Itiruye 16
16
Yaweh Tom na Ba Mánna ti Upwēn
1Meme kumbub anyisu Isirela nwunn Elim ru ka sang kutur na Sin, ti ta kutampwa Elim ti Sinai usir ti rijwe asu itsong na ishaen ti ifaen, isim ti aba ruye uten Ejib. 2Uwae kutur atang, meme anyisu Isirela pwen unju risu Musa ti Aruna baa, 3“Ayi nyangskeb ti Yaweh ú wen-wu ati ti uten Ejib. Atang, ati som pakob atutong ibye, ku ci wuci ku kyaen. Amaa, ani pu ti ruye ti meme-ti na ba cwu rimenn uwae kutur ike.”
4Ama Yaweh ri te Musa baa, “Nung, Ame u yaen buredi si ba na ni pangma upwen ti ku tswa, ti unde titini u ruye kaa byir pang ti awu u ci usir wu. Fengo wune, ame u nung ko aba u putsa icwe-m ko aba u putsa-ba be. 5Ama uwae usir ti itsongnjo, kiye ti aba a kaa byir wuci yi, aba ā byir ana usir ifaen.”
6Tiri Musa ti Aruna ri te meme anyisu Isirela baa, “Ureb ne, ani u nung baa, ayi na si Yaweh ti na pu ni ruye uwae uten Ejib. 7Yi kiskinn, ani u nung riyinn na Yaweh ikyaen ti, awu fxen pu wu unju ti ani ku pwen risu-wu awu Yaweh. Ati si aye ti ani ku pwen unju risu-ti?” 8Musa ri kyi baa, “Ureb ne, Yaweh u nda ni ibye ti ani u kub. Ama a ba kiskinn, awu u nda ni buredi ti ani u ci u kyaen. Ikyaen ti, Yaweh fxen pu wu unju ti ani ku pwen risu-wu. Ati si aye? Unju ti pwen-ni ayi si-yi risu-ti be, amaa, ani ku pwen yi risu Yaweh.”
9Musa ri te Aruna baa, “Ri te meme kumbub anyisu Isirela ti a ko ba fer Yaweh, ikyaen ti, awu fxen pu wu unju ti pwen-ba.” 10Ti Aruna ku ri ira yine te anyisu Isirela ba, aba sae ayib ru yi kutur u nung riyinn Yaweh ti tatso paenine uwae kubyi. 11Tiri Yaweh ri te Musa baa, 12“Ame fxen pu m unju ti pwen na anyisu Isirela. Ri te ba baa, ‘Ureb, ani u kub ibye. Kiskinn ama, ani u tu buredi ti ani u ci. Ani u nung baa, ame na si Yaweh, Rimam-ni.’ ”
13Ureb usir wu, Upwēn tum ba munnkyi uwog ti anyisu Isirela sim afug-ba atang. Ama kiskinn, kumbug sur pakob uwog ti aba nae atang. 14Ti kumbug yi tan tag, iken iki kurkyi kurkyi ba shag kyife riben uwae kutur atang meme. 15Kiye ti anyisu Isirela sae iken yine, aba rang atso baa, “Iken yine si imi?” Ikyaen ti a nungji-ba yi usir iki be. Ama Musa ri te ba baa, “Ayi si wuci ti Yaweh pu na ni ti ni na ci. 16Ayine si iken yi ti Yaweh ri baa, ‘Unde titini ā pu munn kitu kumyae kinjo pang ti awu ti ishikununn-wu u ci.’ ”
17Ama anyisu Isirela nde ti mbwe-yi. Ariki pu yang-yi, ariki ama pu pang. 18Ti aba ka myae yi ti kitu kumyae, unde ti pu yang-yi, ayi ko sha-wu sha be. Unde ti pu pang ama sha num-wu be. Ko aye pu pang unju itici-wu. 19Musa ri te ba baa, “Ni ci tsitsi-ni iki kiskinn be.” 20Amaa, ariki uwae-ba fxen-ba ira ti Musa ri be. Aba ci u ya iki ta kiskinn. Ba ye kiskinn, ifwer pu pu yi atang, ama ku nung akong. Musa ndembeb utob te ba. 21A ku pu kob wuci yi kiskinn kiskinn. Kiye ti usir a byag mbeb, ayi ti tsitsi riben ku yag susur.
22Yi usir ti itsongnjo, a ku pu wuci yi kitu kumyae ifaen ti a u ci ba kwer ti usir ti itsongfaen. Ama kiye ti ande ti uwe kumbub kumbub na Isirela ba ri te Musa ira risu-yi, 23awu ri te ba baa, “Icwe ti Yaweh sa tsi ta re. ‘Ucwe si usir ti ku cwucwe na unyang ti pu, usir ti saen kyag ana Yaweh. Ikyaen yine, ni fxab iken ti ani u fxab, ti ni to iken ti ani u to tí yaka ne. Meme iken ti ani a ci tsitsi, ni sa tsika ucwe.’ ” 24Pangma ti Musa ri, aba sa yi tsi fam ucwe, ayi rwambub-yi be, u pu-yi ifwer be. 25Musa ri te ba baa, “Ni ci yi yaka ne, ikyaen ti yaka si usir kyinn na Yaweh, ani u tu-ni iken iki utabmae be. 26Usir itsongnjo, ani u byir wuci yi, amaa yi usir ti itsongfaen ti si usir unyang ti pu, ani u tu-ni iken iki utabmae be.”
27Amaa uwae usir ti itsongfaen, ariki ru yi utabmae ti a kaa sha wuci, a tu-ba yi be. 28Yaweh rang Musa baa, “Ayi u ba kwer isinn titawe ani u ba nae risu riben na kusen-m ti icwe ti ira ti kwen-m? 29Sae! Ame Yaweh nda pu m ani usir unyang ti pu. Nee iken ti nde uwae usir ti itsongnjo, ame nda ni wuci usir ifaen, ikyaen ti ko aye ā som ti uwog-wu, u ruye-wu ise uwae usir ti fa ti itsongfaen be.” 30Ikyaen yine ande ba pu unyang usir ti itsongfaen.
31Anyisu Isirela kunn rinyi wuci yine baa, Mánna. Ayi si ititsen pangma ayaen sukung, ama u nyang unju ti ci pangma umunsa ti a tsinn yi te kindob iwog. 32Musa ri baa, “Yaweh nda ti unju baa, ‘Ni myae Mánna kitu kumyae kinjo kyaetsi ikyaen anyisu ti ku ba isim, ti aba ā nung itso wuci ti ame pu na ni uwae kutur, kiye ti ame pu ni ruye uwae uten Ejib.’ ” 33Ama Musa ri te Aruna baa, “Sa kukwer ti fu myae Mánna kitu kumyae kinjo si atang, ti fu sa tsi uwe Yaweh, ikyaen anyisu ti ku ba isim, ti aba ā ba sae.” 34Pangma ti Yaweh ri te Musa, Aruna sa Mánna yi si uwae kukwer tsika ikyaen ititangsom. 35Ama anyisu Isirela ci Mánna ka asang mae ifaen, se kiye ti aba ka sang ice riben Kanana, ama sang ka nae atang. 36(Iken ti a ku myae Mánna atang kiye wu si omer, ti si kinjo uwae iken rijwe ana efah.)
Currently Selected:
Itiruye 16: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
