Koula 22
22
1Ngakömdjé ke bòmdjédèdè, woidjé tar ke ma mpa maresè bokonè ta ngem rom.
2Tokou dèdè do ke nè mpa naredè ke tar Hébreu, dèdè ntél disi dèkèkè ke ntadjè. Nè mpa naredè,
3Mam nto Juif, doudjoum béh té ke Tarse, nange té ke Cilicie, mam ntòkou béh té ke nèn nò gòl Gamaliel té, nè ke ntòdjoum gaté gaté deo tar ndedji té lo kadjèdjè. Mam ndiki gè mem té ke tar lo Allah deo kadaba tokou sésè toï edaidjé bokonè.
4Mam ngätar ke Deo té nèn nderèng mare dooudjé woei, mam ntòdè ke miladè kei koula té, dingaodjé ke dènèdjé tò.
5Deo kadaba tokou mbai lo ndjè kòrdjé ke tòkou dooudjé toï pa tar nadji lom tò. Mam ntaa maketourou djidè té ta kare ndjè ke to ngaködjèdjè, ke ma mao Damas ta kwaa dooudjé ke isi nou tò, ta tòdè ke koulaa ta dé kedè Jérusalem té, ke ta toundadè.
6Tokou mao ndja ke deo, ke mam ndé ngosiba ta béh Damas té, tokou kade dé ngosi ta karr dana, tòkou lokarè ke dara ndokoo kirim loshénè loshénè.
7Ma moso nange, ma mo ndou ke pa sem na, Saul, Saul, mbata di a ngäm ke tar wa?
8Mam ntél tar mpana, I to na wa, Mbaibé? Nè mpa narem, Mam nto Jésus ke Nazareth, nè ke i ngë ke tar.
9Dèdè ke déh sem do lokarè nèn tò, a dèdè do ndou nè ke mpa narem ang.
10Ma mpana, Ma ma da tokou ban wa, Mbaibé Seigneur? Mbaibé Seigneur pa arem, Ï tarr ao Damas té, dèdè da pa kari nou né toï ke to tar loi ta da.
11Tokou ma mase ko loou ang mbata lokarè nèn ke ndokoo nya, dèdè ke déh sem dwaa djim darem ndé Damas té.
12Doou kada Ananias, doou ke ngem tar lo Allah deo tar ndedji té, Juifdjé toï ke isi nou pa tar la tokou madji nya.
13Nè ndé rom té, tokou nè narr mbòrem té nè mpa narem, Ngoköm Saul, wo loou. Ke lé té ndja kem teï yerere nga, ma moè.
14Nè mpana, Allah lo kadjèdjè bari ke daka ta geré né ke nè ndja ndiki, ta ko nè kada ke nto gaté gaté, ke ta ko tar ke ndouè té.
15Mbata i a to tar nadji mbata la nò dooudjé té toï, ta pa tar ke i wo ke kemi ke mbi mbä.
16Di baa ao ngebe loshénè wa? Ï tarr, inga baptême, etoko né ke madjang loi ke dang deo bar ri Jésus té.
17Tokou mam ntél Jérusalem té, ke ma mao ndoudjou Allah mè tòkou kei Allah té, ma mo ke ni,
18Ma moè nè mpa narem, Ï tarr loshénè loshénè, etéh ïya Jérusalem, mbata dèdè da ko tar nadji loi ke i pa dòm té ang.
19Ma mpana, Mbaibé Seigneur, dèdè ndja ngeré ke ma mila dooudjé kei koula té, ke mam ntoundadè dèdè ke do mèdè té sei ke mè kei Allah té kada kada toï.
20Tokou mese ndjè tar nadji loi Etienne oula nange, ma marr lé té ndja tò, mam ndiki gè ke mam ngem koubou lo ndjè ke tòlè.
21Nè mpa narem, Ao, mbata ma ma koulai deo eo rò Gentildjé té.
22Dèdè do tar lo Paul nderèng do tar lé ke mpa nèn, bana dèdè dila mber naaté mpana, Òridjé doou ke tokou ban nange nèn. Ase ta kare nisi ke tébe ang nga.
23Tokou dèdè dourouki ke nsoukou koubou lodè, nsärè babourou ke tarr,
24Tòkou doou ke ndjè ngem ndjè pouroudjé oula ta kare Paul dé mè kei té lo ndjè pouroudjé. Nè mpa naredè ta sange gel tar lo Paul ke ndei ta geré mbata di a dourouki ban dè té wa?
25A tokou dèdè nto Paul ke koulaa ndar, Paul pa are mare ndjè ngem ndjè pouroudjé ke arr mbòrè té, pana, Tar ndedji losè pana to madji ta kounda doou ke to Romain, ke nai tar saria wèè ang bai wa?
26Tokou ndjè ngem ndjè pouroudjé wo tar nèn, nè nao rò tòkou doou té ke ndjè ngem ndjè pouroudjé, nè mpa narè, Di a ata da wa? Mbata doou nèn to to Romain.
27Tokou ban tòkou doou ke ndjè ngem ndjè pouroudjé dé rò Paul té pana, Epa arem, i to Romain wa? Nè mpana, Aä.
28Tòkou doou ke ndjè ngem ndjè pouroudjé tél pana, Ma mouka narè nya ta dé to Romain. Paul pana, Doudjoum to Romain ndja.
29Tokou ban dèdè ke dao ta sange gel tar la ntél ke godè ke dang loshénè loshénè. Bel da tòkou doou ke ndjè ngem ndjè pouroudjé tò, tokou nè no Paul to to Romain, mbata nè naredè ntòè.
30A mbata nè ndiki baraba ta geré gel tar ke tokoro, mbata di a Juifdjé oun dè, nè ntoutou Paul, nè noula ta kare tòkou ndjè kòrdjé ke ndjè gange sariadjé toï mbòna. Baa ta kao ke Paul nodè té.
Currently Selected:
Koula 22: KL1960
Highlight
Copy
Compare
Share
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
