Itiruye 17

Ambyi Ruye Kutxú

(Apwende 20:1-13)

1Meme ande Isirela nwunn kutur na Sin, u kyang ti kucwug kucwug pangma ti Yaweh ri te ba. Aba ba sang Refidim u sim afug ama nae atang, amaa a tu-ba ambyi atang ti a u ngwa be. 2Aba pu ira kunn tu Musa ti wu na nda ba ambyi ti a na u ngwa. Musa rang ba baa, “Ani nde rimang u pu ira kunn tu-ni ame? Ani nde rimang ku myae Yaweh kumyae?” 3Amaa ande ba ku fxen ti unwáen timambe. Aba ku pwen unju risu Musa ama rang wu baa, “Imi ti nde nee afu pu ti, ti anyisu-ti, ti iken ti shi-ti meme ruye uwae Ejib ba cwu ku ji ti unwáen ambyi ike?”

4Musa jwub ira tu Yaweh baa, “Ame u nde ande bane rimang? Aba ku sha ti a u jwunn m kutxom.”

5Ama Yaweh ri te Musa baa, “Pu ariki uwae ande ndufu na Isirela fa ijwe-fu ti ni ru uwe-ba, ti fu sa ukum wu ti afu byinn ambyi ti Nel atang né ye su ru te wu. 6Ame u tsi uwe-ni fer ti kutxú ana rikwen ti Horeb. Ama afu u sa ukum byinn kutxú wu. Ambyi u ten ruye atang ti ande ba ā ngwa.” Musa nde ti mbwe-yi uwe ande ndufu Isirela ba.

7Musa kunn rinyi uwog wu baa, “Massa,” ti imbyi-wu si, Kumyae. Rinyi ti ifaen si “Meriba,” ti imbyi-wu ama si unju ti pwen. Ikyaen imi, anyisu Isirela pwen unju, u myae Yaweh kumyae, ku ri baa, “Yaweh ta se kutampwa-ti njwaa?”

Ande ti Amaleki Pu Rika Kunn Anyisu Isirela

8Tiri ande ti Amaleki pu rika kunn anyisu Isirela yi Refidim. 9Ama Musa ri te Jeshuwa baa, “Tsab arom arom uwae-ti ti a ka ta rika ti ande ti Amaleki. Ucwe, ame u tsitsa risu rikwèn, u ye su ukum na Rimam kujwo-m.” 10Tiri Jeshuwa nde pangma ti Musa ri te wu, ama u ka ta rika ti ande ti Amaleki. Musa ti Aruna ti Hur ama tso ka tsitsa risu rikwen. 11Kiye ti Musa a sa kujwo-wu tso ritsen, anyisu Isirela ku ci rika. Amaa, kiye ti kujwo-wu a nam ku si, ande ti Amaleki ku ci rika. 12Ama, kiye ti kujwo Musa womshang, aba ye kutxom ta ti wu na somtsa atang. Aruna ti Hur tatub kujwo Musa tso ritsen pu usir sunn. 13Ikyaen yine, Jeshuwa ti ande-wu ci akyirten na Amaleki rika ti kisum wen.

Musa Mbye Kuta u Kunn Rinyi Yaweh

14Ama Yaweh ri te Musa baa, “Bae kuci rika yine si kutsingken na ititangsom, ama pwen yi si Jeshuwa kutong, ikyaen ti ame u twenji utso ande ti Amaleki, ama unde iki u tangsom-wu te ba uwae utense ike be.” 15Ama Musa mbye kuta na Yaweh, u kunn wu baa, Yaweh Nisi,#17:15 Imbyi Yaweh Nisi baa, Rimam nda m ci rika. 16ama ku ri baa, “Ni sa tuta na Yaweh tso ritsen#17:16 Ande iki ti ku myae ira unju Mbaibrane uwog ne ku ri baa, imbyi ira yi si: a kúnn kutxomkwe Yaweh ti rika.! Yaweh u tsikunn ti ku ta Amaleki ti anyisu ti ku ba isim-ba rika ru fife yi uwe.”

Currently Selected:

Itiruye 17: kubNT

Highlight

Copy

Compare