Koula 25
25
1Tokou ban, tokou Festus dé dò nange té la mba, gè té ndò mouta nè nï Césarée té nao Jérusalem.
2Tòkou ndjè kòrdjé ke tòkou dooudjé lo Juifdjé dòrou gel tar lo Paul darè. Dèdè ndoudjè nya,
3Ndoudjè ta da mè madji kedè, ta kare noula nare doou nèn dé Jérusalem té. Dèdè dedji ta mbòna hoi ta tòlè ke deo bo.
4Festus tél tar pana, dao ngem Paul Césarée té, ke nè ndja tò na kao nou loshénè ba.
5Nè mpana, Tokou ban are tòkou dooudjé ke horosè té ao sem, tokou mare tar ke gatang to dò doou tén, aredè ntoula dè.
6Tokou nè nisi horodè té ndò wota djidjo aséh dòkou ang, nè nao Césarée té. Loou arè nga nè nisi ngèndé gange saria té la, nè noula ta kare Paul dé.
7Tokou nè ndé mbä, Juifdjé ke dé ke Jérusalem té arr mbòrè té, ntoula dè ke tar ke madjang nya ke dase kòrou gelè gaté gaté ang.
8Paul pa tar ta ngem rè pana, Mam nda né ke madjang ke tar ndedji lo Juifdjé kada ang, aséh ke tòkou kei Allah ang, aséh ke César ang tò.
9A mbata Festus ndiki ta da né ke nèl Juifdjé, nè mpa nare Paul, I ndiki ta kao Jérusalem té ta kare nsange tar loi nòm té nou, dò tar toula té nèn wa?
10Paul pana, Ma marr nèn ngèndé gange saria té lo César, loou nèn ke dase sange tar lom, mam nda né ke madjang ke Juifdjé ang, tokou i geré madji.
11Tokou bo mam nto ndjè né da ke madjang, ke mam nda né ke ase karem minga yo, mam ndiki ta kaïn yo ang, a tokou tar ke dèdè ntoula né dòm to tar ke ba, doou kada ase ta kilam djidè té ang. Mam ndiki ta ko César.
12Bana Festus tokou nè mpa tar ke ndjè gange sariadjé mbä, ntél tar mpana, I ndiki ta ko César, i a kao rò César té.
13Tokou mare ndò kada kada ndai mbä, mbaibé Agrippa ke Bérénice ndé Césarée té ta da laphia Festus.
14Tokou dèdè disi nou ndò baya, Festus tòdjou tar lo Paul mbaibé pana, Doou kada éh nèn ke Félix ïyè kei koula té.
15Tokou ma méh Jérusalem té, tòkou ndjè kòrdjé ke tòkou dooudjé lo Juifdjé dòrou gel tar la, ke dèdè ndoudjoum ta gange saria dè té.
16Mam ntél tar maredè to tar béh lo Romaindjé ta kare doou kada dji ndjè koundèdjé té ang, dongor doou ke éh ke tar dè té wo kem ndjè toula dè, ta kare nè mpa tar ngem rè do tar té ke ntoula né dè.
17Tokou ban, tokou dèdè mbona nèn, mam ngebe ang, a ndò kada gè té misi ngèndé gange saria té lom, ma moula tar ta kare doou nèn dé.
18Tokou dèdè ke ntoula dè dï tarr, dèdè ntoula dè ke mare tar ke madjang tokou ma medji mem té ang.
19Dèdè mmaitar sa mbata mare né polo lodè ndja, ke mbata doou kada Jésus ke woei mbä, ke Paul pana nè nisi tébe.
20Mbata mam ngeré deo ta sange gel tar nèn ang, mam ndoudjè tokou nè ndiki ta kao Jérusalem té, ta sange tar la nou mbata tar nèn.
21A tokou Paul doudjoum ta ngemè sar Auguste gange tar la, ma moula ta kare ngemè sar ta koulè kare César.
22Agrippa pa are Festus, Ma ndja ndiki ta ko tar lo doou nèn tò. Nè mpana, Bara i a ko tar la.
23Tokou ban ke sindò, Agrippe ke Bérénice ndé ke né ke madji lodè, dèdè dao mè kei ko tar té ke tòkou dooudjé ke ndjè ngem ndjè pouroudjé, ke tòkou dooudjé ke mè béh té. Bana mbata Festus oula tè mbä, dèdè ndé ke Paul mè kei té.
24Festus pana, Mbaibé Agrippa ke dooudjé toï ke éh horodjè té nèn, sésè woidjé doou nèn, nè ke gel Juifdjé toï doudjoum mbata tar la ke Jérusalem té, ke loou té ke nèn tò, dèdè mpa ke tarr na, ase kare nisi ke tébe ang.
25A ma mo nè nda né kada ke ase ta karè noei ang. Mbata nè ndja ndoudjou ta ko Auguste, mam ndiki gè ta koulè.
26A ma méh ke tar ke gaté gaté ta da mè maketourou té ang, ta pa kare mbaibé lom do doou té nèn. Tokou ban mam ndé sa nòsè té, nòi té ndja Mbaibé Agrippa, mbata tokou djèdjè nsange gel tar la ase, ma méh ke né ta kare da mè maketourou té.
27Mbata ke kem té to tar mbe ta koula ke doou ke ndjè kei koula, tokou mam nda tar né ke ntoula né dè mè maketourou té ang.
Currently Selected:
Koula 25: KL1960
Highlight
Copy
Compare
Share
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
