Koula 24
24
1Gè té ndò mi Ananias mbai lo ndjè kòrdjé dé ke tòkou dooudjé ke mare doou kada ke to ndjè gousou tar, ria na Tertulle. Dèdè ntoula dò Paul nò mbai té.
2Tokou dèdè mmar Paul mbä, Tertulle ounkotè ta toula dè pana,
Mbata deo té loi, Félix ke madji wota nya, djèdjè djisi ke mè woul nya, ke mbata deo kemkarè té loi i da ta kare né ke madjang ta dé madji mbata gel dooudjé nèn.
3Deo té toï ke loou toï, djèdjè ndiki gè ke mèdjè toï ta dai woio.
4A mbata mam ndiki ta tòi ke tar nèn gè eo ang, mam ndoudji nya ta ko tar lodjè nèn ngadji ke mè madji.
5Mbata djèdjè djo doou nèn tokou ndjè né da ke madjang, ke nda ta kare tar ï horo Juifdjé té toï dò nange té nèn toï. Nè nto tòkou doou ke ndjè tòdjou deo mare dooudjé ke to Nazaréendjé.
6Nè ndiki ta da baa kare tòkou kei Allah dé madjang, a djèdjè djwèè, ke djèdjè ndiki ta gange saria dè té deo tar ndedji té lodjè.
7A tòkou doou ke ndjè ngem ndjè pouroudjé Lysias dé òrè djidjè té ke singa.
8Nè noula tè ta kare ndjè ke oun dè ta dé nòi té. Tokou i ndja a doudjou gel tar la, i a kase geré deo té la tar toï ke djèdjè ntoula dè kendé.
9Juifdjé ndiki gè ke tar nèn naaté tò, dèdè mpana tar nèn toï to tokou tokoro.
10Tokou mbai yè dja ta kare Paul pa tar, Paul tél tar pana,
Mbata mam ngeré i to ndjè gange saria lo dooudjé nèn bal baya nya, mem koukou ta tòdji tar ngem ròm.
11Mbata i ase doudjou ta geré madji, to ndò dòkou gérè djo ba ke ma mao Jérusalem té ta wal Allah.
12Dèdè dom ma mmaitar ke doou kada ang, aséh dèdè dom mam nda ta kare dooudjé mbona ta mbeté tar ang, mè tokou kei Allah té aséh mare kei Allah aséh mè béh té ang.
13Dèdè dase tòdji gaté gaté ang gel tar ke ntoula né dòm loshénè.
14A ma mpa mari ke tokoro, mam nwal Allah lo kadjèdjè deo té ke dèdè mmar deo lo Nazaréendjé. Ma mo mem té ke tar toï ke tar ndedji tòdjou, aséh ke maketourou lo prophètedjé pa.
15Mem ao ngebe ke rò Allah té, né ke dèdè ndja ngebe tò, mbata dooudjé ke gaté gaté ke dooudjé ke gatang tò, da kï mè bwa yo té.
16Mbata yèn baa mam ngem madji ke ndò toï, ta kisi ke kedji ke madji no Allah té ke no dooudjé té tò.
17Bashénè gè té bal kada kada, mam ndé ta kare dooudjé ke béh lom né kare ba ke né ta kare Allah.
18Tokou ma mao nda né nèn, dèdè dom mè tokou kei Allah té, mam ntoko mba ase, dooudjé mbona sem ang, boula goto tò. A mare Juifdjé ke Asie éh nou,
19To tar lodè ta dé nèn nòi té ta toula dòm, tokou dèdè déh ke mare tar dòm té.
20Aséh are dooudjé nèn ndja pa né ke mam nda madjang, ke dèdè do tokou ma marr nò ndjè gange sariadjé té.
21Ban ang a to tar nèn kada ke ma mpa ke tarr, tokou ma marr horodè té, To mbata tar kï mè bwa yo té ke sésè esangidjé ta gange né saria dòm té bokonè.
22Mbata Félix geré tar Deo ke nèn gaté gaté, nè mpa naredè ta ngebe, mpana, Tokou Lysias tokou doou ke ndjè ngem ndjè pouroudjé a dé, baa ma ma sange gel tar losè.
23Bana nè nare tè ndjè ngem pouroudjé ta ngem Paul kei koula té, ta karè ndja daka ba, ke ta kòkou deo ang kare bokoradjé la toï ta dé rè té ta da sa madji.
24Gè té mare ndò kada kada, Félix dé ke dènè la Drusille ke to dènè Juif. Nè noula ta bar Paul, nè no tar ke Paul pa dò tar ko mè té ke Christ Jésus.
25Tokou nè mpa tar dò tar té ke gaté gaté, ke dò tar tò boo ke rò té, ke dò tar saria ke ao dé, bel da Félix nya, nè mpana, Ao loshénè, tokou ma mo madji mare ndò ma ma bari.
26Nè ngebe na to Paul a kare nè narè. Mbata yèn a nè noula mmarè né gar baya ta pa tar sa.
27A tokou bal djo ndai mba, Porcius Festus ndai tourou Félix, ke mbata Félix ndiki ta da né ke nèl Juifdjé, nè nïya Paul mè kei koula té.
Currently Selected:
Koula 24: KL1960
Highlight
Copy
Compare
Share
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
