meme anyisu Isirela u nwunn ritsen. Unde titini u tsi ufu kufug-wu, ku sae Musa se ti awu a ka sang pu wu uwae kufug itifen Yaweh atang. 9Kiye ti Musa a ka sang pu wu uwae kufug itifen atang, kutakujwujwu u si ba kukyi ufu kufug wu, ama Yaweh u ri ira te Musa. 10Ti ti ande ba a nung kutakujwujwu a si ba kukyi ufu kufug wu, meme-ba u ku riben u fen itifen ufu afug-ba. 11Yi uwae kufug wu, Yaweh u ri ira te Musa uwe ti uwe pangma ti unde ku tsag akaen te arwan-wu. Kiye ti Musa a kafe ka pu wu uwog ti anyisu Isirela nae atang, Jeshuwa umbae Nun, umbae utaen ti ku ndeya Musa, ku som kunn ti uwae kufug itifen Yaweh atang.
12Musa ri te Yaweh baa, “Afu ti ku ri te kob m baa, ame na tae ande bane, amaa, afu tatso-fu ame unde ti u ndeya m be. Afu tsikunn ku ri baa, afu na nung pu fu ame ti rinyi, ame na tu pu m kutxuwe ti tinyang uwe-fu. 13Ikyaen yine, ame ku jwam fu, asiti ame a tu kutxuwe ti tinyang uwe-fu, tatso m fengo-fu ti m nung fu nyinyang, ama u tsikunn ti ku tu kutxuwe ti tinyang uwe-fu. Tangsom ama baa, kumbukwen ande bane na si ande-fu.”
14Ama Yaweh cwe, u ri baa, “Ame ti risu-m, u te fu ru, u nda fu utob ti nae riben.”
15Ama Musa ri baa, “Asiti afu a u ru-fu te m be, nda-fu ti ati u nwunn ike be. 16Ande u nung ti imi ti ame ti ande-fu bane na tu kutxuwe ti tinyang uwe-fu? Iti som-fu kutampwa-ti ku tatso baa, ame na ti ande-fu na txi ra te ande ti tsitsi uwae utense.”
17Ama Yaweh ri te Musa baa, “Ame u nde na fu iken ti afu jwam, ikyaen ti, afu tu kutxuwe ti tinyang uwe-m. Ame nung fu ti rinyi.” 18Musa ri baa, “Ame ku jwam fu, tso m riyinn-fu!” 19Ama Yaweh ri baa, “Ame u nyatsa uwe-fu, afu u sae ti tinyang-m. Ame u kunn rinyi-m Yaweh te fu ti afu u fxen, ikyaen ti, ame u tatso kutxuwe ti tinyang-m ba uwog unde ti ame tsab tsitsi, u tso ayib risi-m ba uwog unde ti ame tsab tsitsi. 20Amaa, afu u nung-fu kutxuwe-m be, ikyaen ti, unde ti a sae m, awu u cwucwu.” 21Yaweh ri kyi baa, “Nung! Tsitsa kutxú ti ta fer m ne. 22Ama kiye ti riyinn-m a yafe ku ru, ame u sa fu tam uwae fifae kutxú, u sa kujwo-m burkyi fu, se ti ame a nyatsa pu m. 23Ama ame u ye ra kujwo-m, afu u sae isim-m, amaa afu u sae-fu uwe-m be.”
Currently Selected:
Itiruye 33: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
