Itiruye 18
18
Jetro Ba Nung Musa
1Jetro,#18:1 Rinyi Jetro iki si Rewel, sae Itiruye 2:11-25. kukwen na Midiyan ti si uyeb Musa, fxen iten iken ti Yaweh nde na Musa ti ande-wu Isirela, ti awu pu ruye ba uwae uten Ejib.
2Ti uwe-yi, Musa ri te pu wu uwa-wu Zipora ti wu na ka som te uyeb-wu Jetro, ama Jetro paembe wu, 3awu ti anyisu-wu meme ifaen-ba. Rinyi ti tawe si Gershom. Kiye ti a mbae wu, Musa ri baa, “Ame si rikyen yi uten ti si-yi ana-m be.” 4Rinyi umbae ti ifaen si Eliyezer, ikyaen ti, Musa ri baa, “Rimam na itse-m, si itindeya-m, awu ti nwangru-m kujwo kisum wen Ukwe ti Ejib.”
5Jetro, uyeb Musa pu uwa Musa ti anyisu-wu ba ku tu Musa yi uwae kutur, uwog ti awu sim afug-wu atang fer ti rikwen Yaweh. 6Awu tsa kutsa ka ri te Musa baa, “Ame uyeb-fu Jetro, ti uwa-fu ti anyisu-fu ti arom ifaen, ku ba uwog-fu.”
7Tiri Musa ruye, u ka tu uyeb-wu. Awu ku riben u nda uyeb-wu rurob, ama u sunwunn u ye wu bur utob. Aba kunnji atso ira, u rang kujimshwur atso, ama u pu atso sang yi uwae kufug. 8Tiri Musa tsag te uyeb-wu meme iken ti Yaweh nde te Ukwe ti ande ti Ejib ikyaen anyisu Isirela, ti meme rikaen ti tu ba yi fengo, ti fengo ti Yaweh nwangru ba.
9Ama uwae Jetro nyang, awu pam ipam ikyaen iken ti tinyang ti Yaweh nde, ti awu nwangru Isirela kujwo ande ti Ejib. 10Jetro ri baa, “Ti teb Yaweh ikyaen ti, awu nwangru ni kujwo ande ti Ejib ti Ukwe ti Ejib. 11Tine, ame nung baa, Yaweh na skeb tag pu wu meme apxin, ikyaen ti, awu nwangru ande-wu, Isirela yi kujwo ande ti Ejib ti nde ba bebebeb.” 12Ama Jetro, uyeb Musa, twen ikentitwen, u pu rinyangwae na Rimam. Ama Aruna ti meme ande ndufu Isirela ba ti a u ci wuci te Jetro, uyeb Musa, uwe Rimam.
Kumyae Jetro Uwog Musa
(Itishem Icwe 1:9-18)
13Ucwe fam-yi, Musa som ku pwen rikwen kutampwa ande ti pu rikwen-ba uwog-wu ti kiskinn ti kiskinn pu usir sunn. 14Ti uyeb Musa sae meme wande ti Musa ku nde ikyaen ande-wu, awu rang baa, “Ayine si imi ti afu ku nde te ande bane? Imi ti nde afu ku nde wande kum afu, u nda ande bane tsi pakob fu ti kiskinn pu usir sunn?”
15Musa ri te Jetro, uyeb-wu baa, “Ande bane ku ba uwog-m ku sha ti a u nung iken ti Rimam ku sha ti a na nde. 16Kiye ti aba a site kubyag tetso, aba ku ba uwog-m, ama ame ku kyae nyang kutampwa-ba, ama ku ri te ba icwe Rimam ti iken ti kwen-wu.”
17Jetro ri te wu baa, “Iken ti afu ku nde, nyang-yi be. 18Afu ti ande ba meme u num ijwe, ikyaen ti, wande yine skeb pu yi kpakang-fu. Afu u nde tag-fu ayi kum afu be. 19Tine, naa kutong fxen kumyae-m ayine. Rimam ā te fu ta tetso. Afu ti tsi kutunn unju ande ba uwe Rimam, ama ku pu rikwen-ba ba uwog Rimam. 20Kwen na ba icwe Rimam ti iken ti awu ku sha, ama nda ba ti aba ā nung kang fengo ti a u putsa, ti iken ti a u nde kang. 21Cwucwo, tsab ande ti ku kyen ikyenricwu Rimam, u site kubenti, ama ku ci-ba iken tikong be, ti fu pu ba ta risu ande kumbub kumbub ti ana ande ukob ukob ti ana ande mae ifaen mbe rijwe mae ifaen mbe rijwe ti ana ande rijwe rijwe. 22Nda ba ti a pwen rikwén kutampwa ande bane ko kiye titini. Rikwén ti a kpag skeb-yi aba, aba ā pu yi ba uwog-fu. Amaa, rikwén ti tom fuu, aba ā pwen yi te ajwo-ba. Fengo wune, ayi u nda wande-fu u tutom, aba ama u ndeya fu rikaen wande yi. 23Asiti afu a paembe kumyae yine, afu u nde tu te ande ba, ande ba ama u kafe ru kununn-ba uwae kujimshwur. Rimam ti ku ri te fu baa, afu na nde yine.”
24Musa naa kutong u fxen meme kumyae uyeb-wu Jetro, u nde meme iken ti Jetro ri te wu ti wu na nde. 25Awu tsab ande ti ku kyen ikyenricwu Rimam uwae ande Isirela ama u pu ba ta risu ande kumbub kumbub ti ana ande ukob ukob ti ana ande mae ifaen mbe rijwe mae ifaen mbe rijwe ti ana ande rijwe rijwe. 26Ama ande ba ku pwen rikwén kutampwa ande ko kiye titini. Rikwen ti a kpag skeb-yi, aba ku pu yi ba uwog Musa, ayi ti tom fuu, a ku pwen yi ti ajwo-ba. 27Isim ayine, Musa tē uyeb-wu Jetro kafe ru ti uten-wu.
Currently Selected:
Itiruye 18: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
